Vangz Gencingh cam: “Laux- doengz, aen dieghong seizlawz haihong?”

Lij Danenz naeuz:“Cinz laux- banj naeuz, de caeuq gyazfangh cawjlaeuz gangjgyaq mbouj ngamj, doiqfueng hawj gyaqcienz daemq lai, mbouj habsuenq hong mbouj baenz guh lo.”

Vunzbaz Lij Danenz “yu” coenz ndeu, Lij Danenz din vaiq dog din vunzbaz de, vunzbaz de mbouj guhsing le, dawz sieg daek raemxdang gwn.

Daengngoenz yaek roengz, song dahlwg Lij Danenz nauh baema. Vangz Meijyen sikhaek bae riuj song daeh maksandauz daeuj, haetneix Lij Danenz hai ci daeuj, dahhung de raen Vangz Meijyen riuj song daeh mak, couh suglienh hai sienglaeng hawj Vangz Meijyen cuengq haeujbae. Mehyah Vangz Gencingh riuj lamz gyaeqgaeq ndeu gvaqdaeuj, mehyah Lij Danenz mizdi doeksaet, cacoemj naeuz:“Mehdoengz mwngz gaej hawj baenzlai gyaeqgaeq, aeu geij aen ndaej lo.”

Mehyah Vangz Gencingh daih- fueng naeuz:“Dou miz gyaeqgaeq lai ha.”

Haj

Banhaemh, Lij Danenz naj saepsatsat, doiq mehyah de naeuz: “Baezlaeng, gij saehcingz gou mwngz gaej doeng cam sae cam, lumj ngoenzneix youq laeng lauxdoengz, gou doiq lauxdoengz gangj Cinz lauxbanj gij hong gunghcwngz dajcang mbouj baenz guh, mwngz capbak guh maz?”

Mehyah de lumj cim vunz najseng nei naeuz: “Mwngz baenzneix guh mbouj baenz bw, guh vunz aeu lauxsaed, miz maz gangj maz, conghbak mbouj doiq conghhoz couh hoj guh vunz, yaek guhhong aeu sien guh ndei vunz gonq!” Lij Danenz gig mboujmuenx, naeuz:“Gou byaij daengz yamq neix, youq gyoengq beixnuengx, baengzyoux ndawde heuh rumz ndaej rumz heuh fwn ndaej fwn, gou nanzdauh mbouj rox guh vunz? Mwngz fatmoengx lo!”

Mehyah miz leix gangj yiengj, “Vah hix dwg mwngz naeuz hawj gou nyi, Cinz lauxbanj heuh mwngz cam lauxdoengz hauhneix gyaqcienz guh ndaej mbouj? Mwngz ngaenx naeuz dwg Cinz lauxbanj caeuq gyazfangh boux cawjlaeuz doxyaeng mbouj ngamj, hong mbouj baenz guh!”

（6）