Caet nyied mbwn hwngq daengngoenz sang,

Guekcoj gvangqlangh gingjsaek maeq;

Biengz raeuz youh miz saeh vuenheij,

Gaijgwz youh ndaej hwnj mbaek moq.

Ngoenzneix roeg heuh va hai rang,

Fwencuengh angqyangz ok Guengjsae;

Senhconz Dangj raeuz hai davei(daihhoih),

Bouxboux sim maez(angq) bae danqhaenh.

Caet nyied cibhaj daengz cibbet,

Biengzdeih gak dieg va hoengzoiq;

Cunghgung Cunghyangh hai daihhoih,

Saeh’angq baenz boix hawj lajbiengz.

Gwnz mbwn gvengqgvengq mbin fwjlungz,

Angqhemq Samcung Cienzhoih hai;

Doicaenh giengz guek caen ndei lai,

Cungqvunz sim hai lumj vavengj.

Samcung Cienzhoih lumj rumzcin,

Ci daengz byarin yungz naehang;

Gak cuz lwgminz sim yiengq Dangj,

Bouxboux lae hanh riengz de buet.

Veiyi cingsaenz cienz roengzdaeuj,

Vunzlai sim raeuj guh fwen ciengq;

Cawjdaez senzliz(旋律) ciengq ndaej yiengj,

Fwen rim gwnzbiengz cingz mbouj duenh.

Gaijgwz hailangh mbawgeiz hoengz,

Hawj raeuz hwnjroengz engq miz sim;

Lohsienq Dangj raeuz daeuj ceijyinx,

Daengx guek lwgminz caez najrongh.

Mbwn hung mbouj beij aen Dangj hung,

Hawj raeuz vuenyungz miz fuk laux(hung);

Aen seizdaih moq youh boq hauh,

Bouxiq bouxlaux caez hwnjdin.

Ruz hung gaenq hai daengz gyang dah,

Yaek byaij baenaj baengh canghdox;

Vunzlai doxgiet hwnjfofo,

Haenq guh gyangzgoz(giengzguek) yungh goengfou.

Samcung Cienzhoih neiyungz lai,

Ngoenzneix daeuj baiz doengzcaez hag;

Giengz guek gensez ok rengz ak,

Bienh(danghnaeuz) cij gangj bak cix nguh saeh.

“Song aen veizhoh” aeu giendingh,

Geiqcing(ndei) “ song aen dinghlaeb” dem;

“Seiq aen cienzmienh” sim yaek nem(geiq),

Saehcingz yied hengz vunz yied maij.

Cienzhoih cingsaenz rongh lumj ndit,

Bouxminz daih’it yienghyiengh hingz;

Haeujlaeg gaijgwz ok 《Gietdingh》,

Youh caiq buekmingh caux ngoenzndei.

Cienzmienh haeujlaeg guh gaijgwz,

Mbawgeiz dwzswz(daegsaek) mbouj bienq saek;

Guh yendaiva engq hwnj mbaek,

Enj ai enj aek baefoedfoed.

Cienzhoih ciuhai yiyi gvangq,

Vilig yingjyangj daengx dienyah;

Saedyienh Cungguek yendaiva,

Sawj raeuz Cunghvaz engq fouqgiengz.

Haeujlaeg faensik vwndiz moq,

Gohyoz daeuj doq aen bugiz;

Hopheux cungjdij busuj ndi(ndei),

Loh moq cij miz heiqsiengq lengj.

Ndaem faex sien aeu miz rag ndei;

Hagsib cenzvei(cienzhoih) ca cingsaenz;

Cingsaenz sizciz geiq ndaej maenh,

Moegbiu sang daemq couh rox caez.

Guekcoj va hoengz mbinfwfw,

Haeujlaeg gaijgwz bae byaij loh;

Doenggvaq 《Gietdingh》 ganghlingj moq,

Caux hawj guekcoj engq vuenyungz.

Haengjdingh gaxgonq miz cingzcik,

Byaij roen mbouj mbit onj hwnj ciengz;

Doidoengh fazcanj gauhcizlieng,

Gunghcoz yienghyiengh souhaeuj daih.

Samcung Cienzhoih youh caiq naeuz,

Haeujlaeg gaijgwz mbouj bienq loh;

Cienzmienh fazcanj leixniemh moq,

Byaij onj diuzloh haenq dangqmaz.

Gaijfang swhsiengj aeu genhciz,

Sizsw giuzsi guh cij deng;

Gouz caen guh saed ceiq gvanhgen,

Fazcenj(canj) sevei swnghcanjliz.

Hungzyangz conzdungj gij youhsi,

Cidu dijci daeuj an gya;

Ceihleix naengzlig yendaiva,

Geizhoengz byadah mbinyagyag.

“Haj vih it daej” yaek doicaenh,

“Seiq aen cienzmienh” mbouj ndaej dingz;

Ginghci gaijgwz guh dazyinx,

Bouxminz fukheiq miz lai raeuh.

Muz fag giemq ndeu yungh cib bi,

Ginghci dijci caezcienz gauj(guh);

Gaenbonj cidu roengzdaeuj bauj(baujcang),

Giengzguek muzbyauh(moegbiu) yawj ndaej raen.

Sangcwngz gencuz yaek haenq guh,

Ginghci gihcuj aeu guh hingz;

Gak hangh fazcanj dox sizying(hab’wngq),

Dingh ok cidu guh baujcang.

Hidungj cizcwngz engq hwnj mbaek,

Doed’ok diemjnaek miz mbouj doengz;

Gaijgwz saedyauq mbouj hawj roengz,

Gak hangh yungzdoeng hwnjfoedfoed.

Haeujlaeg gaijgwz cungj moegbiu,

Neix dwg daeuzdiuz aeu genhciz;

Laebdaeb caezcienz fazcanj ndi(ndei),

Daegsaek cidu mbouj doenghyiuz.

Ginghci dijci cienz guh hingz,

Moegbiu ngeih lingz sam haj nienz;

Daegsaek cidu engq caezcienz,

Soujsien ceihleix naengzlig ak.

“Caet aen cisiuh” （聚焦） neiyungz ndi(ndei),

Ginghci dijci suijbingz sang;

Bouxminz minzcuj aeu fazcanj,

Vwnzva gyangzgoz(giengzguek) aeu hamjmauh.

Caj daengz laeb guek betcib bi,

Guekcoj gizgiz bienqvaq laux(hung);

“Caet aen cisiuh” gig cungyau,

Aen cungj muzbyauh baengh de baenz.

Gensez gyaeundei Cunghgoz moq,

Bingzan Cunghgoz yaek ca maenh;

Dangj raeuz lingjdauj guh ndaej haenq,

Saedcwng naengzlig engq daezsang.

Mienhdoiq bak bi daih bienqbuek(大变局),

Yaengx sang Cungguek daegsaek geiz;

Simnduj cunghcij cungj geiq ndei,

Mbouj ndaej doiqsaek yienghlawz nauq.

“Roek aen genhciz” dwg fapbauj,

Bouxiq bouxlaux geiq coq aek;

Gaijgwz hidungj daeuj hai mbaek,

Baihnamz baihbaek raemxciuz bongh.

“Cibseiq daihhangh” busuj ndei,

Youq gwnz seiqgyaiq raeuz angqyangz;

Mbawgeiz gaijgwz yaengx hwnj sang,

Guekgya fu’gyangz(fouqgiengz) vunz najrongh.

Samcung Cienzhoih youh hai roen,

Coux daeuj daengngoenz hoengzuu;

Vunzlai doengzcaez bae haenqguh,

Vid hwnj genbuh dawz rap naek.

Samcung Cienzhoih yinvu naek,

Aeu geiq coq aek mbouj gangj riu;

Mbouj guh Nanzgoz（南郭） luenh boq siu,

Mbouj guh Lauxniu(Yezgungh叶公) hoengq maij lungz.

Samcung Cienzhoih angj lumj gim,

Raeuz caez hai din riengz Dangj byaij;

“Caet aen cisiuh” baenz dahraix,

Cungguek gaiqgaiq ndei gvaq gonq.

Gaek nanz gung genq（克难攻坚） mbouj lau baeg,

Faet(fad) max buetbongh daih hwnj yamq;

Fwngz gaem bizbaz doengzcaez damz,

Fanh vunz doengz yamq bae baihnaj.

Cienzhoih cingsaenz yiyi naek,

Boux yungh sim laeg miz fukfaenh;

Song sam gawq vah gangj mbouj caenh,

Yaek roengz sim haenq yawj daengx bien.

Samcung Cienzhoih cingsaenz moq,

Dangj hai diuzloh doengzcaez byaij;

Sai mbwk laux coz bouxboux maij,

Gvaq yiengz gvaq haij gaej doxliz.

Saedyienh Cungguek yendaiva,

Baihgwnz baihlaj doengz ca ndei;

Gak hangh saehnieb guh hwnjbae,

Gwnzbiengz va maeq hai mbouj byaiz.

Samcung Cienzhoih rongh lwenqda,

Yinx raeuz Cunghvaz caiq hwnj mbin;

Veh mbaw doz gyaeu caez yungh sim,

Loqsiengj dingh hingz youq ngoenzcog.

Dangj cungjsuhgi fat hauhlingh,

Cunghyangh gietdingh yaek guh hoengh;

Betgveiq daihdeih caez hengzdoengh,

Riengz dangj haenq bongh bae baihnaj.

Namzhaij fubfab hwnj raemxlangh,

Dieg Bwzbuvanh sing fwen mbin;

Samcung Cienzhoih daeuj ceijyinx,

Namzguek itdingh engq ronghsag.

Mbouj saet seizgeiq bae doeksaed(lozsiz),

Gaijgwz gaenjmaed haeuj seizndei;

Soujcingq cauhmoq guh hwnjbae,

Gyaeundei Guengjsae ngoenzngoenz ak.

Bouxminz ndaej gvaq swnghhoz ndei,

Sim vuen sim heij angq dangqmaz;

Ngoenzngoenz cungj youq ndaw fwen gvaq,

Byaij doh dienyah cungj vuenyungz.

Dangj hawj raemxraiz va hai swenz,

Daengzcog bi’ndwen engq vannyiemh(diemz);

Caj daengz moegbiu caez saedyienh,

Raeuz hai sing ciengq sam haj ngoenz.