Haemhhaenx, Aen ronghndwen Mbanjbingzyungh youh hung youh luenz, aenndwen ronghsagsag ciuq doh daengx mbanj. Gou ndwn youq gwnz yangzdaiz ngeih laeuz ranz Lauxvuengz muengh roengzbae yawj, ndaw gyanghongh mbouj suenq gvangq haenx, baij cib lai aen daiz song mij gvangq, doxrangh hwnjdaeuj baenz aen daizngaiz raezrangh gaenh sam cib mij. Gwnz daiz bu rim ronggyoij heuswd dangguh baengzdaiz, nohbit nohgaeq nohbya lij miz gij feihgwn dangdieg mbouj doengz gizwnq baij rim daiz, cukcuk 60 boux vunz humx baenz gien ndeu doxgingq、ciengqgo、gangjgoj, vunz lai vunz daih, nauhyied dangqmaz.

Gwn ngaiz seiz, miz vunzmbanj gvaqdaeuj heuh daihgya caez daem ceizet, sam haj boux humx youq henz rum aeu geij gyaengh faex youh co youh raez ndeu haenqrengz moeb, ginggvaq geij boux vunz gaprengz moeb bae moeb dauq bak lai baez, gij haeuxnaengj song aen rek ngamq cawj cug lij ndatfwt hwnj fwi、aeu mbaw doenghgo nyumx baenz saekhenj saekaeuj, moeb baenz song ndaek haeux niunengneng unqnemnem lij rag baenz sei. Doeklaeng, lingh bang vunz ndeu ciepdwk dawz ndaek haeux neix faen baenz ngeu dem ngeu haeux iq, dwk hwnj gwnz daizngaiz bu mbaw ronggyoij haenx, baihgwnz lij vanq rim gij mba aeu duhdoem lwgraz cauj rang muz baenz haenx, ndaek dem ndaek haeux henjgywg duk hamh miz gyu, ndaek aeuj duk hamh van, song faj fwngz caiq nu couh guhbaenz aen dem aen ceizet luenzgyaeq bizbwd. Doeklaeng, geij boux buzlaux aeu aengei dak huqsauj luenzlu benjbingz haenx baij gij ceizet saek mbouj doxdoengz de caezcingj, daek hawj bouxhek naengh daizraez caez gwn. Yawjraen yienghneix, gij vunz mbouj rox haenx lij laihnaeuz ndaw mbanj cingq gvaq ciet gijmaz hungnaek ne, daemh mboujgvaq dwg ranz Lauxvuengz caeuq gyoengq beixnuengx ranzmbanj cingq cingznaek dakdaih gyoengq beixnuengx daj gizgyae daeuj.

Neix dwg gou baez daih’it youq daizngaiz raez mbanj Bouxcuengh Guengjsae saebaek gwn ngaiz, roxnyinh singjsien youh vuenheij, caemh dwg vunz Bouxcuengh, gou rox neix dwg vunzmbanj dangdieg dakdaih hekgviq ceiq ndei. Ndigah vunzmbanj mbouj dingz daeuj gingqlaeuj seiz, gou hix mbouj doi saekdi, cenj dem cenj ndoet liux bae, hoeng gou gwn mbouj ndaej geijlai laeuj gig vaiq couh loq fiz lo. Vunzlai nauhyied angqyangz seiz gou ndoj hwnj gwnz yangzdaiz ngeih laeuz bae, it dwg yaek ci rumz singj laeuj, ngeih dwg yaek daj baihgwnz ingj daengx aen hozdung. Gou cingq dawz soujgih nyinhcaen ingjsiengq seiz, miz aen raemhngaeuz ndeu sawqmwh roemx gvaqdaeuj hwk dwk gou diuqyat. Gou baez yawj dwg daeglan Lauxvuengz Daegbingz, gwnz fwngz de lij dawz bingzlaeuj caeuq cenjlaeuj, riuhehe naeuz gou, goengnax naeuz ra mbouj raen mwngz, heuh gou daeuj ra mwngz bae gwn laeuj ne.

Gou sikhaek rag Daegbingz, loq miz di gouz de naeuz, haemhneix mwngz gaenq gingq gou caet bet cenj lo, raeuz couh youq gizneix yietnaiq yaep ndeu, gangjgangj goj ba. Daegbingz gwn dwk naj hoengzyenzyenz riuriu naeuz, goengnax naeuz lo mbouj ndaej dakdaih mbouj ndei gyoengq beixnuengx daj dieggyae daeuj haenx, baenzneix gou couh doq buenx mwngz youq gizneix gwn laeuj doq gangjgoj ba, gangj sat lij ndenq aen cenj hoengq ndeu hawj gou lij ndingq rim laeuj. Lauheiq dwg aenvih gou okseng youq Lungzlinz, daengz seizneix youq ranz caeuq bohmeh lij dwg gangj vah Lungzlinz, hoeng vah Lungzlinz caeuq vah Sihlinz yaek doxdoengz, ndigah dou gangjgoj cungj dingq rox, dou lumjnaeuz baengzyoux senq cix roxnaj nei.

Gou lwnh de nyi, gou youq Lungzlinz seng youq Bwzswz majhung, seizneix youq Namzningz guhhong lij baenzgya miz song boux lwg. Ciuq goengnax mwngz gangj, gaxgonq Lungzlinz Sihlinz dwg caemh aen yienh ndeu heuhguh Sihlungz Yen, doeklaeng cij faen baenz song aen yienh, baenzneix gangj raeuz suenq dwg buenq boux caemhmbanj ne. Daegbingz simsoh riuhehe lij ngaekgyaeuj dwddwd nyinh gij vah gou, lauheiq dwg ronghndwen gyaeundei laeuj hom, yaepyet dou couh doxsug, de hix menhmenh lwnh gij goj de hawj gou dingq.

Daegbingz caeuq mehyah de Siujbanh dwg 2001 nienz youq Gvangjdungh Hozyenz Si dajgoeng seiz roxnaj, aenvih caemh dwg vunz Guengjsae, song boux guhhong ciengzseiz doxbang doxcoh, baebae dauqdauq doxsug doxrox. Daegbingz dwg vunz Bwzswz Si Sihlinz Yen, vunz simsoh lauxsaed, Siujbanh dwg vunz Hocouh Si Cunghsanh Yen, unqswnh gyaeundei. Yienznaeuz cungj dwg vunz Guengjsae, hoeng boux ndeu ranz youq Guengjsae saebaek, boux ndeu ranz youq Guengjsae doengbaek, cungqgyang byabya dahdah gek miz ca mbouj lai cien goengleix. Vahsug naeuz, aenyienz cien leix diuzmae riengh, song boux vunz roxnaj doxndiep doxgyaez caet bi le, Siujbanh dauqdaej raen Daegbingz cingzlaeg baenghndaej couh maij de lo, Daegbingz cix gamjdoengh Siujbanh mbouj yiemz de dwg boux gungzhoj daj diegbya bien’gyae daeuj, 2008 nienz song boux gietdingh lingx cingq doxaeu baenzgya, yaek gvaq ndwenngoenz engq ndei, songde laebdaeb youq rog buekguh. Baenzgya bi daih’it, songde couh miz daeglwg daih’it. Aen gyaranz hung bonjlaiz couh vuenyungz neix lai angq haujlai. Doeklaeng guekgya miz cwngcwz ndaej aeu song boux lwg, songde cij aeu lwg ngeih, hix suenq dwg neb va hwnj gwnz man. Seizhaenx bohmeh Daegbingz cungj 80 lai bi lo, nienzgeij laux le aenndang yied ngoenz yied nyieg, yaek aeu miz vunz youq henzndang ganq. Baenzneix Daegbingz song gvanbaz hauqswnh neix cix dauqma Sihlinz yienhsingz dajgoeng, baenzneix hix ndaej fuengbienh ganq bouxlaux caeuq lwgnyez. 2021 nienz, Daegbingz ma daengz ranzmbanj Hungzsingh Cunh Cunhveijvei guhhong, dang dangjcihbu fusuhgi、cunhveijvei fucujyin, mbiengj ndeu ndaej ngoenzngoenz ma ranz ganq bouxlaux lwgnyez, mbiengj ndeu ndaej fugsaeh vunzmbanj, de sim’angq raixcaix.

Daegbingz naeuz, bingzciengz daengx ranz vunz doxhuz vuenyungz, song gvanbaz hix gig noix doxceng, dandan miz baez dog gvaqcieng gvaqciet Siujbanh yaek bae ranzmeh Cunghsanh damqcaen, couh nyaenx mbouj ndaej ienq vihmaz yaek haq daengz Sihlinz diegbya dieglueg neix, roen gyae’gyanggyang, yaek ma ranz saek baez caen mbouj ngaih ha. Doenghbaez, daj Sihlinz haici ma daengz ranz Siujbanh ceiq noix aeu cibsam aen cung, bingzciengz gyanghaet bet diemj buenq okbae gyanghaemh ranz laepnyamq cij daengz dieg. Hwnz lienz ngoenz ganj roen, baezbaez ma daengz ranz bouxlaux lwgnyez cungj baegnaiq yaek dai, Siujbanh vihneix ciengzseiz ienq de. Baenzneix daengz 2022 nienz 12 nyied 29 hauh, Denzsih Gauhsuz cingqsik doengci le, gyoengqde gyanghaet 8 diemj buenq daj Sihlinz okbae, gyanghaemh caet diemj cung baedauq couh daengz ranz Siujbanh, lij ganj ndaej hwnj caeuq vunzranz caez gwn haeuxcaeuz, ndaej gyangngoenz couh daengz ranz hix suenq dwg yamq baenaj lo, daj neix hwnj Siujbanh hix mbouj vih ma ranzmeh simyou dem lo.

（1）