Gaenh geij bi daeuj, Dwzbauj Yen genhciz aeu aen swhsiengj youqgaenj Siz Ginbingz cungjsuhgi gvendaengz gyagiengz caeuq gaijndei hong minzcuz guh cijdauj, gaenx- maenx cauhmoq loh moq、 banhfap moq hong minzcuz, doenggvaq byaij ndei “canjnieb miz daegsaek、doxgap doxbang、 lijyouz ak yienh” sam diuz loh, maenhsaed doicaenh gak cuz ginzcung caezcaemh fouqmiz, doi- doengh gak cuz ginzcung caezcaemh byaij coh sevei cujyi yendaiva.

It dwg byaij ndei diuz loh canjnieb miz daegsaek. Laebdin swhyenz miz daegsaek, cimmaenh hawciengz aeuyungh, genhciz okrengz cingcinj, gaenxmaenx diuzcingj gezgou dajndaem, haenqrengz hwngfat gijndei canjnieb miz daegsaek, aeu ndaem oij、 batgak guh daeuz, gaenxmaenx damqra gij vunqsik swnghcanj ginghyingz “hozcozse + giyez + nungzhoh”, daiqdoengh youz- caz、bwzyanghgoj daengj canjnieb demsou, roengzrengz guh ak guh hung “canjnieb van”.

Ngeih dwg byaij ndei loh doxgap doxbang. Dakbaengh hong dingh- diemj bangfuz Guekgya Minzveij, bi- neix gungh ceng’aeu ndaej ngaenz hwngfat siujsoq minzcuz 1186 fanh maenz, gungh guh suen guhyiengh bwzyanghgoj miz daegsaek、 hangh- moeg doxgap ndaem bwzyanghgoj caeuq duhhenj daengj cib aen cunh cizdij ginghci hanghmoeg, coengh- rengz Dwzbauj cujdauj canjnieb miz daegsaek daezdangj swnggaep, doi- doengh it ngeih sam canjnieb yungz- hab hwngfat. Cungfaen fatok Sinhcin Si Bingzsanh Gih gijndei swhyenz, doenggvaq hanghmoeg doxbang“gou youq Dwzbauj miz aen suen ndeu”, hopheux moundaem Dwzbauj、 bwz- yanghgoj、 oij daengj cunh cizdij ginghci hanghmoeg bae guh “suen” hwnqguh, haenqrengz hwngfat gij canjnieb miz daegsaek.

Sam dwg byaij ndei loh lijyouz ak yienh. Dakbaengh gij swhyenz lijyouz lai caeuq seiqhenz swnghdai ndei, cauh baenz Dieg Baeyouz Yawj Maxdaemq Dwzbauj Yen、 Gamj- gizsingh、 Aen Gunghyenz Ndoengfaex Mbawnding、 Fanghsanh Vwnzdij Gunghyenz daengj guekgya AAAA gaep dieg baeyouz, doenggvaq guh ndwen lijyouz Dwzbauj yawj maxdaemq goraeu mbawnding、 “dieg baeyouz ceiq ciuzlouz” yinxdaeuz cawjdaez hozdung daengj, youq gak dieg baeyouz guh ciengq go cauhnduj、 haw doxgaiq guhcaemz ciuzlouz、 gizdieg yawj goraeu daengj hajcib lai ciengz hozdung, miz fanh lai vunz daeuj lijyouz， cungfaen baijok gij gingjsaek swyienz ndei caeuq gij yienghndei yinzvwnz， doidoengh Dwzbauj lijyouzyez hwngfat youh ndei youh vaiq.

（Vangz Yenyaz）