Goeng:

Sinhoj ok sawfwen,

Dawz ma cienz yaxgyaiq,

Caengz fwen sien gyaudaiq,

Bouxlawz ngaiq cix nyimz.

Bawx:

Goeng miz maz siengsim,

Doiqnaj ging bawx dingq,

Dwgrengz lai maz mingh,

Gangj bawx ding caez ciengz.

Goeng:

Siengj gangj ndi gamj gangj,

Lau sangj famh deng mwngz,

Goeng hix mbouj baenz vunz,

Yawz rox mwngz liengzsim.

Bawx:

Geij yungh gangj vah yaem,

Gou ndaw saem(sim) nanz rox,

Geij gangj vah goemq ndoj,

Nauh doxcai doxngeiz.

Goeng:

Nyap ndi haeuj lwgda,

Guh maz mwngz youh yaep,

Heiq mwngz goj gag ndaet,

Gangj vah caet gumgum.

Bawx:

Vah aeu gangj mingzbeg,

Yaek aeu ceg faenmingz,

Geij goemq vah ndawsim,

Mienx aek in aeuqheiq.

Goeng:

Vah naeuz seuq sim sangj,

Gou gangj mwngz le dingq,

Guh vunz bingz liengzsim,

Bengz gvaq gim gvaq bauj.

Bawx:

Gangj hauqswnh bouxlaux,

Dauq suenq gou ceiq ndei,

Bingz mbanj gyawj mbanj gyae,

Ciengzseiz miz vunz haenh.

Goeng:

Mwngz ciengzseiz fatheiq,

Nauh dwk deih yunyun,

Cienz dienyah lajmbwn,

Cix suenq mwngz ceiq nyanq.

Bawx:

Mwngz cungj naeuz gou nyanq,

Mwngz can lawz ndi gwn,

Gvaqlaeng mwngz youh lumz,

Lajmbwn caengz raen gvaq.

Goeng:

Ngoenzbonz boh mwngz daeuj,

Mwngz daek laeujsamva,

Gou daj rog dauqma,

Mwngz guh naj gaeuzngauq.

Bawx:

Ngoenzbonz boh gou daeuj,

Sai laeuj goj hemq mwngz,

Mwngz gag nyaeuq ndi gwn,

Dauq gvaiq vunz mboujseih.

Goeng:

Mwngz bae mbanj bae haw,

Gven bakdou maenh ndaet,

Siuj ndi gven saek mbat,

Ma nyoeknyak youh hongz.

Bawx:

Gven dou gyaeng gaeq mou,

Youh naeuz gou gyaeng mwngz,

Lajmbwn daihbaj vunz,

Cix dan mwngz yienghneix.

Goeng:

Ngoenz bang mwngz gueng mou,

Da gou cix yaek mengz,

Byaij loh cix nyenggyeng,

Dwgrengz ndang yaek sanq.

Bawx:

Nanzvei mwngz haibak,

Mbouj seih gag duh gou,

Bang cawj saek donq souh,

Youh gvaiq naeuz dwgrengz.

Goeng:

Bang mwngz dawz nyez saeq,

Ngoenz ndi ndaej cuengq fwngz,

Dwgrengz lai le mbwn,

Bawx miz gwn ndi hemq.

Bawx:

Goeng maz lau dawz lan,

Mwngz bae cam vunz naeq,

Goeng lau daiq lan saeq,

Lwg aeu maex guh maz.

Goeng:

Ngoenz coq souh coq ngaiz,

Youh uet myaiz uet haex,

Gwj youz de gwj daej,

Cungj ndi ndaej cuengq fwngz.

（1）