it

Bingz yw neix haetromh gouj diemjcung couh venj lo, gvaqbae song diemjcung cij ndik bae dingzlai.

Goz naengh youq bien congz- bingh, song da cim coh aen bingzyw, gij yw ndaw bingz baez caek baez caek doek roengzdaeuj, gaen diuz gyongj- gau yaeng’yaeng lae haeuj fajgen daeglwg bae.

Daeglwg song bi lai, mbouj fatndat couh fatae, mbouj fatae couh fatndat, seiz mbouj seiz couh haeuj yihyen, gij yw ndaw ndang de lai gvaq gij haeuxgwn de bae.

Husw byaij haeuj ranzbingh daeuj, cigsoh byaij daengz aen congzbingh baihndaw bae, doiq daegcoz nienzgeij caeuq Goz ca mbouj geijlai haenx naeuz:“Lwg mwngz yaep dem dajcim sat le, couh daiq de daengz it laeuz bae sopoenq o, de lij ae.”

Husw ok ranzbingh bae le, Goz byaij gvaqbae, naeuz:“Lwg mwngz baenzlawz yiengh.”

Daegcoz naeuz:“Fatndat fatae, daeuj yihyen sam ngoenz lo, ndat doiq gvaq, ae lij caengz ndei.”

Goz naeuz:“Lwgnyez couh yienghneix, yaep ndei yaep yak, caeklaiq miz yihyen, mbouj ni, caen mbouj rox baenzlawz guh.”

“Dwg lo, lwgnyez baenz bingh, bouxlaux couh sim mbouj onj, gwn mbouj baenz gwn ninz mbouj baenz ninz, youh mbouj ndaej bae guhhong, ra ngaenz yw mboujdaemx dem.” Daegcoz naeuz.

Goz vunz sang ndang reux, byoem ndaem noh hau, youq aen gunghswh ndeu hwnjban, gezvwnh bi daihsam cij miz daeglwg neix, gvanbaz gig gyaez daeglwg, daj daeglwg doekseng le, mehyah couh mbouj guh- hong lo, ngoenzngoenz youq ranz daiq lwg, cawj caeuz cawj ngaiz.

Goz lajbyonghngoenz yaek hwnj- ban, mehyah daeuj daengz yihyen, de couh aeu dauqbae yietnaiq. Goz cam daegcoz naeuz:“Lwg mwngz geijlai bi? ”

“Yaek ndaej sam bi lo.” Daegcoz naeuz.

Goz naeuz:“Lwg gou hix yaek sam bi lo, aen seiz neix ciengx lwgnyez, raeuz guh bohmeh gwn hoj lai lo.”

“Dwg lo, mehyah gou hwnjban, geij ngoenz neix cungj dwg gou youq yihyen yawj lwg, naiq mbouj ndaej ninz, gwn mbouj fuengbienh, miz maz banhfap.” Daegcoz naeuz.

Mehyah daeuj daengz ranzbingh lo, Goz naeuz:“Miz boux daeuj lawh, gou dauqbae lo, hoh lwg mwngz bingh ndei vaiqdi.”

Daegcoz ngaekngaek gyaeuj naeuz:“Gou hix hoh lwg mwngz bingh ndei vaiqdi.”

Song boux doxcim riuriu.

Ngeih

Haetromh ndaw ranzbingh, canghyw boux haeuj boux ok nyaengqfoedfoed, boux husw he haeuj ranzbingh daeuj naeuz: “Samcib loeg hauh, samcib loeg hauh, yaep dem hwnj caet laeuz bae guh CT.”

Ganj dingq le naeuz: “Ndei ndei.”

Congzbingh samcib loeg hauh dwg daxboh Ganj, goeng neix betcib sam bi, geij ngoenz gonq youq ndaw ranz laemx roengz, lwgda cwix, fwijbak vej, gangj mbouj ok vah, hix mbouj roxnaj vunz.

Miz vunz naeuz, bouxvunz betcib sam, ram hwnj bya oo, ngoenzdai daengz lo, yw mbouj yw hix ndaej lo. Ganj naeuz:“Seizneix miz yihbauj, baenzlawz mbouj bae yw, aen seiq neix baenzlai ndei, bouxgeq lix ngoenz ndei ngoenz.”

Ngoenzneix daxboh Ganj dwg daengz yihyen ngoenz daihcaet, cungj suenq ndaej gwn di doxgaiq, nanz mbouj nanz hix gangj ndaej ok coenz vah song coenz.

Ganj doi daxboh bae guh CT doxdauq daengz ranzbingh, ndaw ranzbingh ndwn rim vunz, canghyw cingq genjcaz goeng vunzbingh ngamq soengq haeujdaeuj haenx, geij boux husw buet haeuj buet ok, canghyw cam:“Gyahsuz bouxbingh youq giz- lawz?”

Goz bae gaenh caeuq canghyw naeuz: “Gou, gou youq neix.”

Canghyw naeuz:“Daengz ranz- banhgoeng canghyw bae yaep ndeu.”

Ganj yawj gvaqbae, caeuq Goz song da doxciuq baez he, Ganj roxnyinh daeg neix miz di najsug, youh naemjnej ngeix mbouj hwnj youq gizlawz raen gvaq.

Goz bae daengz ranzbanhgoeng canghyw, canghyw naeuz: “Bouxbingh nienzgeij laux, gaenq daengz seiz youz liux daeng yaek laep, feiz ndaep daeuh yaek mon, caiq yw roengzbae hix gouq mbouj dauq lo, mwngz yawj lij youq yihyen dajdaj cim roxnaeuz dawz bae ranz, caj mwngz guh gietdingh.”

Daxboh ciuhvunz sinhoj, saedceij ngamq ciemhciemh gvaq ndei, seiz- neix couh yaek byag bae, Goz rox- nyinh gig siengsim.

Boh lix beix guh byai, boh dai beix guh goek, Goz miz song beixnuengx, de dwg lwgdaeuz, baez naemj daengz coenz vah neix, de couh gag roengz gietdingh, doiq canghyw naeuz:“Sien youq yihyen dajcim gonq, de ndaej gyaeu geijlai ngoenz suenq geijlai ngoenz.”

Goz dauq daengz ranzbingh, Ganj cingq bwnq haeuxngaiz hawj daxboh de, Goz naeuz:“Ei, gou lumjnaeuz youq gizlawz raen mwngz gvaq ni?”

Ganj naeuz:“Gou raen mwngz seiz, hix lumjnaeuz roxnaj mwngz nei, ngeihcib geij bi gaxgonq mwngz dwg mbouj dwg youq yihyen yw lwgnyez gvaq?”

Goz naeuz:“Dwg ha, dwg ha. O, deng lo, raeuz guhdoih youq aen ranzbingh he hawj lwg yw bingh gvaq. ”

Ganj naeuz:“Deng lo, ngeihcib lai bi gvaqbae, raeuz bouxboux byoemgyaeuj hau liux lo.”

Song boux boh ninz gwnz congz- bingh laepda saesa， gangjvah mbouj ndaej, song boux lwg naengh bien congzbingh fugsaeh miz vah gangj mbouj liux, song ndaek neix daj doxraen daengz seizneix gaenq gvaq- bae ngeihcib lai bi.

Goz miz song boux lwg, lwgdaeuz dayoz okdaeuj gaenq bae guhhong, dah lwgngeih lij doeg dayoz.

Ganj miz song boux lwg, lwgdaeuz dangbing dauq ranz le, youq yanghfuj guhhong, dah lwgngeih gaenq haq gvaq, ndaw ranz bouxgeq ciengx bouxgeq.

Daxboh Goz mbouj baenz gvaq, yihyen heuh doiq bae ranz, ngoenzneix couh dawz ma ranz. Ganj naeuz: “Dauqbae caiq ndeindei fugsaeh bouxgeq ba, raeuz caenhrengz couh baenz.”

Goz naeuz:“Dwg lo, muengh mwngz ndeindei ciuqgoq bouxgeq, mbouj hawj de dai da mbouj laep couh baenz.”

Sam

Goz soengq daengz yihyen seiz dwg gyanghwnz it diemj lai cung, yihyen caemrikrik, canghyw genjcaz le, couh heuh dawz bae ranzbingh youq, yawj hwnjdaeuj bingh mbouj mbaeu.

Goz roekcib bi lajdin lo, mbouj baenz bingh gvaq, ciuq vah de naeuz, bouxboux lumj de yienghneix, canghyw couh dai iek lo. Haemhgonq de lij daengz bak hongh bae caeuq vunz gangjgoj, miz gangj miz riu, bouxlawz rox daengz byonghhwnz le, de roxnyinh daraiz, aen congz baenq cienq lumj aen loekci nei, cungj dwg yaek rueg, de dwk denva hawj daeglwg, couh yienghneix deng soengq daengz yihyen lo.

Daeuj daengz ranzbingh mbouj geijlai nanz, canghyw couh heuh Goz bae guh genjcaz, caet laeuz bet laeuz genjcaz gijneix, sam laeuz seiq laeuz genjcaz gijhaenx, loengh daengz ranz yaek rongh cij dauq daengz ranzbingh.

Bien mbwn loq ok fwjhau lo, Goz hix ngamqngamq venj sat bingz yw he, seizneix youh miz vunz soengq boux vunzbingh moq he haeuj ranzbingh daeuj, bouxbingh ninz gwnz congz- bingh, “w w w” gongz mbouj dingz, canghyw gaen haeujdaeuj naeuz: “Soengq hwnj cib laeuz bae, aeu guh soujsuz cij ndaej.”

Goz venj sat song bingz yw le, dungx mbouj fan da hix mbouj raiz lo. Canghyw daeuj cazranz seiz naeuz Goz dwg bingh hezyaz sang, youq yihyen yawjyawj geij ngoenz couh ndaej dauqbae.

Bingh hezyaz sang mbouj dwg bingh hung, hoeng dwg bingh aeu mingh vunz, mbouj haeujsim, ngoenz- lawz laemx roengz hix mbouj rox, haujlai vunz baez laemx roengz, couh gouq mbouj dauq lo.

Boux vunzbingh dawz bae guh soujsuz haenx soengq dauq daengz ranzbingh lo, Goz baez yawj, roxnyinh gig sugnaj, de naemj: Boux vunzbingh neix itdingh youq gizlawz doxraen gvaq.

Husw soengq yw haeuj ranzbingh daeuj, it boux it boux faen yw gvaqbae, husw doiq Goz naeuz:“Mwngz gwn ngaiz gwn yw le, couh okbae byaijbyaij cij ndaej, gij bingh mwngz mboujdanh aeu ngoenzngoenz gwn yw, lij aeu caenhliengh ngoenzngoenz haethaemh okbae byaijbyaij yaep he, yienghneix gij hezyaz mwngz couh mbouj heih bienq sang, cijaeu mbouj hawj gij hezyaz mwngz hwnj sang, couh mbouj miz saeh.”

Ganj ndiu dauq seiz dwg lajbyonghngoenz, de hai da raen Goz, sing daemq naeuz:“Mwngz baenzlawz cij daeuj yihyen ha? Gou dwg dungx oklwed, ngoenzlwenz gou dungxin dwk yaek dai bae, laihnaeuz mbouj baenz vunz lo, gyoengq canghyw seizneix caen ak, song sam mbat, gou youh miz rengz gangj vah lo.”

Goz naeuz:“Gou baenz bingh hezyaz sang, vunz naeuz miz mingh mbouj lau bingh, gij bingh mwngz gvaq geij ngoenz couh ndei lo. Boh mwngz ni?”

Ganj naeuz:“Boh gou bi’gvaq dai lo, baezhaenx youq yihyen okbae lij gyaeu ndaej roek bi lai. Boh mwngz gvaqlaeng baenzlawz yiengh?”

Goz naeuz:“Boh gou ok yihyen ngoenz daihsam couh gvaqseiq lo, seizneix gaenq dai ndaej caet bi lo.”

“Ei, seiqvunz raeuz couh yiengh- neix gvaqbae lo.” Ganj naeuz.

“Ei, seiqvunz raeuz couh yiengh- neix gvaqdaeuj lo.” Goz naeuz.

Goz caeuq Ganj song boux ndaej ok yihyen dauqbae ranz ngoenzhaenx, ndit ndei mbwn raeuj. Song boux sim- angq, doxnaeuz gyau baenz laux- doengz.