, dwg dangdieg cungj hingzsik caencik beixnuengx dox- heuh haenx, youq Majsanh、 Duh- anh riuz gig haenq, beixnuengx ceiq caen, daihngeih dwg caencik, daihsam couhdwg lauxdoengz. Vunz- sug caeuq baengzyoux ndawde, miz gijmaz saehcingz heuh hix ndaej, mbouj heuh hix ndaej, hoeng lauxdoengz bietdingh heuh, gij caen haenx mbouj daemq gvaq caencik beixnuengx.

Lauxdoengz couhdwg beix- nuengx gietbaiq, gyaez doiqfueng couh caensim saed’eiq ciepsouh doiqfueng.

Song lauxdoengz youq gwnz dieghong guhhong, bungz daengz gij hoj guh haenx, song vunz yaeng baenzlawz guh, Cinz lauxbanj gig yawjnaek songde, hawj songde daiq- ban, fucwz guenjleix dieghong, gij gunghyinz couhdwg vunz song mbanj gyoengqde, mizdi dwg caencik、 baengzyoux, daihgya doxyouq huz- ndei, lumj ranz vunz ndeu, guhhong caezsim gaprengz, gaprox baenzlawz guh vaiq guh ndei.

Lij Danenz samcib haj bi, noh hausag, fouq heuj de bingz youh hau, naj cih “田”, bwn’gyaeuj ndaem lumj maeg, bingzciengz de gyaez roi bwn’gyaeuj gvaq song mbiengj bae, danghnaeuz daep gingqda, caen lumj boux lauxsae, de ak gangj ak buek, byawz dingq de gangj yaep goj, youq ndawsim couh haenh de dwg boux vunz coengmingz、hozswnh gaenh- vunz, gangjvah coenzcoenz miz leix, sing’yaem gangjvah doek gwnz namh bienq baenz singgang danz hwnjdaeuj gokladlad, baenzbaenz, de dwg boux vunz saenq ndaej gvaq haenx, youq baihrog gyau baengzyoux dij, youq ndaw mbanj dwg beixnuengx ndei.

Sam

Cinz lauxbanj dwg vunz Laizbinh Si, hajcib lai bi.

Ngeihcib bi couh daeuj Namz- ningz dajgoeng, mwh ngamq daeuj buenq bi gonq de bang saefouh gvet hoi gyaux hoi, fwngz gaem diuz faex hung raez lumj gaenzgvak ndeu, youq ndaw doengj cuengq seiqcib gaen faenjsanghfeih, gya ngeihcib gaen raemxsaw, seiq gaen raemxgyau, song fwngz gaem ndaet faex yungh rengz nyoeg bae nyoeg dauq, dwk daengz gyaux doengj hoi haenx yinz lumj namhboengz, dawz caxhoi daek hwnj cat youq gwnz ciengzmienh mbouj loenq roengzdaeuj, doengj naez neix caengh naeuz gyaux baenz. Doengj naez neix gyaux baenz aeu buenq diemj cung.

Buenq bi, it bak betcib ngoenz, ngoenzngoenz gyaux hoi, song fwngz mazmwnh, song gen foeg le, aeu yw cat, ndwen gvaq ndwen, ngoenz doek ngoenz, gunghcangj dauqdaej cauh ok gihgi dendung gyaux hoi lo, daeg hauxseng Cinz Giveih lumj duz vaiz ndeu baenz ngoenz cae naz ndaej duet ek. De riengz saefouh hag rox gvet hoi, bi daihngeih couh baenz saefouh, geij bi gvaqbae, de sug naengz baenz giuj, swhgeij gag bauhong, ra ndaej cienzngaenz le, youh ciq beixnuengx aeu di, gag hai gunghswh guh hong dajcang, de yied guh yied hung.（2）

Lauxdoengz