Bivaiz hengzguh cibseiq haj,

Lajmbanj saenqhwng veh lamzdoz,

Rumzcin gaijgwz daeujfofo,

Ginzcung doxiu daeuj angq hemq.

It hauh vwnzgen raiz bien moq,

Haj bi gveihva yoj(yawj) bidaeuz,

Cungguek okyienh bienqvaq raeuh,

Lajmbanj bouxboux sim angqyangz.

Lajmbanj saenqhwng vahdaez gvangq,

Song sam gawq vah gangj mbouj caenh,

Lajmbanj saenqhwng yiyi haenq,

Dingq gou nyinhcaen lwnh hawj mwngz.

Baugau Aen Dangj Cibgouj Daih,

Haiguh saenqhwng lajmbanj raeuz,

Haj veih guhdoih baij baihdaeuz,

Youh dingh canloz seiq cienzmienh .

Guekcoj maenh’ak lajmbwn onj,

Ngonzhag dangjsij yamq baenaj,

Loh moqyienhsaed rongh dangqmaz,

Saenqhwng lajmbanj moqsagsag.

Faen song yamq bae hwng lajmbanj,

Banh baenz ngeih lingz haj lingz nienz,

Gozgi minzswngh naekciencien,

Giengiet hawj raeuz buet siujgangh.

Hawsingz lajmbanj yaek doengzha,

Lajmbanj fazcanj aeu haeujcoengh,

Doengzcaez fouqmiz caemh saenqhwng,

Yinvu hoenghhwd youh miznaj.

Linghyiengh gensez aen mbanj moq,

Fazcanj mozsiz aeu cienjvuenh,

Swnghcanj fazcanj canjnieb vuengh,

Ndwenngoenz miz muengh haeux rim cang.

Lajmbanj gveihva yaek guh gonq,

Comz rengz bae guh aeu ciuqei,

Fazcanj lamzdoz yaek veh ndei,

Dingh ndei moegbiu byaij baenaj.

Daengx mbanj doicaenh hwnq mbanj moq,

Gizgiz moqsak mwnqmwnq lengj,

Gensez mbanjmoq caenz haenqrengz,

Ngengh gaij mbanjgaeuq bienq dieg moq.

Nungzyez canjyez bienq yienhdaih,

Vunzlai miz huq cungj gai baenz,

Doenghgo ndaem ndaej cungj canh ngaenz,

Baenqfouq bouxboux angqvauvau.

Nungzyez gunghyez doengzcaez huj,

Huqdoj huqmoq riuz daengx biengz,

Bouxcangh gaendwk daeuj doxriengz,

Riengjret demsou lajmbanj faengz

Gyagiengz dangjgen coi fazcanj,

Lajmbanj song’veij comz naengzlig,

Gihgou duivuj gensez lig,

Banhsaeh yauqlwd ndaej daezsang.

Vwndiz yinxyiengq gaemh banjdinj,

Caez dingj gannanz doek rengzhaenq,

Dawz ndei lozsiz caeuq doiqyienh,

Yawjmaenh haedsim caeuq nanzdiemj.

Seizdaih fazcanj langhfoenxfanj,

Lajmbanj saenqhwng caen simmoj,

Roennaj raen miz gingjsaek moq,

Lajmbanj moqsak hong hwngvuengz.

Hauhcungfung youh ndoiq gyong laz,

Naemj ndei baenzlawz hwng lajmbanj,

Guh ndei caepcawq ngeix fazcanj,

Banj hwnj diuzgen haenqrengz guh.