Vangz Gencingh caeuq Lij Danenz youq “ndei lajmbwn” gvet hoi haj bi lai lo, Cinz Giveih gig saenq songde, bi 2020 hongsaeh lai le, Cinz Giveih siengj bau gij hong gvet hoi okbae.

Lij Danenz ciengzseiz dwk denva hawj Cinz lauxbanj, bau hong dajcang guh daengz lawz. Ngamjhab, Cinz lauxbanj heuh de bae yawj dieghong moq.

Naengh youq gwnz ci lauxbanj, Lij Danenz bak lumj daz caengz youz ndeu, gangjvah lauzladlad, Cinz lauxbanj roxnyinh lajfwngz miz vunzcaiz yienghneix, guh noix ndaej lai, lumj hoenxciengq hoenx bak baez hingz bak baez.

“Lij saefouh, gou siengj bau doengh laeuz neix hawj mwngz caeuq Vangz saefouh guh.” Cinz lauxbanj naeuz.

“Ndei ha, dou itdingh guh hawj mwngz rimhoz!” Lij Danenz ndaw sim miz daej, yungzsim gig hung.

Cinz lauxbanj: “Bau hong mbouj bau liuh, moix bingzfueng cibcaet maenz, mwngz baema caeuq Vangz saefouh gangj, habguh couh guh, gaej auqmanz.”

Seiq

Sam doengh daihlaeuz hong gvet hoi sat, Cinz lauxbanj doenggvaq soujgih veihsin daj cienzgoeng hawj Lij Danenz、 Vangz Gencingh, youz songde fat cienzgoeng hawj gak boux gunghyinz.

Lij Danenz song gvanbaz daiq song lwgnyez bae laeng Vangz Gen- cingh guhcaemz, gyoengqde song ranz daj gap lauxdoengz doxdaeuj, ndaej hoengq couh bae cunz ranz doiq- fueng, gij gwn mbouj gangj, cujyau dwg gangjgoj. Vunz couh dwg yienghneix, ciengzseiz youq ndaw mbanj ndaw ranz at nanz le, baez byaij okbae, simcingz couh mbouj doengz, vahsug naeuz:“Baihrog gwnzbiengz gig ndei”, caen dahraix, dieg moq ronghda moq hoengheiq moq, gangjvah coenzcoenz moq. Yienznaeuz gapdoengz seiq bi le, song ranz baedauq lai baez, song fueng baezbaez raennaj baezbaez moq, daegbied dwg song boux vunz- mbwk, gijvah gyoengqde lumj raemxrij lae mbouj dingz mbouj duenh.

Haj boux lwgnyez, Lij Danenz song dah, Vangz Gencingh song daeg dah ndeu, gyoengqde youq laj gofaex guh yahndoj, hemqhemq riuriu, roegbang gwnz faex hix gaendwk hemqcaca, youq gwnz nyefaex saet bae saet dauq. Vangz Gencingh caeuq Lij Danenz youq ndaw ranzdajcawj ciencien caujcauj, noh hom byaek rang, gij heiq hom yawj mbouj raen haenx daj bakdou mauh okdaeuj, roeg gwnz faex mup dawz le caemh roengzdaeuj, duzduz cungj ndwnj myaiz.

（3）