Ngoenz ndeu, miz duz dangh hung ndeu daeuj, naeng de na raixcaix, feiz geijlai haenq hix coemh mbouj dai de. Daeglwg cam daxmeh: “Meh, raeuz wnggai baenzlawz guh?” Daxmeh naeuz: “Gaej lau, duzdangh lau raemx, yungh raemx rwed, de couh ndang unq doengh mbouj ndaej lo.” Duzdangh hung gangj daeuj couh daeuj, nyonnyan hujdengdeng, boq naeuz aeu caenh vunz ok gizneix bae. Daeglwg gaem hwnj doengjndoek hung cang raemx rim, mbouj dingz aeu raemx buet coh duzdangh. Duzdangh hung baez bungz raemx couh nyaenx mbouj ndaej ndang unq, rieng hix daengj mbouj hwnj lo. Gij raemx daeglwg buet haenx yied daeuj yied lai, duzdangh hung dingj mbouj ndaej couh youq gwnz namh rouxringx, daej hemq nyiuz mingh.

Song mehlwg caenh deuz duz- dangh, couh simnet youq ndaw bya dajndaem, mbaet makcwx、 rangz、raet, ndwenngoenz gvaq ndaej vanyet. Hoeng mbouj geijlai nanz, youh miz duzmui hung daeuj lo. Duzmui rox lumj vunz nei song ga daengj ndwn, youh sang youh hung, rengz hung dangqmaz, gaex ndaej bya beuj ndaej rin, lij loek ndaej goenqfaex dem. De naeuz yaek caeuq vunz beij goengfou beij dungxcaiz, danghnaeuz vunz saw le, couh aeu lizhai gizneix, bae daengz giz doenghbaez nitgyaengj mbouj miz raemx、mbouj miz feiz、mbouj miz daengngoenz dauq. Daxmeh hawj daeglwg song fwngz oet haeuj song aen ndungq bae, youh heuh de bae doiq duzmui naeuz: “Mwngz gag naeuz rengz lai rengz daih, seizneix hawj mwngz ca dawz song fwngz gou, song fwngz gou danghnaeuz baetduet mbouj ndaej couh suenq mwngz hingz.” Duzmui dingq le, ndaw sim gag angq, song faj fwngz de gaem gvaq nyauj duzguk, naenx gvaq hoz duzbeu, hoeng gyoengqde mbouj miz saek duz baetduet ndaej, de nyinhnaeuz vunz haengjdingh saw hawj de, couh hwnjbae yungh rengz ca song fwngz bouxvunz, ndaenggon dwk laep da haeuj. Daeglwg song fwngz daj ndaw ndungq yot okdaeuj, cienq ndang couh deuz. Duzmui riu doh le, byaengq da baez yawj, bonjfaenh dan ca dawz song aen ndungq, vunz mbouj raen ngaeuz lo. De hozgaek, gveng ndungq bae youh ra hwnj dou daeuj, naeuz baezneix mbouj suenq, beij baez dem dingh sawhingz. Daxmeh youh hawj daeglwg bae ndaw rij gaemh daeuj bat byanouq ndeu, heuh duzmui daeuj doxdax, yawj byawz gaemh ndaej lai. Duzmui gaemh bya ak lai lo, de dwg lauxsouj gaemh bya, laihnaeuz baezneix vunz saw dingh lo, couh iet fwngz roengz ndaw bat bae gaemh byanouq. Hoeng byanouq raeuzredred, cungj daj geh fwngz de lae deuz, de gaemh baenz byongh ngoenz, cungj gaemh mbouj ndaej saek duz. Hoeng daeglwg song fwngz baez hab, couh ndaej riengjret daj ndaw bat lauz ok byanouq. Duzmui raen youh saw lo, hozgaek dangqmaz, doxdax byongh ngoenz, dungx iek dwk heuhgugu, baezneix de naeuz daxmeh caeuq daeglwg, aeu caeuq gyoengqde doxdax gwn doxgaiq, de naeuz de gwn ndaej liux sojmiz gij doxgaiq ndaw ranz vunz. Hoeng daxmeh naeuz, de ndwnj ndaej roengz aen sawz cawj cug ndeu couh suenq de hingz. De doengzeiq lo, heuh gyoengqde vaiqdi cawj sawz daeuj. Daxmeh caeuq daeglwg diemj hwnj dong feiz ndeu, aeu goenj rin youh geng youh raeuz ndeu haeujbae, caj rin coemh nding le, aeu okdaeuj heuh duzmui vaiqdi aj bak. Duzmui baez raen gij doxgaiq ndingnyan- nyan, senq couh myaiz rihdangdang lo, cig haenh naeuz sawz ndei, couh bak aj hunghung, heuh gyoengqde vaiqdi oet haeujbae. Duzmui ndwnj roengz goenj rin coemh nding, yaepyet couh laemx roengz gwnz namh rouxringx, mbouj geijlai nanz couh dai lo. Duzmui dai le, couh mbouj miz gijmaz nyaen yak daeuj hangz vunz lo, daxmeh caeuq daeglwg youq gizneix an’onj youq roengzdaeuj, itcig youq daengz seizneix.

（2 sat）