Daegbingz gig vuenheij lwnh gou nyi, diuz gauhsuz goengloh Hocouh Si daengz Bwzswz Si Sihlinz Yen, genjcwng Hosih Gauhsuz, gauhsuz song gyaeuj cingqngamj lienzciep ranz de caeuq ranz Siujbanh, diuz gauhsuz goengloh neix lumjnaeuz cienmonz vih ranz songde guh nei, seizneix diuz loh neix gaenq doeng 800 lai goengleix loh, caj cienzsienq ronzdoeng ngoenz haenx, gyoengqde ma ranzmeh Siujbanh couh engq vaiqdangq lo, baezbaez dwen daengz neix Siujbanh cungj simhai dangqmaz. Denzsih Gauhsuz dwg diuz goengloh youqgaenj lienzciep Gvangjsih、Yinznanz song aen sengj gih, hix dwg duenh loh youqgaenj gapbaenz Hosih Gauhsuz. Denzsih Gauhsuz cingqngamj yaek ronz gvaq ranzcoj Daegbingz Hungzsingh Cunh Mbanjbingzyungh, gauhsuz guh daengz bakdou ranz bonjlaiz dwg gienh saeh hung hawj vunz angqyangz vaiqvued, hoeng cwng dieg seiz cix roebdaengz saeh rwix, couh dwg yaek aeu gig lai vunzmbanj senj diegmoh. Gij fungsug Bouxcuengh, senj diegmoh dwg gienh saeh gig hungnaek ndeu, caemhcaiq senj aen moh ndeu hong saeh lai, cienz dienzboiz cungj mbouj gaeuq, baenzneix vunzmbanj nanznanz cungj mbouj bae guh. Goengnax Daegbingz dauqdaej youq daihhag soujfuj Namzningz sonsaw lai bi youh dwg boux cozgyah mizmingz, youq dieg neix gig miz mingzdaeuz, mwhhaenx vunzmbanj cungj muenghyawj yaemhywx mbouj dingh, de giendingh boux daih’it ndwn okdaeuj guh yienghndei, cingj deihleix sienseng genj ngoenzndei le senj aenmoh daxdaiq Daegbingz daengz gizdieg laeng bya engq gyae. Vunzmbanj raen miz boux daih’it senj le, hix sikhaek gaenriengz bae senj dieg. Couh youq ngoenz haenx, yaepyet ranz dem ranz senj ndaej 30 lai aen moh, daengx mbanj vunz ndaej bang cungj caez daeuj bang, vunz Mbanjbingzyungh cungj gig daemxcengj gij hong cwngfuj. Geiqndaej Denzsih Gauhsuz doengci ngoenzhaenx, Sihlinz couh haeuj daengz aen seizdaih gauhsuz, Guengjsae guhdaengz yienh yienh cungj doeng gauhsuz. Hungzsingh Cunh daengx mbanj venj daeng- loengz daengrongh cit bauqrengh, ranz lawz miz ci cungj hai hwnj gwnz gauhsuz bae buet baez ndeu, mizmbangj bae Bwzswz, mizmbangj daengz Dahbazdaz, mizmbangj lij gag haici bae Yinznanz, vunzmbanj cungj vih diuz gauhsuz muengh lai bi guh ndaej mbouj ngaih neix angqhemq. Daegbied dwg Mbanjbingzyungh, lij miz giz gihfugsaeh gauhsuz swhgeij, dangqnaj Siujbanh lij youq aen bouqngaiz gag aeu ndaw gihfugsaeh, guh gij hong soungaenz caeuq baetranz. De daegbied gamjaen caeuq docih Denzsih Gauhsuz hawj ranz gyoengqde daiq daeuj ndeicawq caeuq bienhleih. Gangj ndaej simdoengh seiz, gou raen lwgda Daegbingz beij aenndwen gwnzmbwn lij ronghgywg.

Gou dauqngeix banngoenz dou ngonzyawj aen suenmak bwzyanghgoj Hungzsingh Cunh caeuq dieggiek hanghmoeg cunghab daejniemh gingjgyaeu lajmbanj Hungzsingh, bouxfucwz cunhveij gaisau Hungz- singh Cunh miz seiq aen mbanj, baudaengz Mbanjbingzyungh、 Mbanjbo’ngaz、Mbanjbogu、Mbanj- runghndaw, daengx mbanj 1332 vunz miz Cuengh、Gun、Myauz sam aen minzcuz. Daengx mbanj gvangq 43815 moux, ndawde reihnaz miz 3920 moux, naz miz 767 moux, ciemq dieg reihnaz 21%. Vunzmbanj ginghci souhaeuj cujyau dwg ok rog bae guh hong. Cujyau canjnieb dwg hwngfat mak ndei guhdaeuz, lwggam sahdangzgiz 2000 lai moux, youzcaz 800 lai moux, ndaem byaekheu 300 lai moux. Daengx mbanj hwngfat 6 aen hanghmoeg cunh cizdij ginghci, 2022 nienz souhaeuj 54.2406 fanh maenz, cujyau yungh youq cizdij ginghci gya’gvangq caiq hwngfat、mbanjgaep vwnzdij hozdung、bingz- beij baenzroix ceiq gyaeu 、dajciengj daihhagseng maenhndei doengh fuengmienh neix, cunh cizdij ginghci aeu yienhgaep daengxbuenz suenq- veh caeuq diegreih riuzcienj doengh cungj fuengsik neix, daiqdoengh 307 hoh ginzcung hwngfat ginghci.

Daj Denzsih Gauhsuz hai hong hwnqguh doxdaeuj, Hungzsingh Cunh gungh miz 300 lai boux bae guh hong, guh daengz loh coih baenz bae, gaijgez le gij vwndiz mbangj vunzmbanj neix youq bakdou ranz guhhong. Denzsih Gauhsuz doeng loh le, dangqnaj lij youq gihfugsaeh、camhsoungaenz vih vunzmbanj daezhawj 30 lai aen gangjvei guh hong, youq dangdieg yungh vunzhong cauhfuk dieg neix. Linghvaih, lij daiq daeuj engq lai seng’eiq hawj ndaw mbanj, lumjbaenz yinxhaeuj Yuncoz Nungzyez Gohgi Youjhan Gunghswh ndaem bwzyanghgoj, guh gij vunqsik gunghswh+cunh cizdij+nungzhoh daeuj doxgap haifat hanghmoeg, gawq gaijgez gij vwndiz nungzminz guh hong youh baujcang mizrengz cunh cizdij ginghci demsou daezhawj. Daj neix hwnj, vunzmbanj Hungzsingh Cunh dauqdaej youq gwnz Denzsih Gauhsuz diuz doenghmeg moq neix, buet vaiqvit hwnj diuz roen civaiq doengzcaez fouqmiz.

Gou cingq ngeixnaemj doengh gij saeh neix seiz, laj laeuz cienz daeuj gij singhemq Siujbanh, sou lij youq gwnz laeuz guh gijmaz ne? Goengnax cingq dauqcawq ra sou dauqma gwn laeuj ne. Gou caeuq Daegbingz doxyawj baez riu, rox baez neix ndoj mbouj ndaej dem lo, dou doengzseiz han “daeuj lo、daeuj lo, sikhaek roengzbae”. Yienghneix, dou roengz laeuz haeuj ndaw vunzlai bae, dauqcungz daengz henz daiz cenjlaeuj doxbungq、nauhyied cauz- hu haenx. Hoeng baez neix dwg gou cawjdoengh dawz cenjlaeuj, yiengq Daegbingz caeuq Siujbanh song gvanbaz gingqlaeuj, cien coenz fanh coenz cungj youq ndaw cenjlaeuj rangfwt noengznwd neix.

Gyanghaemh Mbanjbingzyungh, rumzcou liengzseu raemxraiz roengz, vunzlai baez dem baez angqhemq le sanq bae lo. Sij mbouj ndaej doxbiek, dou naengh hwnj gwnz heiqci dauqma yienhsingz lo. (2 sat)