Doenghbaez giz meh caeuq daeglwg youq nit raixcaix, mbouj miz raemx, mbouj miz feiz. Meh naemj daiq daeglwg byaij ok giz nitgyaengj neix.

Gyoengqde hwnjroen lo, gyaeuj daenj gyaep, re fwn rwed, re roegga yiuhyak caegguk hoenx; ga daenj haiznyangj, re nam coeg meng camx; fwngz gaem diuz faex damq roen, youq gwnz roen raen ngwzdoeg laengz roen couh moeb, raen nywj、gaeu lanz couh deuq bae; ndaw baufug dwg gij mak yw iek.

Gyoengqde byaij ndaej sam cien sam bak samcib sam ngoenz, daeuj daengz giz miz sam cien sam bak samcib sam diuz dah ndeu. Daeglwg angqfwng naeuz daxmeh: “Meh ha, gij raemx raeuz yaek ra haenx ra raen lo, raeuz couh youq gizneix youq ndaej lwi?” Daxmeh daengx roengzdaeuj sijsaeq baez yawj, cijraen raemxhung goenjhuhu, dumh doengh dumh bya, rumz bongj raemx goenj lumj duz iugvaiq heuh, raemx yaep ndeu hwnj yaep ndeu roengz, mbouj miz saek seiz bingzdingh, youh nding youh henj. De bibi gyaeuj, doiq daeglwg naeuz: “Gizneix dan miz raemx, mbouj miz feiz, mbouj miz daengngoenz, youq mbouj ndaej.” Gangj liux youh daiq daeglwg hwnjroen lo.

Gyoengqde youh byaij ndaej sam cien sam bak samcib sam ngoenz, byaij gvaq fouzsoq byasang caeuq dingh, mbouj geijlai nanz couh daeuj daengz giz bya remj dat daengj、 rin remj doem remj、 mbouj miz doenghgo maj ndaej ndeu. Laj namh nanz mbouj nanz miz baenz raq baenz raq hoenz- ndaem feizhaenq bongj hwnjdaeuj, feiz bonghhuhu, daj gizneix coemh gvaqdaeuj, youh riengz rumz daj gizneix coemh gvaqbae, rin hix deng coemh baenz daeuh. Daeglwg yawj- raen feiz, faengzfwt naeuz daxmeh:“Meh ha meh, neix mbouj dwg gij feiz raeuz yaek ra ha? Raeuz ra raen lo, raeuz couh youq gizneix youq ndaej lo!” De ngamq gangj sat, raq feizhaenq ndeu daj ndaw congh laepngau laj namh bongj hwnjdaeuj, coemh coh de, danghnaeuz mbouj dwg meh gibseiz rag de doenq laeng, bwnda de couh deng coemh bae liux lo. “Neix mbouj dwg giz raeuz ra, raeuz laebdaeb byaij roengzbae!” Daxmeh gangj sat youh daiq daeglwg hwnjroen lo.

Gyoengqde daeuj daengz ndoeng faex ndaetndwtndwt ndeu, ndoeng faex neix mbaw loenq na baenz sam cik, nyefaex dingj mbwn, rag faex goemq deih, daxmeh caeuq daeglwg byaij ndaej sam cien sam bak samcib sam ngoenz, cij byaij ok ndoeng faex neix. Baihrog miz nditndat raeujrub, raemxrij laecece, rumz unqswnh, gwnz bya miz faexheu, lienzdaemh mbouj duenh. Daxmeh ok rengz dem gaemz heiq ndeu, angqfwng naeuz daeglwg:“Lwg ha lwg, giz raeuz yaek ra ra raen lo, raeuz couh youq gizneix youq lo!” Yienghneix song mehlwg couh doengh fwngz daeb ranz caux rug, haifwz caux reih. Hoeng gyoengq- de baenzneix guh, cauz daengz gij doenghduz hunghung iqiq gwnz bya lo, gyoengq doenghduz haenx comz youq giz ndeu, naeuz vunz ciemqfamh giz gyoengqde lo, yaek gunghoenx vunz. Daeglwg rox le, daeuj cam daxmeh naeuz:“Raeuz wnggai baenzlawz guh?” Meh hawj de bae ra di nywjroz ndeu daeuj, yungh rin gaek ok feiz, diemj dawz nywjroz, coemh hwnj dong feizhung ndeu. Liuxle daxmeh youh gaem hwnj bog feiz ndeu, bae diemj dawz mbiengj bya gyoengq doenghduz comzyouq haenx. Feiz yied coemh yied haenq, gyoengq doenghduz raen le, lau dwk ndonj bae bongh dauq. Daj neix hwnj, doenghduz baez raen vunz couh deuz bae vaiqvet, daxmeh caeuq daeglwg couh youq gwnz bya coemh gvaq haenx haifwz dajndaem.

（1）