Dahmingz ndaej senj guh cunhveij fucujyin lo. Luz Hozcaiz Mbanjgorenh gig yawj mbouj gvaq da, bi gyaeuj laglag. Geijlai seizdaih roengzdaeuj, cungj dwg senj nyaenh boux miz sawmaeg miz dungxcaiz daeuj guh cunhganbu, vihmaz aen seizdaih moq neix lij senj yungh boux doeg mbouj baenz saw? Aen biengz dauqdaej bienq ndei roxnaeuz bienq rwix lo? De ngeizvaeg lo, gag ngon gag naeuz：

“Bouxgvai cungj vit hoengq,

Dauqfanj yungh ‘vunzngawz’,

Ngah swt mbouj ngah gaw,

Geiz mbouj saw cix gvaiq.”

Dahmingz dwg lwgsau Mbanj- nazgut lwgbawx Mbanjgorenh, doenghbaez Luz Hozcaiz bae Nazgut guh lauxsae, ndaej son dahde gvaq. Mwhde, Dahmingz mbouj gyaez doegsaw, lauxsae hwnjdangz cungj dingq mbouj haeujrwz, cingzcik yaez dangqmaz!

Raemx hwnj raemx roengz, va hoengq va loenq, doeklaeng Luz Hozcaiz bienqbaenz boux vunz laj- mbanj bae Gvangjdungh dajgoeng. Miz baez ndeu, lauxbanj cingj Luz Hozcaiz bang gunghyinz haenx bae bouqlaeuj gwn ngaiz, song dah fuzvuyenz daeuj bang caem laeuj, dahdah daz ndaej naj hau bak nding, daenj buh roh ndaw roh aek.

“Lauxbanj, lij aeu maz fugsaeh lwi?” Dah ndeu niuj caekhaex bungq gvaqdaeuj naeuz.

Luz Hozcaiz baez yawj dahde, seizneix dahde hix yawj coh Luz Hozcaiz, seiq ceh lwgda doxcim, dahde doeksaet yat, fwtfat baenq naj byaij deuz. Luz Hozcaiz raen dahde miz di najsug, cix ngeix mbouj hwnj youq gizlawz raen gvaq. Doeklaeng fwt singjsag gvaqdaeuj, dwg Dahmingz! Nanzlai mbouj raen, dahde maj baenz sau lo.

Dahmingz guhlawz bienqbaenz cungj vunz neix ne? Luz Hozcaiz simget raixcaix, haemhhaenx de fonj bae fonj dauq baenz hwnz ninz mbouj ndaek.

Haet daihngeih Luz Hozcaiz cingjgyaj bae aen bouqlaeuj haenx ra Dahmingz, siengj bae gienq de gaej guh gij saeh yahcienh coujnaj couj ndaeng haenx, Hoeng Luz Hozcaiz bae daengz bouqlaeuj cam, boux cawjguenj bouqlaeuj naeuz dahde haemhlwenz senq deuz lo, mbouj rox bae gyawz, denva hix dwk mbouj doeng.

Byaibi dauq ranz gvaq cieng, Luz Hozcaiz daegdaengq bae ra Dahmingz. Dauqcungz ndaem haeuj Mbanj- nazgut, Mbanjnazgut caemh caeuq mbanj wnq doxdoengz liux bae, yienghyiengh bienq ndei, diuz daihloh bingzrwd sohsup doeng haeuj mbanj, lohdaeng daiyangznwngz song henz baiz ndaej cingjcingj caezcaez, laeuz ndaw mbanj doenghdoengh sang- sadsad, ciengz hau vax loeg, gyaqciq raixcaix. Aen ranz gaeuq Dahmingz henz daemz haenx hix bienqbaenz doengh laeuz seiq caengz ronghsag ndeu. Luz Hozcaiz byaij haeuj ranz bae, dingjlingz boh Dahmingz meh Dahmingz cungj youq naj densi ciengq go. Raen Luz Hozcaiz daeuj, song gyaeujyah sikhaek heuh haeuj ranz daeuj gwn caz, lij yaek bae laeng hongh gaeb gaeq, cawj ngaiz dakdaih. Luz Hozcaiz naeuz daeuj ra Dahmingz, meh Dahmingz naeuz dahlwg de mbouj dauq ranz gvaq cieng, gangj- byoegbyoeg naeuz Dahmingz doeg cuhcungh caengz sat couh riengz vunz bae Gvangjdungh guhhong lo, bibi cungj geiq daihbaj ngaenz dauqma hawj bouxlaux. De sim’angq riu dwk da laep da liuq, lij eu naeuz：“Dahlwg gou caen gvai, laeuq cienz lai gvaq doih, yienznaeuz doegsaw noix, hix daep soij daep gim.”

Luz Hozcaiz naeuz mbouj gwn ngaiz lo, de cigsoh lwnh raen Dahmingz youq Gvangjdungh baenz- lawz yiengh hawj bohmeh Dahmingz nyi. Siengj gienq Dahmingz gaij guh hong cingqdangq, naeuz de ndaej bang Dahmingz cam lauxbanj hawj Dahmingz bae aen gunghswh de guhhong. Boh Dahmingz dingq le najfonx mbouj guhsing, meh Dahmingz fwngz yeix najbyak Luz Hozcaiz rongx naeuz：“Mwngz luenh gangj, dahlwg gou mbouj dwg cungj vunz haenx, mwngz nyinh loek vunz lo, mwngz caiq luenh gangj vaih mingzdaeuz lwg gou, gou couh sik bak mwngz gvag daengz goekrwz bae!” Hwk dwk Luz Hozcaiz buet deuz mbouj gib.

Guekgya hengzguh aen canloz saenqhwng lajmbanj le, gij diuzgen lajmbanj ndaej bienq ndei, Luz Hozcaiz lumj ciencien fanhfanh vunz lajmbanj haeuj singz guhhong haenx ityiengh, dauqma mbanjranz cauxnieb, haenqrengz caux ngoenz moq.

Luz Hozcaiz ngamq dauqma mboengq de, cingqngamj roeb dawz lajmbanj cunhminz siujcuj gaijsenj vuenh bouxdaeuz, gyoengqvunz ndaw cuj raen de uk gvai rox naemjciek couh doxcanj senj de, couh yienghneix de baenz le Mbanjgorenh daihngeih cunhminz siujcujcangj.

Gunghozgoz laebbaenz caetcib hopbi ngoenzde, baihgwnz iugouz cunhveij comz gyoengq cunhminz daibyauj caeuq siujcujcangj gak mbanj daeuj swng geizguek, gikfat gyoengqvunz yiedcingz gyaezguek, lai roxnyinh Cunghvaz Minzcuz miznaj.

Ndaw hongh cunhveij, gyoengq cunhganbu、cunhminz daibyauj、siujcujcangj baizdoih sohrwd youq laj geizganj, boux minzbingh lenzcangj dinfwngz riengjret cug cag haeuj mbaw geizhoengz hajsing moq. Cunhcihsuh sing sang hemq naeuz：“Yaep he swnggeiz daihgya aeu oksing ciengq gozgoh bw!”

“Ciengq diuz gozgoh lawz?” Dahmingz fucujyin fwt cam, lumj boux siujhagseng gyaez cam vwndiz nei.

“Swng geizguek haengjdingh dwg ciengq gozgoh ha, lij cam ciengq diuz lawz?” Cihsuh lumj miz di mbouj naihfanz.

“Baenzlai gozgoh, rox heuh ciengq diuz lawz?” Mbouj liuh Dahmingz lij cam coenz ndeu, haujlai vunz nyaenx mbouj ndaej yaek goemq bak riu.

Boux doengzsaeh ndwn henzrik de laeglemx beng genbuh de sing saeq naeuz:“Gozgoh guek raeuz dwg《Yiyungjginh Cinhingzgiz》.”

“O, laxlawz dwg ceijdingh diuzgo ndeu ha? Mwngz mbouj gangj gou lij laihnaeuz gozgoh dwg go gozyij ne.”

Luz Hozcaiz dinghdingh soengz- ndwn dwk, riu mbouj ndaej daej mbouj baenz, de gaxgonq guhlawz son ndaej ok boux hagseng yienghneix ne, de haemz ha, haemz diet mbouj baenz gang!

Vihliux sawj ndwenngoenz bienq ndei, Luz Hozcaiz naemj guh fan daih saehnieb ndeu. De yawj hwnj le Luegguk giz dieg liz mbanj gyae- gyanggyang haenx, gizhaenx ndoi sang bo lingq, soqlaiz mboujdaih miz vunz bae. Luz Hozcaiz naemj bau roengzdaeuj guh lizdij dajndaem dajciengx, gwnz ndoi ndaem faex, laj faex ciengx gaeq, ndaw lueg haep daemz ciengx bya, gwnz raemx ciengx bit. Gangj guh couh guh, de bae gizhaenx dap diengz youq, lij yaek daj ndaw mbanj rag dienh bae dem.

Ngoenzhaenx de bae ra cunhveij hai cwngmingz, cingjgouz denliz gunghswh daeuj bang cang dienh, cunhveij dwg Dahmingz cizbanh.

“Luz lauxsae!”

“W, cihsuh cujyin mbouj youq ha?” Luz Hozcaiz raen ndaw ranz- banhgoeng gag Dahmingz bouxdog youq, cam.

“O, gyoengqde cungj roengz- mbanj lo.”

“Gyoengqde mwhlawz cij dauq ne?” Luz Hozcaiz miz di simgip, de mbouj siengj hawj Dahmingz hai cwngmingz, lau de raiz loeng nguh gij saeh de. Doenghbaez Luz Hozcaiz son Dahmingz yijvwnz, Dahmingz miz geijlai haexnyouh de cungj rox, mbouj gangj naeuz raiz cozvwnz lo, couh lienz cujswz cauhgawq, cungj guh mbouj baenz.

“Lauheiq daengz banhaemh cij ndaej dauq bw.”

Cingq youq seizneix, yah naihgeq ndeu yamq haeuj ranzbanhgoeng daeuj, “daeglan gou doegsaw yaek cingjgouz aeu ngaenz boujdiep baihgwnz, hagdangz naeuz cunhveij ok cwngmingz cijndaej, mwngz ndaej hai hawj gou lwi?” Yahnaih dwg vunz Mbanjdakdenz, caemh dwg daeuj hai cwngmingz.

“O, ndaej, ndaej, dawz hugoujbu daeuj lwi?”

“Dawz ha, youq neix.” Yahnaih ndenq hugoujbu hawj Dahmingz.

Dahmingz ciep gvaq hugoujbu, naengh baihnaj dennauj song fwngz dwk genbanz, mbouj daengz song faencung, aen dajyingih couh yaenq ndaej mbaw cwngmingz ndeu ok- daeuj.

Luz Hozcaiz yawj ndaej da cungj byaengq liux, guh ndaej nyaenx vaiq? Yahnaih ciep mbaw cwngmingz daeuj yawj, Luz Hozcaiz caemh youq bangxhenz yawj, cij raen mbaw cwngmingz vahgawq mingzbeg、cihsaw gveihfan, caen lumj boux vwnzyenz ciennieb dwk okdaeuj, de nyaenx mbouj ndaej haenh coenz ndeu naeuz：“Yu, mbatneix Dahmingz hai cwngmingz sug lai bw!”

“Mbouj dwg gou sug, ndaw dennauj miz aen mozbanj lo, cij aeu dienz di mingzcoh swhliu haeujbae couh baenz.” Dahmingz riu naeuz：“Seizdaih mbouj doengz lo, biengz raeuz diuzgen bienq ndei lo, guh gijmaz cungj fuengbienh.”

Luz Hozcaiz naj nding lo, de roxnyinh mbouj yungh caiq caj boux cunhgan wnq lo, naeuz：“Dahmingz, gou…… gou caemh aeu mbaw cwngmingz ndeu.”

Aen ciengz dajndaem dajciengx Luz Hozcaiz guh baenz le, Luz Hozcaiz gag guhhong cungj nyaengq dwk muenxluenh bae, couh ciengzseiz cingj gyoengq vunzmbanj bae bang guh, gij ndwenngoenz caezgya cungj bienq ndei lo.

Ngoenzndaep, Luz Hozcaiz caeuq boux banghong ndeu daeh bit bae haw gai, ginggvaq bakgvaengh cunhveij, raen gaiq lanzsenhconz nem mbaw “bangjgvanghyungz” ndingfug ndeu, de mbouj ndaejhoengq bae yawj, couh cam boux banghong haenx dwg gijmaz, boux banghong naeuz：“Dwg cinfuj haenh boux cunhganbu maenhndei, Dahmingz caemh bingz hwnj bw!”