Sou raen gvej gvaq ma? Raen gvaq. Dwg mbouj dwg de cungj maij heuh gva gva gva, cauz yaek dai? Dwg ba? Hai! Couhdwg aenvih yienghneix, doenghbaez de deng duz gungqsou loengh gvaq baez ndeu, gwn gvaq baez vi hung ndeu.

Vihmaz duz gungqsou aeu loengh duzgvej ne? Couhdwg aenvih duz gungqsou bonjfaenh maij heuh go go go, de nyinhnaeuz duzgvej baez heuh, couh hawj gij sing de heuh haenx lumj iq di ndeu, hawj daihgya mbouj dawz de haeujsim. Duz gungqsou nyinhnaeuz gij sing de heuh dwg sing go ndeidingq lai, ndigah de mbouj maij miz gij sing wnq daeuj gauxca de, ndigah de mbouj maij duzgvej heuh gva gva gva. Duzgvej baez heuh, duz gungqsou couh ndaq: Nanz dingq nanz henx, cauz hawj vunz yaek dai!

Doeklaeng, duz gungqsou couh siengj ok aen banhfap ndeu daeuj haep duzgvej, hawj de mbouj gamj heuh. Gou ndaejgeiq dwg yienghneix.

Miz baez ndeu, duzgvej naengh youq gwnz ndaek rinsa nding henz dah heuh gva gva gva, duz gungqsou couh byaij gvaqdaeuj doiq de naeuz: Gaej heuh lo! Gou dingqnyi miz vunz daeuj lo.

Aen mbei duzgvej iq lai, de youh caengz raen vunz gvaq, mbouj rox vunz daeuj le yaek doiq de guh gijmaz, doq mbouj gamj heuh lo. De yaeng’yaeng cam duz gungqsou naeuz: Vunz dwg gijmaz? Gou dan dingqgangj duz neix maj ndaej youh sang youh hung, gvai dangqmaz. De daeuj le yaek doiq raeuz guh gijmaz ne?

Duz gungqsou raen de lau, couh daegdaengq haep de naeuz: Aensingq vunz vaih lai, yak dangqmaz! Gyoengqde baez yawjraen raeuz, hw! Haenx couh mbouj baenz lo! Dingq! De gaenq daeuj lo, raeuz bae ndoj vaiq di.

Gizsaed mwhhaenx gaenbonj mbouj miz maz vunz daeuj, hix mbouj miz sing maz. Duzgvej mbei iq baez dingq duz gungqsou hemq, doq diuq roengz goenjrin, ndoj haeuj laj rin bae lo. Duz gungqsou lij ndwn youq gwnz rin mbouj sangj, de raen mizyinx dangqmaz, miz di naemj riu.

Gvaq ndaej yaep ndeu, duz gungqsou naeuz: Ndaej lo, vunz deuz lo, baezlaeng mwngz gaej hemq lo, mwngz baez hemq vunz couh yaek daeuj.

Duzgvej lij mbouj gamj okdaeuj, dan yaeng- yaeng cam: Vunz deuz la? Mwngz gangj, vunz baez yawjraen raeuz, de yaek baenzlawz guh? Duz gungqsou naeuz: De couh yaek gaemh raeuz bae.

Gvaqlaeng ne?

Gvaqlaeng de couh cug raeuz haeuj, hawj raeuz gyaeuj hoij dauq laj.

Duzgvej lau dwk hemq ok sing ndeu: Aiya!

Duz gungqsou raen de lau, couh engqgya haep de naeuz: Hoij hwnj caengz suenq maz, de lij aeu diuz faex youh hung youh co ndeu moeb mwngz, mbat haj mbat cib, haenqrengz moeb, moeb hawj mwngz daengx ndang cungj gawh liux, de lij caengz daengx, mwngz couhdwg daej dwk saihoz gat de hix mbouj daengx.

Duzgvej lau lai lo, engq mbouj gamj daj laj rin diuq okdaeuj, naeuz: Miz cungj saeh baenzneix dwglau ha? Baenzlawz guh cij ndaej?

Baenzlawz guh? Mwngz gaej hemq gva gva gva, ra dieg ndei ndeu ndoj youq couh ndaej lo.

Duz gungqsou gangj daengz gizneix, daekeiq dangqmaz, couh hemq ok geij sing gva gva gva.

Duzgvej raen de mbouj lau, couh cam: Vihmaz mwngz mbouj lau vunz ne?

Duz gungqsou ndaenggon naeuz: Gou gijmaz cungj mbouj lau, aenvih bouxlawz hix mbouj gamj daeuj gaemh gou. Yiengh gou maj ndaej yak dangqmaz, vunz rox gou ak; caemhcaiq gwnz ndang gou miz cungj heiqhaeu daegbied ndeu, gyoengqde nyouq daengz couh yaek buet.

Duzgvej gyangz gaemz heiq ndeu naeuz: Hojsik gou mbouj maj baenz gij yiengh lumj mwngz, gwnz ndang hix mbouj haeu.

Sou raen duz gungqsou gvaq ma? Gwnz laeng de dwg mbouj dwg hwnj nwnj rim liux, caemhcaiq dwg saekhenj? Gwnz ndang de dwg mbouj dwg miz cungj heiqhaeu daegbied ndeu? Gij saek heuheu duzgvej haenx dwg mbouj dwg ndeiyawj gvaq de haujlai? Geij coenz vah de neix dauq dwg vah caen.

Duz gungqsou haep hawj duzgvej mbouj gamj hemq lo, de couh gag byaij bae ranz hemq go go go lo. Neix raeuz couh mbouj guenj lo, gvaqlaeng raeuz cienmonz gangj aen goj duzgvej mbei iq.

Dangyienz lo, duzgvej lau lai, doenghbaez de caengz dingq gangj gvaq vunz dwg baenzneix yak, hix mbouj rox gijmaz saeh dwglau. Seizneix, duz gungqsou gangj gvaq le, de couh cungj dwg siengj daengz gij vunz dwglau, doeklaeng de lij siengj daengz haujlai saehcingz dwglau wnq dem, lai dwk gou cungj loengh mbouj cingcuj haenx dauqdaej dwg di gijmaz saehcingz, gou dan rox de dwglau dwk lienz nyungz cungj mbouj gamj gwn lo.

Duzgvej siengj hwnj gij vah duz gungqsou le, couh siengj ra giz dieg ndei ndeu ndoj youq.

De roxnyinh ndoj youq ndaw raemx ceiq ndei. Hoeng de miz bwt, aeu diemheiq, mbouj ndaej lumj bya nei cungj dwg youq ndaw raemx, ndigah de mbouj ndaej seizbienh diuq roengz raemx bae.

（Yenz Vwnzcingj raiz Cwz Fanghdingz hoiz）