“Vei, Vangz saefouh ha?”

“O, Cinz lauxbanj ndei! Haujlai nanz mbouj dwk denva lo, Cinz lauxbanj miz gijmaz gvaqsim?”

“Dwg yienghneix, gou miz song doengh daihlaeuz, hawj Lij saefouh bau doengh ndeu, siengj hawj mwngz bau doengh ndeu, gvethoi hawj mwngz cibbet maenz it bingzfueng, hoi ni dwg moix bau cibroek maenz, itgungh dwg samcib seiq maenz, Vangz saefouh yawj baenz hab guh mbouj hab guh?”

“Hab hab hab, docih Cinz lauxbanj ciuqgoq.”

“Haetcog mwngz couh daeuj yawj dieghong.”

“Ndei ha.”

Caet

Song lauxdoengz caeuq Cinz lauxbanj doxciuz daeuj daengz Namz- ningz, youq Cauzyangz Gvangjcangz dap ci Cinz lauxbanj bae Cinghsiu Gih Suenduzrwi, neix dwg aen siujgih ndeu, dounaj miz diuz lanzganh raez ndeu laengz dwk, miz boux vunzsai hajcib lai bi ndeu daenj cifuz naengh youq henz lanzganh yawj ci haeuj ok.

Cinz lauxbanj hai ci haeujbae, daengx ci le youq siengci baihlaeng dawz sam aen mauh’ancienz, ndenq hawj Lij Danenz caeuq Vangz Gencingh, de swhgeij daenj aen ndeu, youz de daiqroen, song lauxdoengz riengz hangx de.

Geijcib doengh laeuz sang faen baenz sam baiz, ndingqgyang dwg suenva, aeu cienrin caep humx baenz cih “8”, baenz aen baenz aen caezcingj baiz gvaqbae, aen caeuq aen gek song mij bu ciendeih hoengz hawj vunz byaij, vunz youq bangxhenz yawj gak cungj va hailangh hoenghhwd. Henz loh dwg faex go caeuq go doxgek sam mij. Faex ngamq ndaem, cib lai boux vunzhong saimbwk nyaengq dwk aeu faexloz dingj gofaex, faex sang miz sam seiq mij, cib lai duz roeg youq gwnz faex mbin bae mbin dauq angq raixcaix.

Lij Danenz bak lumj roegvenz gangj mbouj dingz mbouj duenh, Cinz lauxbanj gig miznaj, de naemj, miz bouxdaiqdaeuz naengzganq hauhneix, gijmaz hong hojguh guh mbouj baenz? De siengj ra boux vunz miz caiz ndeu guh bangfwngz, deq aen hong neix guh baenz couh cingj Lij Danenz haeuj gunghswh daeuj.（9）