Naengh youq baihnaj dennauj gaenq cukcuk song aen cung lo, hoeng gou cih saw ndeu hix sij mbouj okdaeuj, neix hawj gou nyapnyuk dangqmaz, baez daengz seiz baenzneix, gou cungj ngeiz, gou aiq gaenq sij mbouj ok saek yiengh doxgaiq lo. Aencung venj gwnz ciengz haenx cingq daengz cibngeih diemj, dikdik dakdak gij sing haenx hongz ndaej cingcuj dangqmaz, gou hozgaek raixcaix, iet fwngz bae coh doengh aen hab iq henz dennauj, dajsuenq aeu naed dangz duzdouq hung ndeu daeuj gwn.

Gou hai aen hab, ndawde gingqyienz mbouj miz saek naed dangz, danghnaeuz gou mbouj geiq loek, gaxgonq mbouj geij nanz cij youq gwnzmuengx cawx, ngoenzlwenz ngamq sou ndaej, baenz hab rimrim, gou ngamq gwn naed ndeu, ndaw hab baenzlawz couh mbouj lw saek naed ni.

Bouxlawz? Bouxlawz caeg gij dangz gou gwn?

Gou singjgaeh hwnjdaeuj, nanzdauh miz caeg daeuj ranz gou? Gou yawj seiqhenz, haengjdingh swhgeij gijmaz cungj mbouj ndwi. Saedsaeh dwg, gou mbouj miz gijmaz doxgaiq ndaej ndwi, cawz le gou swhgeij, gou mbouj miz saek yiengh doxgaiq.

Gou naemj yaep ndeu, gietdingh mbouj caiq siengj gienh saeh neix.

Gou gietdingh bae aen diemq bienhleih laj laeuz cawx hab dangz ndeu. Gou vuenh buh hung, daenj haizyindung, byaij roengz laeuz bae.

Doengxhaemh boux byaij roen gig noix, cawzliux boux vih gwndaenj aeu mboujdingz baedauq, couh dwg gij vunz yiengjsouh gwndaenj. Gou mbouj siengj bae naemj gijneix, dan siengj cawx hab dangz ndeu couh ma ranz.

“Mwngz ndei, aeu hab dangzduzdouq hung ndeu”.

“Cibsam maenz.” Boux gai naeuz.

De yawj gou mbat ndeu, saeknaj lumj miz di mbouj doengz.

Gou gik yawj gij saeknaj de, aeu naed dangz ndeu daeuj, bok gij ceij ok couh oet haeuj ndaw bak bae, nu gij ceij baenz ndaek ndeu, vut haeuj ndaw doengjnyapnyaj bae.

“Vuenh lauxbanj la? ” Gou cam de, lumjnaeuz mbouj dwg lauxbanj mwhgonq.

Mbouj, gou youq neix dajgoeng hwnz ne.

De gangj vah ngamq liux, gou couh liz aen diemq bienhleih, cigsoh byaij ma ranz.

Haj bi gonq, gou gip duz meuz louzlangh ndeu, bungz daengz duzde seiz, de iq lumj nou nei, byombyangbyang, cingq youq doi nyapnyaj ndawde ra gwn, yienghneix gou couh daiq de ma ranz.

Mbouj geij nanz, meuz baenz cungj bingh gvaiq ndeu, banngoenz banhaemh cungj hemq, gou umj de bae hawj canghyw yawj, canghyw bang gou suenq bit soq ndeu, naeuz cienz genjcaz caeuq cienz yw gya hwnjdaeuj yaek baenz fanh maenz. Doiq gou daeuj gangj, mbouj yungh ngeiz dwg gwnz nae gya mwi, gaej gangj baenz fanh, couh suenq geij bak maenz ndaej hawj duzmeuz an’onj dai bae, gou cungj dawz mbouj okdaeuj.

Gou umj de ma ranz, gyanghwnz de heuh dai heuh lix, hemq dwk gou ninz mbouj ndaek, gou ngeix, de itdingh gig in ba.

Gou dingzdingz duenhduenh fangzhwnz, ndaw loqfangzhwnz, gou lumj dingqnyi miz sing ndeu naeuz: “De baenzneix in, ndaej mbouj heuh ha?”

Haemh ndeu gou cungj ninz mbouj onj, duzmeuz hawj gou simnyap, dwg ha, gou lumj cingq naemj swhgeij ninz mbouj ndaej ndei nei. Yienghneix, swnh mbwn lij caengz rongh, gou youh got duzmeuz bae yihyen, youq henz duzde louz hab haeuxmeuz caeuq vanj raemx ndeu roengzdaeuj.

Baezneix mbouj dwg vihliux yw de.

Ngoenzlwenz gyanghwnz haj diemj cung baedauq, gwnz mbwn lij miz geij aen ndaundeiq loq ndaep loq rongh. Gou cuengq duzmeuz youq gwnz namh bakdou cungjvuz yihyen, de song da mbouj yaep dwk yawj gou, beng aen conghhoz daeuj heuh gou, “Meu…… Meu…… Meu……” Yied hemq yied rengz, gou baez yamq baez yamq lizhai de, de couh baez vej baez vej gyaep daeuj gaen. Gou youh umj de baema, de youh gyaep hwnjdaeuj.

Lienzdaemh geij baez, doeklaeng de bibuengq saxsax youq gwnz namh……Couhcinj dwg youq laj lohdaeng laepamq, gou ciuqyiengh ndaej yawjraen gij raemxda de menhmenh lae okdaeuj.

Lauheiq aen sim de gaenq dai lo, gwnz seiqgyaiq gijmaz saeh cungj lau deng faemxfwg vut bae, hozgvang de dwg duzmeuz deng vut bae song baez haenx.

Gou daj gwnz ndang de senj deuz, vaiq yamq okbae, doeklaeng de mbouj caiq gyaep hwnjdaeuj lo.

Gou soeng gaemz heiq ndeu.

Mizseiz boux canghyw simndei dawz de bae yw, mizseiz canghyw raen de hojlienz hawj de gwn di yw dai sim’angq, mizseiz aiq bungz daengz boux simndei soengq de bae cungjvuz yihyen yw……Mboujguenj dwg cungj lawz, cungj beij caj youq henz gou ak. Gou yienghneix vih swhgeij haiduet, mienx ndaej liengzsim daegdangq mbouj bae.

Dauq daengz ranz, yawj aen dennauj hai haenx, lij dwg sij mbouj ok gijmaz doxgaiq daeuj, gou nyapnyuk raixcaix, gietdingh roengz laeuz sanqsim, yienznaeuz dwg codoeng, hoeng raq rumz liengz ndeu ci daeuj, gou roxnyinh miz di nit, youh dauq ndaw ranz daiq aen mauh ndeu, ok dou bae lo.

Youq baklae, din gou bungz raen le gaiq doxgaiq unq ndeu, hwk gou doeksaet baez ndeu, gou lienzmuengz hai aen daeng baklae, dwg dah lwgnyez iq ndeu, daenj buhvaq mbang ndeu, saenzdedded yawj gou.

Gou gaenq mbouj bae eiq bouxwnq gamjsouh lo, gangj sing ndeu, doiq mbouj hwnj, couh dajsuenq byaij deuz.

“Daeggo, gou nit lai, ndaej bae ranz mwngz naenghnaengh yaep ndeu lwi?”

Gou mbouj siengj caeuq vunz lai gangj vah, cingq yaek doi, hoeng mbouj rox vih gijmaz, gou roxnyinh lwgda de caensug dangqmaz, hawj gou nanz hai bak, gangj mbouj ok.

“Daxboh daxmeh mwngz ne?”

“Gou mbouj miz bohmeh, daeggo youq gyanghwnz hwnjban, gou lumz daiq yaekseiz lo.”

Gou sim’unq lo, hai dou hawj de haeuj ranz bae, de cix byaij gonq gou haeuj ranz bae, hai aen beiz denfungh ci raeuj, gip hwnj geu buh gou luenh ndek ndaw sahfaz haenx, yawj gij yiengh de sug lumj boux ndaw ranz nei.

Gou yawj de mbat ndeu, gig geizheih.

“Gou ninz gizneix lwi? ” De vix coh sahfaz.

Gou naeuz：“mwngz mbouj bae swiq raemxndat lwi?”

“Mbouj lo, gou mbouj maij swiq ndang.”

Yienghneix gou laebdaeb bae sij sawcuenh, de ninz youq gwnz sahfaz gig vaiq couh ninz ndaek lo, gij yiengh geizheih de lumj duzmeuz ndeu.

Yawj gij yiengh ninz ndaek de, gou miz gij lingzganj sij doxgaiq lo, cigdaengz gyanghwnz, cij siengj hwnj de. Gou byaij daengz henz ndang de, vih de goemq denz, hoeng ndaw conghhoz de fat ok gij sing haenx haep gou doeksaet. “Gulu gulu gulu……” “Gulu gulu……” Gij sing neix dwg sing doenghduz daegbied dwg doenghduz iq haenx.

De doeksaet singj lo, yawj gou baez he, iet hwet, lumj duz meuz ndeu.

“Haemh lai lo, mwngz baema ba.” Gou ceij aen cung venj youq gwnz ciengz naeuz.

De ngawh dwk yawj gou naeuz: “Gou ndaej mbouj ndaej mbouj baema? Ndaw ranz gou nit, haemhneix daeggo gou mbouj dauqma.”

“Mbouj ndaej lo!”Gou doiq de naeuz.

（1）