Daj iq gou couh geiqmaenh gij vah bohmeh: Cijmiz doegsaw, gyaez doegsaw, cijndaej daj ndaw mbanj byaij okbae, gaijbienq aen minghyinh vunzguhnaz——Naj coh namhhenj laeng coh mbwn, guh dai guh lix mbouj gaeuq gwn. Gou hix geiqmaenh coenz vah lauxsae: Ndaw saw gag miz ranz gim, ndaw saw gag miz naj lumj nyawh. Ndigah gou daj nyinh cih couh geqnaeuz swhgeij aeu gyaez doegsaw, bik swhgeij aeu lai doegsaw. Menh- menh majhung, gou doegsaw yied daeuj yied lai, miz sanjvwnz, miz sawcuenh…… Gou ciemhciemh daj ndaw saw ra raen sim’angq, gip ndaej soengswt, hawj aen sim nyaengqnyat naiqnetnet gou ra ndaej aen dieg daeuj yietnaiq yietbaeg.

Miz baez ndeu doeg daengz saw Sanhmauz, gou lumz gwn lumz ninz, ngoenzngoenz ciq bonj saw Sanhmauz ma doeg. Gij cih laj bit Sanhmauz hawj gou sim feififi, hoenz mbinfafa. Coenz vah: “Boux vunz ceiqsiuj aeu miz aen loqsiengj ndeu, miz aen lijyouz ndeu bae giengiengz. Langh ndaw sim mbouj miz gizdieg yietnaiq, bae daengz gizlawz cungj dwg louz- langh.” Coenz vah neix hawj gou hai da nam, laep da niemh, hwnz siengj ngoenz niemh le haujlai nanz.

Baez yaepda, 8 nyied youh yaek byaij daengz byai. Gyajseizndat gvaq- bae, aen yozgiz moq couh daeuj daengz lo. Siengj mbouj daengz youq yozgiz moq yaek haihag, gou youh ra ndaej aen dieg wnq hawj aen sim yietnaiq. 8 nyied 28 hauh, hagdangz cujciz gyoengq lauxsae youq aen ranzveiyi hwnjdangz beizyin cwngci yozsiz.

Yaeb lwgfwngz suenqsuenq, gou dang lauxsae ndaej ngeihcib lai bi lo, gak cungj beizyin moix aen yozgiz cungj mbouj noix, gak cungj gyangj- co moix bi hix dingq gvaq haujlai, hoeng moix baez beizyin gvaq le, gij neiyungz beizyin cungj dwg “raemx gvaq laeng bit”, didi riz bae cungj mbouj louz miz. Doengh gij yaenq- siengq conhgyah louz youq ndaw sim gou cungj dwg aen yiengh ndeu: Naengh dwk hwet daengj mbaq bingz, song da yawj dwk gij cih gwnz PPT, ciuq saw nam ging, ciuq cih ra gaen ra gawq, hai bak haep bak caenh dwg gij vah conhyez hawj vunz dingq mbouj rox, naemj mbouj doeng, coenz lijlun ciep coenz lijlun nam roengzbae…… Dingq mbouj daengz cib faen cung, vunz couh lumj dingq go coi ninz nei, ciemh- ciemh raurumz raninz, gyaeuj ngunh da sej. Gyangjco sat le hix mbouj geiq ndaej geijlai coenz dwg conh- gyah naeuz, geijlai gawq dwg conh- gyah gangj, roengzdangz le hix couh dwg “vunz bae riz mbouj louz lo”.

Dingqnaeuz baez gyangjco neix dwg boux yaucangj mizmingz Laiz- binh——Vangz Vaizfangh daeuj hwnjdangz. Vangz yaucangj dwg yaucangj Laizbinh Si Daihroek Cunghyoz. Geiq ndaej haet beizyin haenx, dou ciuqseiz daengz ranzveiyi gyoebcomz. Gou haeujsim miz boux najseng ndangdaenj cingjcaez ndeu soengz youq bakdou ranzveiyi, naj riunyumnyum dwk coh dou ngaek gyaeuj. Hwnjdangz le gou cij rox boux najseng neix couh dwg Vangz yaucangj. Neix dwg gou baez daih’it raen Vangz yaucangj. Vangz yaucangj youq gwnz daiz najriu unqswnh, singriu sangjswt, gou nyinhnaeuz baez neix wngdang dwg baez gyangjco hawj vunz gangj hwnjdaeuj yinxsubsub gig miz feih ndeu.

Aen gyangjco Vangz yaucangj, gungh miz 117 mbaw PPT, cih doz anbaiz habdangq, yienznaeuz mbouj suenq gyaeundei, hoeng miz cwngzsw, neiyungz baez yawj couh rox. Seiz hwnjdangz, de mbouj dwg ciuq saw nam ging, moix gangj daengz aen gvanhdenj, de cungj daj ndaw ndwenngoenz、gwnz ginglig caeuq gij ginghyen swhgeij bae ra saehlaeh, gangj ging raih leix, sengdoengh mizyinx. Vangz yaucangj dwg son suyoz, de ceiq maij yungh laeh daeuj cungjgez gviloih, de nyinhnaeuz moix gienh saeh cungj ra ndaej ok gvilwd daeuj gangjgaij, haujlai coenz cezlij seiqvunz de cungj swnhfwngz dawz daeuj, coenz vah bingzbingz ciengz- ciengz, daj aen bak de baez gangjgaij, gyoengqdou naengh baihlaj cungj caemh sing：“O! O! Wn! Wn! A! A……” Hemq dwk han naeuz. Dou dingq ndaej rwz bi, han ndaej sing coiq, riu ndaej sing gienj, haujlai vah bingzciengz lumjnaeuz ngoenzneix caengj roxyiuj.

Vangz yaucangj haujlai baez cungj gangj daengz de dwg daeglwg vunzguhnaz, ndigah de gangjriu naeuz de dwg vunz doj vah hix doj, coenzcoenz miz feihdauh lajmbanj. De cungjdwg yungh gij saeh dang- dieg daeuj gangj dauhleix labcab, caemhcaiq de bak youz bak vad, gij sing de youh gag daiq youhmwz, hawj dou nanz mbouj nanz youh riu dwk got dungx raemxda lae. Sing hung riu gvaq, gij gvanhdenj haenx couh lumj rumzcin raeujrub ci haeuj ndaw sim dou. Mbouj yungh geijlai nanz, gij gvanhdenj Vangz yaucangj itdingh vaq haeuj sim bae, vaq baenz hengzdoengh dou.

Dingq dwk gij sing unqswnh Vangz yaucangj, yawj dwk aen yiengh hozunq Vangz yaucangj, hawj vunz nyienh caenneb, de youq gwnz daiz seiz naengh seiz soengz, seiz riu seiz dingj gemj…… De gangjbyatbyat, unqnemnem, duek dwk sim gou mbinfefe: Seizneix Vangz yaucangj couh baenz aen daengdap banhaemh, de ndongqsagsag, ciuq rongh diuz loh ngutngeuj gumzgamx sonhag gou; de couh baenz aen doxgaiq gag rox fat rongh ndeu, gij rongh de lwenqda raeujrub, hawj aen sim gou rongh- sagsag, soengsatsat…… Aen gyangjco neix song aen cungdaeuz, lumj ngamq yaepyet couh sat lo, mbouj miz gij vah gikdoengh, cij yungh gij vah bingzbingz ciengzciengz gangjmbet- mbet, couh hawj dou lumj raq rumzcin, daengx ndang soengswt seuqcingh, gagsaenq goksatsat.

Vangz yaucangj gangj:“Dang lauxsae aeu miz yiedcingz, ngoenz- ngoenz cingsaenz cibcuk……” “Langh bouxde doiq aen gwnzbiengz yienh ok sam yiengh ‘yiedcingz、 soengyungz、 caensienh(caencingz caeuq simsienh)’, mboujlwnh de youq gizlawz, de cungj dwg boux ceiq souh vunz angqcoux.” “Boux vunz maenhndei bietdingh aeu miz ‘sam yied’——Yiedsim! Yiedlwed (lwedndat)! Yiedcingz!” “Seiqvunz, fuengyiengq deng lo, muzbyauh cinj lo, sinhdai cingq lo, yienghyiengh cungj swnh lo……” Dingq le gyangjco Vangz yaucangj, gou mingzbeg aen leixniemh ndeu: Sim aeu cingq, doiq ndwenngoenz aeu yiedcingz, doiq bouxwnq aeu yiedcingz, doiq hong swhgeij engq aeu yiedcingz.

Geiq ndaej miz boux daihsae cezyoz ndeu gangj gvaq: “Sengmingh bonjfaenh couh dwg mbaw ceij hoengqhanghang ndeu, caih mwngz youq baihgwnz baenzlawz veh baenz- lawz sij, mwngz simnyap couh veh simnyap hwnjbae, mwngz sim’angq couh sij sim’angq hwnjbae, mwngz vuenyungz couh veh vuenyungz hwnj- bae……” Gizsaed, simnyap cungj mbouj dang ngoenzngoenz miz, vuenyungz hix mbouj dwg cungj mbouj youq henz ndang. Couh lumj faenh hong son’gyauq, raeuz gaej doengh mbouj doengh couh yawj hong baenz gienh saeh simnyap ndaw ndwen- ngoenz, langh mwngz yungz hong haeuj ndaw saedceij, yungz haeuj aen sim, dangq de baenz gienh saeh sim- angq ndeu, yienghhaenx raeuz couh bietdingh simgam cingznyienh bae okrengz, cix ndaej yungh aen sim cang rim yiedcingz bae gamjsouh gij ndwenngoenz lai saek. Dozwj Swhdai gangj gvaq:“Bouxvunz de langh mbouj miz yiedcingz, de couh guh mbouj baenz saek gienh saeh. Aen giekdaej yiedcingz couh dwg miz cwzyinsinh.” Doiq hong fucwz, doiq ndwenngoenz fucwz, doiq moix boux vunz henz ndang fucwz. Bouxvunz doiq ndwen- ngoenz yiedcingz, itdingh dwg boux- vunz gig miz cwzyinsinh, hix itdingh dwg bouxvunz gig miz rengzcingq.

Caeklaiq boux yaucangj dou lumj yiengh Vangz Vaizfangh yaucangj, miz yiedcingz, miz rengzcingq, miz cwz- yinsinh. Gyoengqde yungh cwz- yinsinh naekgywg caeuq cwzyinganj sangngau yingjyangj gyoengqdou, hawj dou hix gaen dwk doxhwnj bienq sang, doxbae bienq raez.

Canghcezyoz Dwzgoz Yajswh Beiwjswh gangj gvaq: “Bonjciz son- gyauq couh dwg go faex ndeu ngauz doengh lingh go faex, duj fwj ndeu doidoengh lingh duj fwj, aen hoenz- vunz ndeu heuhsingj lingh aen hoenzvunz.” Gij gyauyuz Hinghbinh Gih raeuz miz gyoengq bouxdaeuz sonhag rengz rimbywd, gyoengqde yungh daidoh cingqsoh seiqvunz diemj rongh gij yiedcingz gyoengqdou, heuhsingj gagsaenq ndaw sim gyoengqdou: “Gou naengz guh, gou naengz bae, gou naengz rap, gou caen dwg naengz guh, lij caen dwg naengz guh ndaej gig ndei!”

Baez gyangjco neix, singriu mbouj duenh; baez gyangjco neix, miz yinxdaeuz raixcaix; baez gyangjco neix, sengdoengh mizyinx; baez gyangjco neix, gyoengq lauxsae cungj iet hoz raezramram、ngeng ndang daengx da dingq ngaezngwd; baez gyangjco neix, hawj aen sim gou ra ndaej aen dieg daeuj yiet soengswt. Baez gyangjco neix sat, gou caegcaeg roengz gietsim: Daj neix roengzbae, aen sim sonhag gou mbouj caiq louzlangh!