Yencangj gwn caeuz sat le daengz yangzdaiz cit ien.

Dahlwg riunyumnyum byaij daeuj coh de.

“Boh, lwnh mwngz gienh saeh ndeu.”

“Maz saeh? Naeuz vei.”

“Danhvei dou miz dah daihhagseng ndeu, ngamq daeuj ndaej sam ndwen, benhci de youq ndaw gizgihgvanh, faenboiq youq yangjhugoh. Youq ndaw ranz laj gunghdiuz hwnjban cwxcaih dangqmaz. Hoeng, de gingqyienz iugouz bae baihlaj yangjhucan guhhong. Mwngz naeuz de vax mbouj?”

“Aiq dwg de mbouj rox gij hong yangjhucan baenzlawz sinhoj nw?”

“De rox ne. De riengz lingjdauj bae gvaq yangjhucan geij baez lo, caenda raen gyoengq cizgungh guhhong, dauqdaeuj de lij doekcaw naeuz, gyoengq gunghyinz yangjhucan baenzngoenz ndit dak fwn rwed, yaengx gvak yaengx canj coih roen coih giuz, hong cungj dwg hong gwnrengz, sinhoj raixcaix. Nanzgvaiq miz vunz riu naeuz hong yangjhucan dwg ‘coih digiuz’, gyoengq cizgungh yangjhucan dwg boux ‘ngeihdaih nungzminz’. De gig hojlienz gyoengqde nw.”

“Aiq dwg de roxnyinh geizheih ba. Geijlai vunz cien fueng bak geiq siengj caenx haeuj ndaw gizgihgvanh bae, de cix fan dauq byaij.”

“De naeuz youq ndaw gihgvanh hag mbouj ndaej maz, siengj bae gihcwngz hag di doxgaiq saedcaih he. ”

“Seizneix heuh gyoengq bouxcoz roengzmbanj, dingzlai vunz sim mbouj sangj, doi sam doi seiq. Dah neix caeuq bouxwnq mbouj doengz ni.”

“De naeuz youq gihgvanh hwnjban, ndei dwg ndei, hoeng, gij yezvu cungj dwg hamxhawz. Moix baez roengz yangjhucan bae niemhsou, mbouj rox daj gizlawz roengzfwngz, ndigah siengj bae gih- cwngz hagsib.”

“Dahsau neix dwggyaez lai lo, iugouz baenaj, bae gihcwngz lienh dwg saehndei, cingsaenz de dijbauj, wnggai ndaej haenh, raeuz aeu cihciz de.”

“Deng, raeuz wnggai cihciz de. Gou nyinhnaeuz ceiq wnggai haenh daxboh de. Aenvih daxboh de gig cihciz de.”

“O! Daxboh de caen hungmbwk! Daxboh de dwg byawz?”

“Dwg mwngz ya!”

“Maz?” Yencangj bak ajroengroeng, yaepyet le swenj：“Mbouj ndaej, mbouj ndaej bae!”

“W! Mwngz bienq ndaej baenzlai vaiq! Daxbaenh ngamq naeuz cihciz de ne.”

“Dahlwg gou dijbauj lumj nyawh, mbouj ndaej bae souh gij coih haenx. Lauxsaed youq ndaw gihgvanh hwnjban ndei!”

“Nanzdauh mwngz mbouj maqmuengh lwg mwngz vaiqdi sug yezvu?”

“Yawj saw yezvu lai di hix baenz ne!”

“Haenx dwg gangjhoengq.”

“Maihlaez dahlwg gou mbouj ndaej bae ngaiz cungj coih haenx. Caiqnaeuz, lwg gou bae guhhong ‘coih digiuz’、 dang boux ‘ngeihdaih nungzminz’, naj gou coq gyawz? Mbouj ndaej, caen mbouj ndaej bae!”

“Yi yi!” Dahlwg riunyaen, byaij deuz lo. De ngeixdauq gij cingzgingj mwh de caeuq gizcangj gangj gienh saeh neix：

“Gizcangj, gou siengj bae yangjhucan guh- hong.”

“Maz? Gou mbouj dingq loek ba?”

“Mbouj loek bw.”

“O! Iugouz baenaj, cingsaenz maenhndei, wnggai cihciz!”

“Hauhneix, singgeiz it gou bae bauqdaengz ndwi?”

“Gou caengz dapwngq mwngz bae ne.”

“Vihmaz ni?”

“Maih gou hawj mwngz bae, boh mwngz hix mbouj hawj, lau de bongx gou dem.”

“Gou gaenq cam gvaq de lo, de cihciz gou ne.”

“A! Boh mwngz caen hungmbwk.”

Gizcangj anbaiz de youq aen yangjhucan gaenh yienhsingz haenx. Gizneix liz yienhsingz gouj goengleix, miz cibngeih boux cizgungh, cijmiz doiq gvanbaz ndeu souj camh, gizyawz haet bae haemh dauq, daihgya youq yienhsingz youq. Anbaiz de youq neix dwg fuengbienh de gyanghaemh ma ranz caeuq bohmeh caemh gwn caemh youq. Hoeng, de youq camh, naeuz neix dwg ndoj gij vahraemh bohmeh.

Gyoengq doihhong naeuz de dwg lwed sim fwt hwnj cij daeuj neix guhhong, mizmbangj youq baihlaeng de riu naeuz：Gaenj nyinz lawz de dap loeng lo. Daihgya duenhdingh, mbouj gvaq sam ngoenz, de haengjdingh deuz dauqbae ndaw gihgvanh hwnjban.

Ngoenz daih’it, vat gumzroen. Fag gvakcibcih roek gaen naek, doihhong ang majbu, haenqrengz yaengx gvak gvaq gyaeuj, roengz gvak rengz doh, bakgvak onjwt caeb haeuj lohbwzyouz bae, dungcoz gyoengqde riengjret、 mizrengz、 ndeiyawj.

Hoeng, dahsau neix yungh gij rengz gwn cij daeuj yaengx gvak, fag gvak yaengx mbouj gvaq aek, roengz gvak dwg gag doek roengz, bakgvak mboujdan mbak mbouj haeuj loh bae, lij fanjdanz dauq hwnj cib lai goengfaen sang dem, ndang de deng rengzfanjdanz nyoengx, soenx dauqlaeng song yamq, faggvak caiq doekroengz baez moq, mbat neix faggvak lumj guhnyah nei, ninz gwnz loh, lij daenh dwk song cik gen de maz liux.

Gij dungcoz vat gumzroen de ngawzngwd、 gwnrengz、vadgei. De mbouj gamsim, lienz yaengx geij baez, cungj dwg yienghneix. Aen naj oiqet de seizneix youh gawh youh nding, de launyaenq dwk yawj coh doihhong.

Daihgya raen dwgriu, hoeng, mbouj gamj riu, cix nai de naeuz:“Baez nduj seng baez ngeih sug.” Byawz nyaenxsim bae riu dahsau coz coengzlaiz mbouj guh gvaq hong naek ne? Caiqnaeuz, de dwg cujdung iugouz daeuj neix guhhong bw.

Ngoenz hong ndeu gvaqbae lo. Song aifwngz de hwnj roek aen bop, ndongqrikrik, manhsadsad; daengx ndang innanq, ndangndok lumj yaek sanq nei. De nyaeuq najbyak gag cam:“Gou gaenj nyinz lawz caen dap loeng luba? Ce gihgvanh mbouj youq, daeuj neix souhcoih!” Yaepyet, de youh riunyumj, “Mboujgvaq ngoenzneix soundaej lai nw, gou dauqdaej mingzbeg gij gisuz coih gumzroen haenx lo. Giethab gij lijlun ndaw saw, yenzlaiz, lijlun daj ndaw sizcen daeuj, youh dauqbae ndaw sizcen. Caeklaiq gou daeuj neix bw, mboujnex bae lawz rox gij dauhleix neix ya? Ciknaq ok gung dauq mbouj ndaej, laemxsim guh baenaj ba!”

Ndwen ndeu gvaqbae, de byom lo, naj fonx, fwngz co.

Bohmeh daeuj yawj de, raen de yienghneix, daxmeh sim’in dwk raemxda rih. De nai naeuz: “Mbouj youqgaenj lo, gou guh ndaej.”

Song ndwen gvaqbae, de yaengx gvak dawz canj baenz yiengh lo.

Seizneix, gwnz muengx miz faenzcieng naeuz: Yendaiyez cihciz dahlwg roengz gihcwngz dang boux “ngeihdaih nungzminz”, de dwg daxboh hung- mbwk ndeu……

Dahlwg riunyumj naeuz:“Laebluenh ndaej hawj boh miznaj!”

Yencangj naeuz: “Cungj miznaj neix gou mbouj ngah aeu, gou cij aeu dahlwg gou ndeindi’ndi couh baenz lo.”

Bi ndeu gvaqbae, gij hong yangjhucan de yienghyiengh guh ndaej baenz, baenz bouxguenjroen caixhangz ndeu, gyoengq doihhong haenh mbouj dingz.

Youq dieghong, de caeuq gyoengq doihhong lwnh gij seizsaeh cwngci; faenyiengj gij saeh dwgriu mizyinx, haujlai hangzvah gwnz muengx hix dwg daj ndaw bak de rox, nanzgvaiq gyoengq doihhong naeuz de dwg “maksimhai” daihgya. De cix naeuz gyoengq doihhong dwg yienghndei de.

Ngoenzhaenx, de dwk denva hawj gizcangj:“Gizcangj, gou daeuj neix beizyin gaenq nduenluenz gietsat, cingjgouz dauq gihgvanh hwnjban.”

Gizcangj doengzeiq de dauq.

Dauq gihgvanh mbouj geijlai nanz, de ndaej guh bouxdaeuz yangjhugoh, dwg boux gohcangj ceiq nomj ndaw giz. Miz vunz haenh, miz vunz hozhaenz, miz vunz da’nding.

Seizneix gwnz muengx youh miz faenzcieng naeuz: Yendaiyez soengq dahlwg roengz gihcwngz dang boux “ngeihdaih nungzminz”, simgei de laeg……

De najnyaenq simluenh naeuz:“Boh, doiq mbouj gvaq, hawj mwngz gwnvi lo.”

Yencangj naeuz:“Gaej leix gij vah luenh gangj haenx. Dahlwg gou ceiq maenhndei! ”