Saedceij miz van miz soemj miz haemz miz hoj: Aenvih gyaez cix gamjdoengh, aenvih lijgaij loeng cix siengsim, aenvih saetbaih cix doeknaiq. Mbat haenx, gou najmong lai! Ngoenzhaenx, gou gaen daxboh bae dieghong de guhcaemz. Dou ngamq daengz dieghong, daxboh sikhaek vid genbuh, riuj aen doengj iq ndeu, dauj gij mbahoi roengz doengj bae, caiq aenq raemxsaw gya roengzbae gyaux, riengzlaeng benz hwnj aenlae, hainduj gvat ciengz.

Banringz, daengngoenz gangq deih manh- saengsaeng, goliux naiqnueknuek ngaem gyaeuj roengz, duzroeg youq ndaw raemhfaex ndoj ndit, duzma iet linx diemheiq fofo…… Mbwn ndat yaek dai! Gou siengj bae cawx bingz raemx ndeu gwn, gwn bingz raemx gyoetcat, itdingh “sangj- hwdhwd”!

Gou bae daengz najranz, hemq: “Boh, hawj gou haj maenz cienz vei! Gou bae cawx bingz raemx ndeu gwn.” Daxboh mbouj guhsing, daj gwnz lae menhmenh roengzdaeuj, cuengq doengj, cuengq ndei fagcat, daj ndaw daeh uqatat de mbon mbaw cienz hajcib maenz gaeuqgatgat ndeu okdaeuj, riuhwhw ndenq hawj gou naeuz: “Aeu bae, gijlw gag louz cawx doxgaiq yungh hagsib.”

“Gwnzbiengz cijmiz daxboh ndei, miz boh bouxlwg lumj gaiq bauj……” Seiz gou doq ciengq go, doq gwn yinjliu byaij dauqma, fwt yawjraen laengndang daxboh. Gwnz byoemgyaeuj de nem caengz faenx ndeu, raemxhanh gaenq daj byaibyoem lae daengz laj hoz lo, lae baenz diuz baenz diuz riz; gwnz buh de nem baenz naed baenz naed raemxhoi, miz mbangj giz lij muz byoengq congh lo, de daengx ndang cungj dumz hanh liux. Neix dwg daxboh gou ha? Gou yaepyet gangj mbouj ok coenz, sawqmwh siengj daej. Cungj siengj daej neix caeuq nanzgvaq le daej、utheiq le daej、guh’unj le daej cungj mbouj doengz. Gou vaiq byaij dauq cauhsi, bang daxboh cawx le bingz raemxcaznding gyoet de ceiq haengj gwn ndeu ……

It diemj, song diemj, sam diemj…… Cig daengz roek diemj, daengngoenz roengzbya le, daxboh cij guh hong sat, lauxbanj hawj le 120 maenz. Daxboh cukcuk guh le roek aen cungdaeuz ha! Cij hawj 120 maenz, gij cienz neix daiq nanz ra loba?

Daxboh riuj doengj bae swiq, gou mbouj guhsing riengz baihlaeng. Gou sawqmwh raen song mbaq de sang daemq mbouj bingz, haengjdingh dwg aenvih yaengx fwngz gvaz gvat naezhoi nanz lai. Laenghwet de hix miz di gungj, gwnz hoz miz baenz diuz baenz diuz raiz laeglumx. Geu ndit daengngoenz baez ciuq, gij byoemhau de daegbied coegda. Gou dungx miz di soemj, aen sim lumj deng nyauj nei, inndumndum. Daxboh sinhoj baenz buenq ngoenz cij ndaej 120 maenz, hoeng gou bingzseiz yungh cienz daih saengq daih sai, gwn yinjliu、cawx ceijnem’iq、cawx cagcugbyoem vava loegloeg…… Mbouj rox mbouj nyinh, gou raemxda rim gvaengz.

Mbat haenx, gou najmong lai. Gou rox daxboh mbouj heih, rox de gyaez gou lailai. Gou hix rox, danmiz aeu cingzcik ndei cijndaej bauqdap gij sinhoj daxboh—— Daxboh gou ceiq gyaez!

(Vuz Swhdungz raiz / Nungz Cinfung hoiz)