10 nyied 19 hauh, ciet makndae Gveilinz Gunghcwngz gaiq daih 21 nem 2024 nienz Betgveiq gohbuj daih hengzdoengh Gunghcwngz hai- nduj yizsiz hozdung youq Lenzvah Cin guh.

Ciuq cam rox, bineix ciet makndae daj 10 nyied 19 hauh hainduj, itcig daengz 2025 nienz 2 nyied 15 hauh, duenh seizgan neix yaek banh aen hozdung langhbaij mbawsiengq “yawj Gunghcwngz”、 haw gai huq miz daegsaek Gungh- cwngz、 cigboq gai huq daengj, hawj bouxhek lai rox gij daegsaek gag miz Gunghcwngz.

Gunghcwngz Yauzcuz Swciyen miz aen cwngheuh “aen mbanj makndae Cungguek”, daj 2003 nienz doxdaeuj, Gunghcwngz gaenq banh baenz 20 gaiq ciet makndae. “Ciet makndae Gunghcwngz” baengh “cimz makndae Mbanjyauz、yawj funggingj suen makndae、gwn youzcaz Gungh- cwngz、youq ranzmbanj swnghdai” guh daegsaek, doicaenh gij canjnieb makndae Gunghcwngz caeuq swngh- dai、vwnzva、lijyouz daengj canjnieb yungzhab hwngfat, guhbaenz diuz lohsienq ndei baeyouz lajmbanj.

Seizneix, Gunghcwngz ndaem makndae najdieg ca mbouj geijlai 24 fanh moux, baenz mak daih’iek 87 fanh dun, bi gai baenz cienz daih’iek 74 ik maenz, aeu makndae gyagoeng baenz huq gyalai lo, huq dij cienz hix gyalai, gij canjnieb makndae hawj gak cuz vunzlai lai miz ngaenz roengz daeh.

（Sinhvazse）