Gaenh geij ngoenz neix, Aen Hoih 2024 Nienz Gvangjsih Vwnzva Lijyouz Hwngfat youq Vuzcouh Si hai, Canghvuz Yen dwg giz yawjhag aen hoih, aen yienh neix nyinhcaen gvancez lozsiz gij iugouz youqgaenj Siz Ginbingz cungjsuhgi gvendaengz lwnhgangj hong Gvangjsih caeuq gij cingsaenz Aen Hoih Daengx Guek Lijyouz Hwngfat, genhciz soujcingq cauhmoq、 daezcaet demyauq、 yungz- hab hwngfat, baijok rengzhoengh cien bi yienh ciuhgeq、 yinxdaeuz caz vwnzva lijyouz, dap aen bingzdaiz hawj gak cuz ginzcung samgyau, haenqrengz sij biencieng Gvangjsih gij yendaiva yiengh Cungguek ok rengz Canghvuz.

Youq Luzbauj Cin hozdung yienhciengz, gij cezmuz yienjok miz daegsaek、aen haw cauhmoq、daizlaeuj congzraez daengj hozdung gyonjcomz caz vwnzva caeuq Yauzyangh vwnzva， hawj gyoengq hekyouz gak cuz daj gak dieg daeuj haenx cienz fuengvih、 lai gakdoh gamjsouh gij yinxdaeuz daegbied cazluzbauj. Hozdung neix ciuyinx gyoengq hekyouz gak cuz daeuj ngonzyawj daejniemh, youq ndaw hom caz gvangqlangh dox baedauq doxgyau doxyungz.

Gaenh geij bi daeuj, Canghvuz Yen haeujlaeg hagsib gvancez gij swhsiengj youqgaenj Siz Ginbingz cungjsuhgi gvendaengz gyagiengz caeuq gaijndei hong minzcuz, genhciz aeu couqmaenh gij eiqsik caezcaemh Cunghvaz Minzcuz guh sienqmeh, lai roengzrengz bae hwnqguh、 baujhoh caeuq hwngfat aen mbanj minzcuz, haenqrengz haivat vwnzva gyaciz cazluzbauj, hawj canjnieb cazluzbauj caeuq lijyouzyez yungzhab, cauh yiengh moq lijyouzyez, doicaenh aen mbanj minzcuz caeuq lajmbanj lijyouz yungzhab hwngfat, coicaenh gak minzcuz samgyau.

(曾华兰/Cwngh Vazlanz)