Ngoenzneix dwg ngoenz singhgiz, rog ranz fwn moenqfefe, daxboh boux ndeu naengh gwnz sahfaz yawj bauqceij.

Daeglwg raen youq ranz mbwq lai, liux le buet daengz henz ndang daxboh, siujsim riri cam:“Daxboh, gou ndaej caemz vanzgi ciiq yaep ndeu lwi?”Seizneix daxboh naj haenyauyau, da- caengz de, lienz bwnda cungj daengj hwnjdaeuj, baet fwngz sing mbwk hemq:“Mbouj ndaej!”Song aen swz genjdanh neix, sing hung miz rengz. Daeglwg bonjlaiz couh mbeisiuj haenx seizneix engq dwglau lo. Daeglwg raen utheiq lai, raemxda rihbyoegbyoeg roengzdaeuj.

Daxboh raen daeglwg daej, maenjhaeng- haeng, ndang youh ngeng coh mbiengj daeglwg, song da cim daeglwg cadcad, yakriri naeuz:“Couh suenq mwngz daej, gou hix mbouj hawj vanzgi hawj mwngz.”Dingqnyi vah daxboh, daeglwg daej engq siengsim lo.

Aiq dwg sing daej nyauxcauz le daxboh yawj bauqceij, daxboh doeksat dawz ciiq ndenq hawj daeglwg. Daeglwg yienznaeuz gwnz naj lij miz raemxda, hoeng ndaej dawz vanzgi le de angq dangqmaz.

Seizneix，daxboh hwnq ndang byaij daengz baihnaj aengingq, yawjyawj gij yienghceij yakriri swhgeij, gag dawz diuz bienduk fad swhgeij, gig yiemzhaenq gag ndaq naeuz:“Gou deng ndeindei naemjngeix gij coenzvah caeuq guhfap swhgeij baez ndeu, aeu guh boux boh hozunq gyaez lwg ndeu!”

(Lingz Hinghningz hoiz)