Henz dah ndoek geq hwnj rangz moq,

Minzcuz vwnzva goq swnjcienz;

Fukhwng Cungguek yaek ciengq yiengj ,

Dang riengj bouxciepban seizdaih.

Vah cungjsuhgi raeuz geiqmaenh,

Minzcuz vwnzva gaenq fukhwng;

Daj iq gaenx hag giekdaej rwng,

Haet ndaej cengjhwnj bouxciepban.

Haj gangj seiq gyaeu sam ndiepgyaez,

De dwg baiz raez raeuz cijlu;

Haenqrengz hagsib caez cinbu,

Muenxsim guh ndei byaij baenaj.

Guekgya minzcuz miz loqsiengj,

Lwgnyez giengz daeuj guekgya ak;

Miz lijsiengj couh caezheiq ak,

Guekcoj gak boux cauh ronghsag.

《Dang Ndei Bouxciepban Seizdaih》dan miz roek souj fwen, hoeng yaek hawj hagseng geiq hwnjdaeuj saedcaih hoj lai ha.

Gyanghaet gwn ngaizromh le, gou itcig youq ndaw fuengz gou baenz coenz baenz coenz son gyoengqde, naengzlig ciepsouh hagseng ca lai, cungj geiq mbouj ndaej.

Banringz gou youh louz gyoengqde roengzdaeuj laebdaeb lienh. Lienh daengz coenz daihngeih, coenz daih’it youh lumz lo. Hoj lai lo, baenzlawz guh ne?

Gozging cuengqgyaj le, vunz cungj bae diegrog lijyouz. Gou miz gienh saeh neix youq ndaw hoz, gizlawz cungj bae mbouj ndaej, ngoenzngoenz bae hagdangz daiq hagseng lienh.

Caj daengz gyoengqde ciengq sug le, lij gya dungcoz diuq foux dem, baez gya dungcoz diuq foux, gyoengqde youh lumz ciengq fwen.

Vunz ciengz naeuz: Boux vunz raeuz mbouj miz geijlai naihsim. Gou hix ityiengh, gou siengj vut gienh saeh neix mbouj guh lo. Gvaqlaeng gou youh gag naemj: Mbouj ndaej bw, gou guhsaeh soqlaiz miz gyaeuj miz rieng, baezneix baenzlawz couh yienghneix guh daengz gyang couh cuengq? Caiq gangj baez doxdax neix aiq dwg cien bi bungz mbat ndeu, gihvei nanz miz, caj daengz “ngwz gvaq cij mboengj namh, sau haemj cij muengh ngaeuz” couh swhgeij gag yienq lo.

Ngeix bae ngeix dauq, gou couh haeb heuj guh, mboujlwnh geijlai dwgrengz, lienh bae lienh dauq, ngamq hwnj lwgda, couh bae camgya doxdax lo.

Cien ngeix mbouj daengz fanh ngeix mbouj daengz, baez doxdax neix dou ndaej ngeih- daengjciengj.

Baez daih’it neix, soemj van haemz manh miz rim ndaw sim gou; baez daih’it neix hix itdingh hawj seiqvunz gyoengq hagseng gaek gij geiqhauh engq laeg.

（2 sat）