Youq ranghdieg Sihlinz Yen miz diuz dah ndeu, raemx lae riuz- noengnoeng, diuz dah neix heuhguh Dahdozniengz.

Miz goengq bya hung ndeu, lumj duzngwz raezrangh, bomzbax youq henz dah, haenzdah baihnamz miz mbanj ndeu heuhguh Mbanj- douvuengz, aen mbanj couh youq gwnz bya neix. Mbanj neix gvaq dah bae, baihnaj miz go faex ndeu, nga hung mbaw lai. Diuz roen iq ndeu vang gvaq baihlaj, gofaex neix dwg gorungz, gaeu hung gyanz hwnj gofaex neix bae.

Cienznaeuz miz duz ngwz iucing hung ndeu, haethaemh dawz youq baihlaj. Duzngwz ndang heuswdswd, laj ndang miz raizhau, gwnz gyaeuj miz haj diuz geuz nding lumj roujgaeq.

Duzngwz iucing geizheih raix- caix, de doenggvaq ietlinx mup heiq vunz, couh rox bouxlawz dwg vunz bonjdeih, bouxlawz dwg vunz diegrog. Heiq dwg vunz mbanj neix couh mbouj gwn, danghnaeuz dwg vunz diegrog couh okdaeuj gwn, gyan bouxvunz roengz ndaw dungx bae. Vunz bonjdeih gvaqroen, yaek daengz henz gorungz, cungj mbaet geij mbaw faex gangjgve’gve, ndawsim couh mbouj lau, vunz diegrog mbouj rox yienghneix guh, couh deng duzngwz ajbak gwn roengz ndaw dungx bae dai lo.

Miz ngoenz ndeu, boux hagseng youq Bwzswz gaujsi yaek baema ranz, de gyanghaemh youq ndaw congz ninz, faemxfwg loq raen miz boux hagseng najhau ndeu byaij daengz henz congz, doiq de gienq naeuz:“Ngoenzcog mwngz baema ranz le, gvaq laj gorungz Mbanjdouvuengz couh ngaiz duzngwz gwn, hoeng, gou ndaej bang mwngz doh gvaq aen nanh neix. Mwngz dauqbae ra aen moh geq gwnz roen ndeu, de liz aen mbanj song leix gyae, miz doi rin ndeu youq baihnaj moh neix, laj rin miz duzsip iq ndeu, mwngz gaej lau, dwg gou dai bienq baenz duzsip neix, cijaeu mwngz dawz gou hwnjroen, mwngz couh mbouj lau duzngwz gwn lo.”

Gyanghaet, ranz ngamqngamq rongh, boux hagseng fangzhwnz singj daeuj, daengx aen ndang hanh dumz liux. Hoeng, haemhlwenz aen fangz- hwnz lij ndaejgeiq. De bae haw cawx aen rongz ndeu, byaij geij ngoenz roen, de dungxgaet couh gwn gij mak henz roen, hozhawq couh ndoet raemxrij. Daeuj daengz giz moh geq liz mbanj mbouj gyae, caen lumj gij fangzhwnz ityiengh cingqcingq youq gwnz roen. De cacoemj gvaqbae, yungh fwngz gveq doi rin naj moh, yawjraen miz duz sip ndeu bomzbax youq gizde， raez yaek miz sam cik，gvangq ca mbouj geijlai fajfwngz ndeu. Duzsip raen de, lumj caj de coemj aeu nei, hozunq raixcaix, menhmenh gag bin roengz ndaw rongz bae. Boux hagseng byaij daengz henz gorungz, gwnz mbwn faemxfwg bienq laep, miz geij raq rumz hung ci daeuj, ndang nit liux, congz nyaj ngauzngengngeng, duzsip iq youq ndaw rongz baihlaeng cukcak mbouj dingz, gip raixcaix. Miz song diuz rongh hoengz gaenriengz boux hagseng neix. Boux hagseng giux gyaeuj yawj bae, youq laj gorungz miz duz ngwz ndeu hung lumj ndaek saeu. Boux hagseng coemj haeuj ndaw byozrum bae, cacoemj hai dou rongz. Duzngwz iet hoz bongh gvaqdaeuj, duzsip lumj fag mid ityiengh cung ok bakdou rongz, dap youq gwnz hoz duzngwz, duzngwz youq baihnaj boux hagseng laemxroengz, in dwk ringx bae ringx dauq, byozrum laemx liux, gofaex raek liux, duzngwz hung caeuq duzsip iq fanndungndung ringx bae daengz henz dah lajbya, mbouj geijlai nanz, song duz cungj dengsieng naek goenqcaw dai henzde lo. Boux hagseng lau mbouj gamj doengh, maeuq youq laj gorungz haemh ndeu cij baema ranz.

Gvaq ndaej geij ngoenz, boux hagseng yungh geij cieng benj guh aen habfaex ndeu, cuengq duzsip iq haeuj ndaw habfaex bae, haem youq goek gorungz.

Daj baezde gvaqlaeng, couh mbouj miz duzngwz iucing daeuj sienghaih vunz lo.