Sinhvazse Baekging 12 nyied 8 hauh dienh Siz Ginbingz dungzci 《Lwnh Dingjmaenh Caeuq Guhndei Aen Cidu Yinzminz Daibyauj Davei》Cunghgung Cunghyangh Dangjsij Caeuq Vwnzyen Yenzgiuyen bien haenx, mboengqneix youz Cunghyangh Vwnzyen Cuzbanjse okbanj, youq daengx guek fathengz.

Bouh saw neix, souaeu 37 bien faenzcieng youqgaenj gvendaengz dingjmaenh caeuq guhndei aen cidu yinzminz daibyauj davei Siz Ginbingz dungzci, ndawde miz mbangj faenzcieng dwg baez nduj goenghai fatbiuj.

Aen cidu yinzminz daibyauj davei dwg aen cwngci cidu gaenbonj guek raeuz, dwg aen cwngci cidu moq daj ndaw diegnamh Cungguek sengmaj okdaeuj, dwg gij cauhguh hungmbwk gwnz lizsij cwngci cidu vunzloih. Cibbet Daih Dangj doxdaeuj, Dangjcunghyangh aeu Siz Ginbingz dungzci guh goek de laebdin gij lizsij fueng’vih moq, cienzmienh gyagiengz dangj lingjdauj hong yinzda, haenqrengz hwngfat daengx aen gocwngz bouxminz minzcuj, gaenxmaenx doicaenh aen dijhi ceihleix guekgya caeuq gij naengzlig ceihleix yendaiva, lai laebndei aen dijhi cidu bouxboux danggya guhcawj, gaen hwnj seizdaih coihgaij fapguek, hai Aen Hoih Hong Yinzda Cunghyangh gwnz lizsij dangj baez nduj, laebcaez aen cidu yinzda cujciz caeuq aen cidu guhhong, hawj hong yinzda aeundaej cingzcik doenghbaez caengz miz gvaq. Siz Ginbingz dungzci daj gizsang canloz dingjmaenh caeuq guhndei dangj lingjdauj、gyamaenh aen cidu sevei cujyi miz daegsaek Cunguek haidin, dingjmaenh aeu Majgwzswh cujyi gihbwnj yenzlij caeuq Cungguek saedsaeh dox giethab、caeuq gij vwnzva ciuhgeq maenhndei Cunghvaz dox giethab, gaemdawz ndei sevei cujyi minzcuj cwngci hwngfat gvilwd, cungjgez caezcienz gij gingniemh saedguh dangj gyagiengz sevei cujyi minzcuj cwngci gensez, laebdaeb doinyoengx aen cidu yinzminz daibyauj davei lijlun caeuq saedguh cauhmoq, daezok baenzroix leixniemh moq ngeixnaemj moq iugouz moq, guhbaenz le gij ngeixnaemj youqgaenj Siz Ginbingz cungjsuhgi gvendaengz dingjmaenh caeuq guhndei aen cidu yinzminz daibyauj davei, vih seizdaih moq roenloh moq dingj ndei、guh ndei、hengz ndei aen cidu yinzminz daibyauj davei gunghawj le gaenbonj ciuqei.