Ranz Vangz Gencingh youq henz mbanj, diegyouq gvangq, ranz seiq henz ndaem miz haujlai faexmak, dwg daxboh de geij cib bi gaxgonq ndaem roengzbae. Laj goekfaex baij miz haujlai diuz rin, dwg Vangz Gencingh youq ndaw mbanj soucomz aeu moegci doz dauq. Gyoengqvunz lid ranznamh gaeuq hwnqguh ranz- bingz, gij giemxdou ciuhgeq dwg rin guh baenz, dingqnaeuz dwg vunz- ciuhgonq genj gij rin hung youh hau youh heu haenx daeuj guh, cungj rin neix beij rin gizyawz geng, yungh fagcuiz baez cuiz baez cuiz cuiz baenz diuz rin gvangq cibcaet goengfaen, sang ngeihcib goengfaen, yienz- haeuh aeu daeuj guh giemxdou, cien bi mbouj vaih, danghnaeuz aeu faex guh giemxdou, nduk vaih lai, haet haemh caij heih hed, yienghneix, gyoengqvunz hwnq ranz ciuh dem ciuh, mboujlwnh ranzhaz roxnaeuz cuk ciengznamh, cungj aeu diuz rin guh giemxdou, ranz gaeuq dekdoemq youh hwnq, ringiemxdou lienzdaemh sawjyungh, ranz neix senj deuz, ranz haenx beuj daeuj, lid ranz vaih hwnq ranz moq, gijmaz cungjdwg moq dandan ringiemxdou dwg gaeuq. Gaeuq dwg gaeuq, de couh lumj miz sengmingh nei, naihsouh cien bi fanh bi. Bouxhek daeuj yawj da ndeu yamq haeuj ranz, couh roxnyinh ranz vunz neix dwg vunzndei.

Vangz Gencingh ceiq gyaez ringiemxdou.

Vunzmbanj raen Vangz Gen- cingh aeu ringiemxdou, couh lwnh de nyi laeng byawz lid ranz gaeuq le, gij ringiemxdou vit youq gizlawz, miz mbangj gaen deng namh moek lo, de couh dawz faggvak caeuq fagcanj bae vat namh deuz bae, yungh faex geuh hwnj gwnz loh daeuj, aeu moegci cug diuz cug diuz doz dauq, cingjcingj caezcaez baij youq laj goekfaex, fwn doek dongj deuz namh uq, ringiemxdou moqsagsag, miz mbangj ginggvaq geij bak bi caij、 naengh、 lumh, seizneix bienq ndaej youh wenj youh rongh, gij saek de heu youh lamz, baenz diuz lumj meg vunz. Ringiemxdou miz sengmingh, geijlai aen ciuzdaih, de haet haemh caeuq gyoengqvunz youq, dwg bauj vunz- biengz, nanzgvaiq gig ndei yawj.

Song boux vunzmbwk naengh youq gwnz ringiemxdou, ndangdaej ndat caeuq rin gyoet doxgyaux, lumj ciuhneix caeuq ciuhgeq doiqvah. Gij goj beixnuengx gangj mbouj caenh, beixnuengx ndei engq gangj mbouj caenh gij goj cien fanh coenz, seizneix songde gangj ndaej diemz- subsub, diemz lumj maksandauz. Gyoengq lwgnyez benz hwnj gofaex bae mbaet maksandauz roengzdaeuj gwn, dah lwg hung Vangz Gencingh mingzcoh heuhguh Vangz Meijyen, de lumj duz maxlaeuz ndeu youq gwnz faex benz bae benz dauq mbaet ndaej cibgeij gaen mak roengzdaeuj, de doiq vunzbaz Lij Danenz naeuz: “Mehdoengz, hawj mwngz dawz daeh mak neix ma ranz gwn bw, sou ciengz daeuj, bimoq daeuj vaiqdi, gou mbaet lwgnganx hawj sou, lwgnganx gam diemz, daengz seiz gou mbaet lai di hawj sou dawz baema.” Vunzbaz Lij Danenz riunyumnyum naeuz: “Docih dahniq lo.”

（4）