Singhgiz haj haemhde, gou yawjraen haujlai ndaundeiq youq gwnz mbwn ronghmyabmyab, sim- angq raixcaix. Gou ngamqngamq yawj sat dienheiq yawhbauq, ngoenzcog wnggai dwg ngoenz nditndat, yienghde gou couh ndaej caeuq doengzhag gou okbae guhcaemz lo.

Haet laeng, ndit daj yiemhcueng ciuq haeuj rug gou daeuj. Gou lumj duz byaleix nei daj gwnz mbonq saet roengzdaeuj, bae rag yiemhcueng gvaq lingh mbiengj bae. Bande daengngoenz lij venj youq gwnz mbwn sangngaungau, ndit ciuq youq lajnamh raeujruprup gimmyanmyan, gou angq dangqmaz, ngamq yaek dawz gij doxgaiq okbae guhcaemz aeu yungh de cuengq haeuj ndaw daeh bae, sawqmwh ndaejnyi daxmeh gongz naeuz: “Aeyo, in dai lo!” Ndaw sim gou hojyouq dangqmaz, gou rox daxmeh yienghneix dwg gij binghgaeuq de caiq fat lo, yawj de baenzneix yiengh, gou rox banneix gou aiq ok mbouj bae guhcaemz lo!

Geij bi gonq, daxmeh deng baenz cungj bingh hohndok in, baez daengz mbwn bienq yaek fwndoek, gij hohndok gyaeujhoq de couh inndumj. In lai seiz, daxmeh couh hojyouq dwk gongz “ aeyo, aeyo” bae.

Gou buet ok rug, raen daxmeh naengh youq gwnz sahfaz aeu fwngz goemq youq gwnz gyaeujhoq, in dwk nyaeuq najbyak, gou doq gaenjdi daj ndaw sieng’yw dawz yw okdaeuj hawj daxmeh cat. Couh youq seizde, rog cueng mbwn bienq lo, daengngoenz deng caengz fwj na ndeu goeb liux, mbwn bonjlaiz ronghsagsag, hix doq laep roengzdaeuj. “Gou roxnyinh raq rumz nit ndeu ndonj haeuj gyaeujhoq gou bae, aiq fwn yaek doek lo!” Daxmeh yawj ok rog cueng, bi’gyaeuj naeuz. Gou ngiengx gyaeuj yawj mbwn, simluenh dangqmaz, lumj naengh ci gvaq roenbya nei, daj gwnz byasang doek daengz ndaw lueg muenghndwi bae. Dahraix, ngamq gvaq yaep ndeu, couh fwn doek lo. Gou haenh naeuz: “Meh ha, aen mingzdaeuz ‘rox dienheiq gonq’ mwngz caen dang ndaej hwnj ha!”

Miz baez ndeu, mbwn gvengq, gou caeuq daxmeh youq ndaw gunghyenz youz byaij. Miz raq rumzliengz ndeu ci gvaqdaeuj, gaenlaeng daxmeh doq daemjndoet, got gyaeujhoq naeuz: “Gyaeujhoq gou mi di in, gvaq yaep he aiq yaek doek fwn. Raeuz aeu vaiqdi ma ranz, mboujne couh yaek deng fwn rwed lo!” Gou caengz singj gvaqdaeuj, de couh gaem fwngz gou, vaiq byaij ma ranz. Dou ngamq haeuj ranz, fwn hung couh doekbyoegbyoeg. Yienznaeuz daengz ranz lo, hoeng gou sim diuq gig vaiq, gou doiq daxmeh naeuz: “Caeklaiq raeuz gaenjdi ma ranz, mboujne raeuz seizneix couh ndang mbaeq liux lo!”

Yienznaeuz ndaw ranz gou miz boux “rox dienheiq gonq” ndeu geizheih dangqmaz, hoeng gou lij dwg maqmuengh daxmeh gou ndang cangqcwtcwt, mbouj miz bingh in, ngoenzngoenz cungj gwn van youq ndei, sim’angq gvaq ngoenz.

（Gu Yougiz raiz/Veiz Munglingz hoiz）