Mbanjranz gou miz aen mboq hung ndeu, hwnzngoenz mbouj dingz mbouj duenh lae bae coh baihbaek. Raemxmboq sawdikdik, yawj ndaej raen daengz gij rinreq daej raemx, ndaw raemx byalwg youz nyauhlwg saet.

Vunzmbanj caeuq doihduz cungj baengh aen mboq neix gwnraemx. Mwhhaenx, baez daengz haemh guhhong ma ranz, bouxlaux cungj rap doengj daengz henz mboq rap raemx, boux bae boux dauq, raemx ndik gwnz roen baenz diuz sai raemx ndeu, lwgnyez bae henz mboq swiq byaek, guhcaemz.

Mboq seiqhenz cungj dwg naz, seizcin, hai da yawj bae, langhheu fan hwnj fan roengz; seizcou, doenghnaz henj lumj gim, sim vunz cungj hailangh. Gij naz neix cungj baengh aen mboq neix aeu raemx cij ndaej ndaem ndai.

Mwhhaenx, gyoengqvunz mboujlwnh bae haw bae mbanj, mbouj dwg byaij loh couh dwg gwih danci, youq gwnz goengloh baebae dauqdauq, nauhyied raixcaix.

Seizhwngq, gyoengqvunz byaij loh roxnaeuz gwih danci daengz henz mboq, cungj dingz roengzdaeuj, angqfwngfwng daengz henz mboq swiq naj swiq fwngz, swiq cingh gij hanh caeuq faenx gwnz naj, swiq cingh gij baeg gwnz ndang.

Hozhawq le, aeu fwngz gop raemx couh ndoet, liengz daengz hoz daengz saej, diemz daengz ndang daengz sim.

Mbanjneix mboqraemx ndei,

Meiz(miz) lwgsau couh haq,

Lwgsai yaek aeu yah,

Haq daeuj neix mbouj yaez.

Gyoengqvunz gangjgoj eu fwen, bouxboux danqhaenh.

Lajmbanj, bouxlaux guh hong naek, lwgnyez guh hong mbaeu, gou ciengzciengz bae henz mboq saeg buh roxnaeuz swiq byaek. Ndaw ranz ciengx miz geij duz hanq, gou ciengzciengz gaem diuz bien raezrangrang ndeu, laeh hanq bae henz mboq langh.

Henz goengloh miz diuz mieng iq ndeu, ndaw mieng raemx lae, nywj heu, caj gyoengq hanq gwn nywj imq le, gou youh laeh gyoengqde daengz henz mboq bae, hawj gyoengqde caemxndang doxgyaep guh’angq, roxnaeuz soeg gwn gij gomez caeuq gij byaek geq bouxwnq mbouj aeu haenx.

Hanq raen raemx couh angq, duz gaen duz caemz raemx bae lo, gou mizseiz biet gavaq hwnjdaeuj, roengz raemx bae gaeb nyauh iq bya iq; mizseiz dinghdingh naengh youq gwnz rin hung saeg buh haenx, cuengq song cik din roengz raemx bae, nyaemh gij raemxmboq sawdikdik yaengyaeng lae gvaq lajdin, lienzdoengz gij siengjmuengh ndawsim, caez lae bae coh gizgyae……

Mbanjranz miz aen mboq yienghneix dwg ndei, hoeng mboq liz ranz mizdi gyae, gyoengqvunz lij aeu rap raemx ma ranz cij ndaej cawjgwn. Ngoenznaengz daengx ranz laux nyaeq cawjgwn、 caemxndang、 cawj mokmou, gueng bit gaeq gueng cwz vaiz, cungj aeu yungh haujlai raemx. Gyoengq bouxlaux doengx ngoenz guh reihnaz, daengz haemh guhhong ma ranz, rubrab ndoet geij gaemz souh haeuxyangz, lij caengz ndaej yietnaiq, couh deng rap doengj bae henz mboq rap raemx, sinhoj raixcaix.

Miz vunz naemj：Mbanj raeuz yaek gwnraemx mbouj hoj, aeu baenzlawz yinx raemx daengz ranz cij ndaej. Hoeng aen mboq beij aen mbanj daemq haujlai, nanz yinx raemx daengz ranz.

Miz vunz youh naemj daengz: Baihdoeng ndaw lueg miz aen mboq iq ndeu, mboujyawx aeu guenjgau bae ciep raemx haeuj ranz.

Gyoengqvunz doxyaeng daj gyawz vat mieng haem guenj le, couh nyaengqnyaennyaen guhhong lo. Miz mbangj muengz bae ndaw lueg vat laeg vat gvangq aen mboq iq de, aeu suijniz dauj maenh hoh ndei; miz mbangj bae haw cawx guenjgau、 sienqdiet caeuq suijlungzdouz; miz mbangj vid gen gaem gvak gaem canj vat namh haem guenj. Daihgya cungj angqfwngfwng naeuz:“Baezneix raeuz miz swlaizsuij lo, mbouj yungh bae henz mboq rap raemx gwn lo.”

Vunz lai rengz hung, mbouj geijlai nanz, gyoengqvunz yinx raemx daengz ranz lo, guhhong mbwn laep haeuj ranz, mbouj caiq yousim bae rap raemx cij ndaej cawjgwn, bouxboux simhai.

Angq mbouj ndaej geijlai nanz, couh miz haujlai saeh daeuj lo. Ndaw lueg aen mboq iq haenx ok raemx mbouj lai, gak ranz ngoenznaengz yungh raemx lai, cungj mbouj gaeuq yungh, seiz mbouj seiz cix mbouj miz raemx daeuj. Noix can ngaiz ndeu mbouj gwn lij ndaej, hoeng mbouj miz raemx cix yienghyiengh guh mbouj baenz, doengxhaet hwnq- congz yaek catheuj swiqnaj, baez yawj gang, hawqhanghang mbouj miz saek ndik raemx; mizseiz guhhong dauq ranz, yaek daek raemx swiq fwngz gwn souh, baez nuj suijlungzdouz mbouj raen raemx ok, hix dwg dwgrengz, youh ra doengj bae rap raemx.

Nanz mbouj miz raemx lae, guenj deng ndit dak, miz mbangj dek lo, mboq ndaw lueg caiq miz raemx hix lae mbouj daeuj.

Lajmbanj hong lai hong cab, gyoengqvunz cijndei doxlwnz bae coih guenj, baezneix guenj dek sou geij boux bae coih, baezlaeng dek, dou geij boux bae coih.

Gyoengqvunz gaem fag gvak fag canj, ei loh bae ra giz laeuh raemx, giz guenj dek lai, raemx lae okdaeuj foedfoed, ra raen yungzheih, mbouj sai geijlai seizgan couh coih ndaej lo. Giz guenj dek mbouj lai, mbouj sijsaeq cazyawj caen yawj mbouj ok. Raen duenh loh lawz namh mbaeqsubsub, lajde itdingh laeuh raemx. Gyoengqvunz nyaengq baenz buenqngoenz, cij coih ndei gij guenj dek haenx.

Guenj seizseiz vaih, seizseiz haeuj lueg bae coih, seiz hong soeng mbouj mizmaz, daengz seiz hong nyaengq, dajsou youh dajndaem, haeuj ranz raen mbouj miz raemx, miz souh cungj mbouj nyienh gwn, youh doxiu bae coih guenj lo. Nanz le, gyoengqvunz nyinhnaeuz yienghneix guh bae guh dauq faeqheiq raixcaix, cungj gik bae coih guenj lo.

Seizneix, youh miz vunz naeuz:“Raemx ndaw ndoi gwn mbouj baenz, raeuz lingh naemj banhfap, mboujyawx youq ndaw mbanj vat aen cingj hung ndeu, aeu dienh caeu raemx gwn.”

Boux ndeu naeuz, bak boux riengz, daihgya cungj naeuz couh yienghneix guh. Gangj daengz couh guh, gyoengqvunz youh muengz youq gyang mbanj vat cingj.

Mbouj nanz, aen cingj hung ndeu vat baenz lo, gyoengqvunz nyaengqnyaennyaen bae cawx den- dunggih、 densen, ciep raemx haeuj ranz. Guenjdiet bengz lai, gyoengqvunz couh cawx guenjgau daeuj haem lajnamh.

Raemx daengz ranz lo, yungh dienh caeu raemx yienznaeuz moix ndwen bae di ngaenzdienh, hoeng mbouj caiq yousim raemx gwn, bae reih guhhong haeuj ranz couh ndaej swiq fwngz cawjgwn, fuengbienh.

Cungj naeuz raemx yiengq giz daemq lae, vunz yiengq giz sang byaij, daj guekgya naeuz hawj gij ranzgaeuq lajmbanj gaijcauh boujdiep le, gyoengq vunzmbanj cungj doemq ranzvax naeuh bae, hwnj haujlai ranzlaeuz moq. Guh ranzlaeuz moq aeu cihung daeh rinsa, daeh cienndaek daeh ganghginh caeuq suijniz, aen ci doz naek lai, at vaih lohnamh, gij guenjgau haem lajnamh yinxraemx haeuj ranz haenx, cungj deng at vaih lo, gyoengqvunz youh seiz mbouj seiz vat loh coih guenj.

Doeklaeng, cwngfuj hawj suijniz youq ndaw mbanj guh loh gvangq, cihung haeuj ok cij at mbouj daengz gij guenj haem lajnamh, hoeng gij guenjgau yungh nanz le, yungzheih gag dek, dek le couh laeuh raemx, nyaemh mwngz baenzlawz loengh, cungj caeu mbouj hwnj raemx. Cwngfuj bang ndawmbanj guh diuz loh baenzlai ndei, gij guenjraemx haem lajnamh haenx dek laeuh raemx le, caiq mbouj ndaej vat loh coih guenj lo. Naemj daengz gaxgonq byaij gij lohnamh haenx, ngoenzrengx faenx mbin doh mbwn, ngoenzfwn laux nyaeq okdou cungj deng daenj haizraemx, mboujnex raemxboengz fid ndang raizsoedsoed, henjlamlam. Seizneix diuz loh suijniz ndeindumndum, wenqgywggywg, couh suenq guenj vaih, raemx mbouj daengz ranz, gyoengqvunz hix mbouj nyienh loengh vaih diuz loh neix.

Vih miz raemx gwn, vunzmbanj sieng ukgyaeuj, sai goengrengz, lae lwedhanh, miz geijlai sinhoj, vunzmbanj couh cimz gvaq geijlai sinhoj.

Mbouj geijlai nanz, dingq vunz naeuz, cwngfuj yaek guh swlaizsuij daengz mbanj daengz ranz lo.

“Vah dwg yienghneix gangj, mbouj rox dwg caen dwg gyaj.”

“Guekgya gangj vah suenq vah, seizlawz gangj ndwi gvaq.”

“Danghnaeuz caen ndaej guh swlaizsuij daengz ranz couh ndei lo, raeuz lwglwg lanlan mbouj caiq you gwn raemx.”

……

Bakmbanj、 laj gorungz hung、henz mboq, gyoengqvunz mwngz coenz gou coenz, lwnhfoenfoen.

Ngoenzhaenx, geij aen ci doz haujlai doxgaiq hai haeuj mbanj daeuj. Cunh ganbu saet roengz ci daeuj, riu naeuz:“Gyoengq beixnuengx, ngoenzneix daeuj mbanj sou ciep swlaizsuij lo!”

Gyoengqvunz doeksaet dwk cengq hung lwgda, yaepyet couh singjsad gvaqdaeuj, caez bekfwngz angq naeuz: “Mbatneix, raeuz caen mbouj you gwn raemx lo!”

Miz cwngfuj cengqhwet, gyoengqvunz angq- fwngfwng doenghfwngz guhhong, gyoengqde sien hawj gak ranz gak hoh daz guenjdiet, youq goengq bya daemq laeng mbanj guh aen dap hungloet cang raemx ndeu, caiq daj aen mboq hung henz goengloh yinx raemxmboq hwnj aen dapraemx bae, yienz- haeuh caiq hai raemx roengz bya, gij raemxmboq couh daj ndaw guenjdiet lae haeuj gak ranz gak hoh. Vunzmbanj eu fwen naeuz:

Seizneix seizdaih moq,

Raemx mboq lae daengz ranz,

Saedceij beij dangz van(diemz),

Lwglan fuk fanhdaih.