Sinhvazse Sanhya 11 nyied 30 hauh dienh Gaiq Daih Cibngeih Daengx Guek Siujsoq Minzcuz Conz- dungj Dijyuz Yindungvei 11 nyied 30 hauh youq Haijnanz Swngj Sanhya Si hai sat. Gozvu veijyenz Cinz Yizginz camgya bimusiz caemhcaiq senhbu yindungvei hai sat.

20 diemj, Gaiq Daih Cibngeih Daengx Guek Siujsoq Minzcuz Conz- dungj Dijyuz Yindungvei bimusiz youq Sanhya Si Dijyuz Cunghsinh guh. Gak cuz yindungyenz、gyaulenyenz caeuq hekgviq daj daengx guek gak dieg daeuj haenx, caezcaemh angqhoh gaiq yindungvei neix hai ndaej baenz. Bimusiz youz Cunghyangh Dungj- canbu fubucangj、Guekgya Minzveij cujyin Banh Yoz cujciz, Guekgya Dijyuz Cungjgiz gizcangj Gauh Cidanh youq gwnz bimusiz gangjvah.

Gak doih daibyauj haeujciengz le, aen hoih doeg le gij mingzdan doih daibyauj ndaej “dijyuz daudwz funghsangciengj” Gaiq Daih Cibngeih Daengx Guek Siujsoq Minzcuz Conz- dungj Dijyuz Yindungvei. 56 aen minzcuz boux daibyauj soengq va hawj boux daibyauj bouxgagnyienh dwgrengz fugsaeh yindungvei haenx.

Gwnz bimusiz lij guh aen yizsiz gyauciep hoihgeiz Daengx Guek Siujsoq Minzcuz Conzdungj Dijyuz Yindungvei. Gaiq Daih Cibsam Daengx Guek Siujsoq Minzcuz Conzdungj Dijyuz Yindungvei yaek youq 2027 nienz youq Huznanz Swngj guh. Riengzlaeng yienjheiq, cawjdaez dwg “caezhwnq aen suenranz cing- saenz”.

Gaiq yindungvei neix gungh miz daengx guek gak swngj(swcigih、cizyazsi)、Sinhgyangh Swnghcanj Gensez Binghdonz、Yanghgangj、Aumwnz doih daibyauj caeuq Daizvanh siujsoq minzcuz doih daibyauj 6960 boux yindungyenz, camgya le 18 aen doxdax hanghmoeg caeuq 3 loih biujyienj hangh- moeg(ndawde hanghmoeg gwihmax youq 7 nyied 8 hauh daengz 13 hauh youq Sinhgyangh Cauhsuh guh), aen cunghhozsing dujyiz doxdax neix baez nduj gak digih miz doih daibyauj daeuj camgya caez.

Mboengq yindungvei, lij guh yawjngonz gaujcaz, guh minzcuz daihlienzvuen hozdung, guh Cungguek Siujsoq Minzcuz Conzdungj Dijyuz Vwnzvacanj、Haijnanz Cienzmienh Haeujlaeg Gaijgwz Hailangh Caeuq Cungguek Daegsaek Swyouz Mou- yizgangj Gensez Cwngzgojcanj daengj dem.