De yawj Vangz Meijyen saeknoh lumj Vangz Gencingh, cibngeih bi lwgnyez hozoiq lauxsaed, dwggyaez raixcaix, song daeg nuengx daeg’iq noh hau lumj meh de, daeg nuengx hung saeknoh hix ndaem’oiq lumj Vangz Gencingh, sam bohlwg lumj aen vunq ndeu yaenq okdaeuj, byoem hixdwg henjoiq.

De amqriu.

Miz dah lwgsau iq ndeu naengh youq gwnz ringiemxdou baihlaeng ing youq goekfaex yawj saw, saw gig na, cuengq youq gwnz gyaeujhoq. Lwgsau iq neix ciengz daeuj caeuq Vangz Meijyen guhcaemz, cujyau dwg ciq saw yawj, Vangz Meijyen hix bae ranz de.

Neix dwg bingzfangz song caengz buenq yungh cienhuj caep baenz, caengz dajcang, rog ciengz roh ok cienhuj caep ndaej goenjgoenj bingzcingj, daengx aen ranz hoengzfwgfwg.

Ranz dangqnaj miz benq dieg hoengq ndeu, seiqhenz faex hung humx dwk, dingzlai dwg faexmak. Lajbyonghngoenz, sam diemj cung, nditndat ngeng ciuq youq gwnz faex, laj goekfaex raemh giz dieg haenx ngamqhab cuengq daiz gwn haeux. Vangz Meijyen naeuz couh youq giz- haenx nda daiz gwn haeux, doq gangj doq heuh song daeg nuengx bae ranzdajcawj daiz aen daizmwnz sahfaex hung ndeu okdaeuj, dah doengzhag cuengq saw youq gwnz ringiemxdou buet bae doxcaeuq daiz. Lij Danenz bungj aen bat hung ndeu okdaeuj, ndaw bat coux miz nohbit cug, heiq ndat hoenzngeungeu, Vangz Gencingh bungj aen bat hung ndeu okdaeuj, ndawde coux rim nohgaeq cauj raethom, roek boux lwgnyez hemqhuhu buen eij daemq okdaeuj, Vangz Meijyen haeuj ranz bae liuj aen gangvax iq ndeu okdaeuj, aen gangvax neix aeu duk sanhumx, ce miz rwz. De swiq seiq aen cenj daeuj daengj gwnz daiz, giet fagang sai laeuj haeuj cenj bae baij ndei. Dwg laeuj gag ngauz, lai bi laeuj geq. Vangz Meijyen anbaiz song laux- doengz naengh bingzbaiz, song boux mehdoengz naengh song henz, roek boux lwgnyez bingzbaiz naengh. Rogranz gwn haeux gig miz yinx- daeuz, roek boux lwgnyez bingzbaiz naengh boux ngaemh boux riugeggeg lumj guhcaemz nei haeb byaidawh mbouj ngah gwn haeux, dah’iq caeuq daeg’iq gwn maksandauz, naengh yaep he youh ndwn hwnjdaeuj boux laeh boux humx daizmwnz dox- gyaep.

Laeuj ndei byaek hom vunz sim’angq, gij vah roxsim song laux- doengz gangj geijlai miz geijlai, couh lumj dawz beuz daek raemxdah ciengxlwenx daek mboujmboek.

（5）