Ndwencieng ngoenz co’ngux,

Raeuz doxma lienzvuen,

Ndaej cienzmbanj donzyenz,

Dangq ronghndwen cibngux.

Caezgya sim doxgiet,

Raeuz daegbied simvuen,

Saehhwng vunzmbanj muengz,

Bouxboux gien ngaenzceij.

Cejnuengx sim lienz sim,

Dangq vagim nyaenx bauj,

Caezgya ndaej haeujngaeuh,

Lumjbaenz ngaeux lienz sei.

Raeuz haq okrog bae,

Sim caez geiq bouxlaux,

Dahdah cix hengzhauq,

Geiq bouxlaux lwglan.

Ngoenzneix raeuz baenzndei,

Aeu swnh eiq bouxlaux,

Doiq bohmeh coenghauq,

Bouxlaux sim hix vuen.

Raeuz bouxboux baenzgya,

Ndaej haiva gietngveih,

Bouxlaux doiq raeuz meij,

Raeuz gaenjgeiq vanzaen.

Neix raeuz ra ndaej gwn,

Hwnj ranzlaeuz cauhgya,

Bouxboux ci max ca,

Cienq dauqma hoizbauq.

Gyahcangj daengz raeuz dang,

Han daejliengh bouxlaux,

Ciengxlwg hung gwnlaeuj,

Youh aeu you guhranz.

Bohmeh ciengx raeuz hung,

Bwnq cuk youh bajhaex,

Ngoenzgonq raeuz lij saeq,

Meh fugsaeh baenzhwnz.

Bohmeh doiq raeuz ndei,

Cien bei(bi) hix aeu geiq,

Baeznaengz daengz cietheiq,

Raeuz geiq ma damcaen.

Vaq dumz meh youh rieg,

Dungx iek meh youh gueng,

Buh vaih meh youh fong,

Seih siengjdong(maqhuz) sinhoj.

Lij saeq caengz doengsaeh,

Caengz ndaej vanz aencingz,

Neix raeuz hung baenz vunz,

Dang vanzaen bouxlaux.

Hoh lungzbaj auliuz,

Bouxboux ciu bakseiq,

Hoh gosauj nuengxsaeq,

Beij vuengzdaeq cwxcaih.