Danghnaeuz mbouj dwg haxbaenh gij biujyienh geizheih de, lauheiq gou couh doengzeiq de youq laeng gou ninz lo, dauqdaej de lij dwg dahniq, hoeng ndaw conghhoz de fat ok sing geizheih, hawj gou roxnyinh miz di dwglau.

Gou hai dou soengq de okbae, nyoengx okbae seiz, daj ndaw daeh de doek geij naed dangz, gou gip hwnjdaeuj yawj, dwg dangz duzdouq hung, gou doq siengj doq vut bae.

Gou sikhaek gven dou hwnjdaeuj, vut de youq baihrog. Gyaeuj gou ing youq gwnz dou, ndaw uk miz aen siengjfap geizheih ndeu. Gou roengzrengz nyaenxheiq, ngeix saeh bonjfaenh, yaep ndeu le, couh swiqnaj catheuj bae ninz lo.

Gou maezmiegmieg ninz daengz byonghhwnz, dingqnyi miz gij sing gigi gya-gya.

Dwg gij sing duzmeuz haeujdaeuj gwn haeux, gou naemj, youh sim’onj ninz lo.

Gou sawqmwh roxnyinh, gou gaenq mbouj miz duzmeuz lo, naemj daengz neix gou sikhaek benz hwnjdaeuj, sawqmwh raen aen ngaeuz ndaem ndeu daj henz conghcueng myab gvaq gig vaiq, haeux lw sanq youq gwnz namh, gou yawj mbouj cingcuj aen ngaeuz ndaem haenx dwg gijmaz, roxnyinh miz di vuengluenh.

Byaij daengz yangzdaiz, dawz gij dangz duzdouq hung banhaemh cawx daeuj haenx, yaek gwn naed ndeu atat ndang saenz. Liuh mbouj daengz ndawhab hoengq liux, naed dangz ndeu cungj mbouj miz lo.

Gou daengx ndang saenz hwnjdaeuj.

Gou rox gij siengjfap gou gig mbouj hab ciengzleix, hoeng youh mbouj ndaej mbouj yienghneix siengj.

Gou vut duzmeuz bae, yienzhaeuh dahsau iq ndeu daeuj ranz gou, de sug ndaw ranz rox hai aen funghsan, rox bae sousib sahfaz, yienzhaeuh fatok gij sing “gulu gulu”, lij caeg gij dangz gou ceiq gyaez gwn haenx, byonghhwnz, haeuj ranz gou caeg haeuxmeuz……

Gag youq nanz lai, hawj gou ukgyaeuj luenh luma?

Gou roxnyinh aen sim gyoetcadcad.

Gou bietdingh aeu dwk aen denva ndeu hawj bouxwnq gangj aen saehgienh geizheih neix.

Fan geij baez dunghsinluz ra denva haumaj, cawz liux boux doengzdoih guhhong caeuq hujgeiq, couh cij lw boux mehheiz gai byaek ndeu, gou siengj bae siengj dauq lijdwg dwk denva hawj de, denva yiengj le gig nanz mbouj miz vunz ciep, baenzneix haemh lo, de bietdingh dwg ninz ndaek lo, cingq naemj cuengqroengz, denva ciep doeng lo.

“Mehheiz, gou dwg Siujgangh, ciengzseiz caeuq mwngz cawx makyungz, lij mbouj caengz ninz ha? Gou siengj caeuq mwngz gangj gienh saeh ndeu ne.”

“Mwngz naeuz ha.” Gij sing mehheiz gig hung, de dwg yungh aen soujgih bouxgeq.

“Gou ciengx duz meuz ndeu, mwngz rox lwi? ”

“Rox, mwngz gangj gvaq.”

“Gou vut de bae lo, mwngz rox lwi? ”

Denva baihde lumjbaenz caem yaep ndeu le, de sing hung cam: “Vihmaz vut de bae ne?”

“Aenvih de baenz bingh lo.”

Denva baihde youh caem lo, mehheiz bietdingh gig dwgcaengz boux vunz simdoeg yienghneix.

Geiqndaej baez daih’it caeuq mehheiz cawx byaek, de yungh gij cienz gai byaek haenx cawx aen mienhbaunoh ndeu hawj duzma henz de gwn. Mehheiz naeuz, duzma heuhguh Dozdoz, gaxgonq dwg duzma louzlangh ndeu, cib bi gaxgonq haet ndeu cawx aen bau ndeu hawj de, ma couh ngoenzngoenz buenx de, doeklaeng mehheiz couh soulouz de lo. Ma daj caeux daengz haemh buenx de gaenq cib bi lo, mboujguenj mbwn rongh doek fwn. Ngoenz fwn doek, mehheiz coengh de daenj buhfwn, lumj gyaez gij lwg swhgeij nei.

Mehheiz mbouj miz lwg, gvan de hix dai haujlai bi lo.

Lauxsaed gangj dwg cungj diensingq ndeu, simndei dwg cungj genj ndeu, mehheiz cungj aeu baenzneix guh.

Denva gou hix caem roengzdaeuj, mbouj rox hab gangj gijmaz.

“Mwngz soengq hawj gou ndaej lwi?”

“Gou vut de lo, aiq deng bouxwnq gouq bae. Hoeng, haemhneix de youh dauqma lo, de bienqbaenz dah lwgnyez iq ndeu, dauqma boizhaemz gou.”

Gou gangj gij saehcingz haenx hawj mehheiz baez ndeu.

“Gou rox mwngz haengjdingh nyinhnaeuz gou fatbag lo, hoeng gij duenhdingh gou wnggai mbouj loek……” Gou roengzrengz ra vah, hawj mehheiz saenq gou.

Mehheiz dinghcaem haujlai nanz, cij gangj coenz vah ndeu: “Danghnaeuz mwngz siengj de, bae ra de dauqma ba, ndei lwi?”

“Hoeng……”

“Hoeng gijmaz?”

Gou cuengq denva le, naengh youq gwnz yangzdaiz, caj le haujlai nanz haujlai nanz, gou mbouj gamj caiq bae siengj gienh saeh neix, hoeng dingz mbouj roengzdaeuj.

Seizneix, rog dou miz sing roq dou.

“Bouxlawz? ” Gou gipmuengz byaij gvaqbae.

Mbouj miz vunz dapwngq, gij sing roq dou bienqbaenz gij sing doxdawz nyauj de.

Gou mbouj gamj bae hai dou, ndwn youq laeng dou mbouj gamj doengh.

Gou ae song sing, sawqmwh, gij sing rog dou mbouj miz lo. Gou doeklaeng bae hai dou yawj dauqdaej dwg yienghlawz. Ngeix mbouj daengz, baihrog dwg dah lwgnyez haxbaenh deng gou gyaep deuz haenx.

“Mwngz yaek guh gijmaz?” Gou cam de.

De gig doeksaet dwk yawj gou, lumjnaeuz gig mbouj roxyiuj gij vah gou.

Gou ndaej haengjdingh dwg de, aen lwgda de gou gig sug.

“Gou rox mwngz dwg bouxlawz, mwngz dauqdaej siengj guh gijmaz?”

“Gou dwg bouxlawz? ”

“Mwngz dwg meuz……”

De riu hwnjdaeuj, lwgda saeklamz daih lumj aen da meuz gou ngamq vut haenx.

“Gou geij ngoenz mbouj raen duzmeuz mwngz lo, gou rox mwngz vut de bae lo, aenvih de baenz bingh, ndangdaej in, hemq mbouj dingz, hawj mwngz ninz mbouj ndei.”

Ndaw hoz gou saepsaep, siengj gaijnaeuz gijmaz, cix gangj mbouj okdaeuj.

“Mwngz yousim de dauqma ra mwngz ha? ”

Gou mbouj dap vah.

“De danghnaeuz dauqma ra mwngz, bietdingh dwg aenvih de gyaez mwngz, liz mbouj ndaej mwngz, mwngz dwg vunzranz de, de yousim mwngz gadog.”

Dah iq gangj sat, coh gou riu lo, youh naeuz: “Gou siengj ciq rongz meuz mwngz bae yungh, daeggo gou ngoenzneix yaek soulouz duz meuz louzlangh ndeu, de sou haujlai meuz louzlangh.”

“Ranz gou youq doiqnaj mwngz, gou dwg daj dong nyapnyaj gip daeuj, daeggo gou gip meuz seiz, dingjlingz bungz raen gou.”

“Ngoenzlwenz, mwh mwngz vut meuz, gou raen mwngz gvaq……”

“Daeggo dwg canghyw doihduz, banngoenz vih meuz yawj bingh, banhaemh youq aen diemq bienhleih laj laeuz dajgoeng gyanghwnz. Caiq raen bw!”

Ndaw uk gou luenhvaeng’vaeng bae, yaek cam de di gijmaz, de gaenq hwnj laeuz bae ra mbouj raen.

Gou cung roengz laeuz, itloh buet daengz bakdou aen diemq cuengq duzmeuz haenx, docih diendeih, duzmeuz lij youq gizhaenx, de roengzrengz heuh dwk, naemj gou bietdingh dauqma ra de.

Gou umj de ma ranz, yaep he, aen sim gou youh in baez ndeu.

Mbwn rongh le, gou roq aen dou dahniq haenx……

Ngoenzhaenx le, gou guh song faenh hong, banngoenz youq ranz dahniq bang ciuqgoq meuz louzlangh, gyanghaemh sij faenzcieng.

Gou roxnyinh aen sim gou menhmenh an- onj lo.

（2 sat）