Vunz cungj naeuz, nou caeuq nou guhbang，yiengz caeuq yiengz guhdoih. Boux gwn laeuj maij ra boux gwn laeuj doxcomz，boux doegsaw maij ra boux doegsaw guhdoih. Gou couh miz bang youxdoih ndeu, gyoengqdou cungj maij doegsaw, maij sij faenzcieng. Haidaeuz dou youq gwnz vangjloz doengz giz ndeu fatbiuj faenzcieng cij dox roxnaj, doeklaeng guh aen vwnzyoz QQ ginz ndeu, fuengbienh vunzlai doxcam doxhag.

Gyoengq muengxyoux neix, nienzgeij mbouj doengzsaemq, gag boux gag beizheiq, gyoengqdou youq gwnz vangj gangjgoj daujlun, mizgwq doiq gienh saehcingz ndeu yawjfap mbouj doxdoengz, daihgya ceng dwk najhoengz rwzdit, daengz doeklaeng youh dauq daengz diuz roen ndeu, gaemfwngz huzndei.

Gyoengq muengxyoux neix boux- boux vunzraeh youh ndeigyaez, boux- boux miz dungxcaiz, daihgya cungj miz giz doxdoengz ndeu, couh dwg sim ndei、vunz soh、maij bang vunz. Gou youq ndaw ginz nanz le, hix bienq sim’angq haujlai, caeuq gyoengq muengxyoux hix gyau baenz baengzyoux ndei lo.

Codaeuz dou cij youq gwnz vangj gangjgoj, laj vangj caengz doxraen nauq, danghnaeuz youq gwnz haw doxbungz, gyaeuj doxdaemj cungj mbouj roxnaj. Daengz doeklaeng, vunzlai doxiu ndei, youq laj vangjloz doxcomz mbat ndeu. Ngoenz doxcomz haenx, gyoengq muengxyoux youq baihrog ganj dauq lo, gyoengq youq bonjdeih haenx hix daeuj daengz caez lo. Cibgeij boux youxginz raennaj couh baenz vunzsug, doengzcaez naengh roengzdaeuj gaemfwngz gangj- goj, gwn caz gwn laeuj, dox soengq va soengq saw, sim’angq lumj vahai. Daengz seizneix, gyoengq youxginz cungj roxnaj caez lo.

Gvaqlaeng, dou ndaejhoengq couh doxcomz, doengzcaez naengh yaep, gwngwn caz, gangjgangj goj, riuriu angqangq, doxyawj gij faenz- cieng gak boux, doxhag baenzlawz sij cij engq ndei. Seizhaenx, dou gig simhai, gijmaz saeh fanzsim cungj mbin deuz lo!

Gyoengqdou doxcomz, mboujgag vih gangjgoj simhai, hix mboujgag vih doxhag sij faenzcieng, dou lij caemhcaez bae bangcoh bouxwnq, guh haujlai saehndei, gij saehndei haenx hawj dou sim’angq, gim ngaenz hix cawx mbouj ndaej faenh simhai neix.

Singz baihrog miz aen hagdangz iq ndeu, hagdangz baihnaj gyawj goengloh, baihlaeng dep diuz dah ndeu. Gou gaenq gvaq roen gizde fouzsoq mbat, hix cim de fouzsoq mbat, gou gangjnaeuz aen hagdangz neix caeuq gij hagdangz iq lajmbanj de mbouj miz gijmaz mbouj doengz：Aen laeuzsonhag ndeu, aen laeuz- rugninz ndeu, aen ranzgwnhaeux ndeu, caeuq bang lwgnyez ndeu. Aen hagdangz neix heuhguh Gujbuz Siujyoz.

Gou siengj mbouj daengz ndaw Gujbuz Siujyoz miz gyoengq lwgnyez daegbied ndeu. Miz ngoenz ndeu, aen ginzvwnzyoz miz boux youxginz heuhguh Susu ndeu, lwnh gou naeuz, aen hagdangz neix, geiq youq bak lingz bet boux lwggyax hagseng. Seizneix, seizhah daengz lo, haujlai lwggyax mbouj miz haizliengz daenj, rugninz hix mbouj miz sacueng, banhaemh gyoengq lwgnyez deng nyungz haeb imq bae.

Gou dingqnyi le, doeksaet yat, sim’in gyoengq lwggyax lai lo. Gou naemj, raeuz ndaej bang gyoengq lwggyax neix guh di gijmaz ne? Susu caeuq gou ngeix doxdoengz, dou song boux couh hainduj doxyaeng baenz- lawz guh.

Dou caenndang bae daengz Guj- buz Siujyoz, caeuq lauxsae guhdoih bae it boux lwgnyez it boux lwgnyez cam gyoengqde haiz daenj geijlai raez, it aen rugninz it aen rugninz rau ndei cikconq doucueng, dauqma suenq bae geijlai cienz, cij youq ndaw ginz caeuq vunzlai doxyaeng.

Gyoengq youxginz gig doengzeiq guh gienh saehndei neix, bouxboux gaenxmaenx ok cienz ok rengz, mbai Susu caeuq Genjdanh bae cawx haiz, Siujbwz bae cawx sacueng caeuq dietsienq. Mbouj geij ngoenz, doxgaiq couh bwh caezcienz lo.

Nda’nduengq cingcuj caez, gyoengq youxginz bonjdieg couh bae Gujbuz Siujyoz yawj gyoengq lwg- gyax lo. Ngoenzhaenx, loeg nyied ndit cingq ndei, gohaeux youq ndaw naz maj, dujva youq gwnz go hai, mbawheu youq gwnz nye bi, aen mak youq gwnz nga giet. Nditndat hix ciuq aen yozyau neix raeujrubrub. Ndaw yozyau va hai rangfwtfwt, dieg baet ndaej seuqsaksak, laeuzsonhag youh gvangq youh rongh, ranzgwn- haeux、 ranzrugninz gig caezcingj. Gyoengq lwgnyez raen dou daeuj daengz, bouxboux cungj roxsoq, riu- nyingnying caeuq dou doxdongx. Baenz aen yozyau angqyang’yang.

Gyoengqdou daeuj daengz couh doenghfwngz guhhong, vunzsai bae haeuj sacueng, vunzmbwk fat haiz hawj lwgnyez. Siujbwz caeuq Suh lauxsae daiq geij boux hagseng sai hung, lid gvaenghcueng roengzdaeuj, an sacueng hwnjbae. Dou vunzmbwk caeuq boux lauxsae gwndaenj ciu gyoengq lwgnyez daeuj lied doih, daj iq daengz hung lied ndei, bang gyoengqde sawq haiz moq, sawq hab couh mbatdog daenj bae.

Gyoengq lwgnyez ndaej daenj haiz moq, angq lumj duz roegmbin, giggig gyatgyat, gangjgangj riuriu, saetsaet diuqdiuq. Raen gyoengq lwgnyez baenzlai angq, dou caemh daj ndaw sim angq, hanh dumz ndang hix mbouj guenj lo.

Fat haiz moq sat, gyoengq lwgnyez daiq dou bae cazyawj rugninz. Ndaw ranz aen gaqhaiz baijcuengq caezcupcup, aen goujcungh、 ngazcat、 doengjraemx、 batnaj、 sujbaq, hix baijcuengq caezcupcup, deihbanj seuqsak lumj gingq, moix aen mbonq sou ndaej seuqsaksak, gwnz mbonq denz daeb cingq lumj gaiq daeuhfouh. Gij rugninz neix caen cwxcaih lai lo!

Dou daj ndaw sim vih gyoengq lwggyax neix angq. Gyoengqde seng daeuj mingh mbouj ndei, bohmeh dai vaiq bae mbwn, ce gyoengqde baenz lwggyax. Hoeng gyoengqde youh dwg minghndei he, seng youq seizdaih moq, guekgya caeuq gwnzbiengz cungj daeuj habrengz bangcoh, hawj gyoengqde miz haeux gwn, miz ranz youq, miz buhvaq daenj, miz saw doeg, hawj gyoengq lwgnyez lai majhung baenzvunz. Gyoengqde ndaej vunz- biengz ndiepgyaez, couh lumj go’gyaj ndaej nditndat ciuq, di ndit ndeu hix ndaej raeuj sim lo.

Gij saehndei neix, daengz doek- laeng, aen ginz dou doengzcaez bae guh mbat dam mbat.

Dou ndaejnyi vunz naeuz Canh- yingz Ginglaujyen miz cib boux vunzgeq, gyoengqde mboujmiz lwg hix mboujmiz lan, miz boux dafangz, miz boux rwznuk, miz boux ngoemx, miz boux dinfwngz raekgoenq. Seiz- doeng yaek daengz lo, dou comz- ngaenz cawx buhfaiq na、 haizmienz、 madna、 mauhlangj, soengq bae hawj gyoengqde, bouxboux cungj ndaej caez. Dou bang gyoengqde baet rug、 fong buhvaq、 coih gyadienh、 guhsaeg、feigyaeuj、 raed ribfwngz, buenx gyoengqde gangjgoj……

Daengz gouj nyied cogouj ciet bouxgeq, dou youh comzngaenz cawx noh cawx byaek, cawx haeux cawx youz, bae ginglaujyen yawj gyoengq bouxgeq. Dou baet gyanghongh seuqsaksak, buen aen daiz mwnz- hung daeuj, doengzcaez bau gyaujswj, caeuq gyoengq bouxgeq doengzcaez gwn, nauhyied angqyangz gvaq ciet. Ginglaujyen miz boux daxau ngoemx ndeu, ceiq muengh dou bae lo. Moix baez rox dou yaek daengz, de couh baet seuq gyanghongh, baij daengq ndei caj dou, raen dou couh angq dangqmaz, gaem fwngz dou hemq vuvu vava, lumjnaeuz raen vunzcaen, vah ndaw sim gangj mbouj rox liux. Raen gyoengq bouxgeq baenzlai simhai, dou couh sim’onj lo.

Dou lij daengz Lungzhungz Siujyoz aen hagdangz ndaw rungh gig gyae haenx bae, soengq saw、 soengq bit soengq bouh、 soengq lanzgiuz、 soengq haizliengz hawj gyoengq lwg- nyez ndaw rungh…… Caeuq gyoengq- de doengzdoih guh’angq、 dwk lanz- giuz、 dwk binghbanghgiuz、 diuq cag. Gij lwgnyez ndaw rungh, ndaej gwnhoj gwnhaemz, lumj rinbya geng, lumj go haeuxyangz maj, di he cungj mbouj lau vunzseng, yaephe couh caeuq dou doxsug lo. Gyoengqde heuh dou bae yawj rugninz, caeuq dou lwnh ngeix, majhung yaek guh gijmaz, lij heuh gou aeu bonjbouh geiq gij loqsiengj gyoengqde roengzdaeuj, naeuz caj daengz gyoengqde majhung caiq dauq yawj, gij loqsiengj gyoengqde saed- yienh roxndwi. Gyoengqde beng dou doengzcaez hab’ingj, bouxboux naj riu lumj va, mbouj miz saekdi youheiq.

Ranzranz miz lwgnyez, bouxboux cungj rox geq, bouxgeq muengh miz vunz buenx gangjgoj, lwgnyez muengh byaij ok ndaw rungh bae, bae coh seiqgyaiq hung. Dou yienznaeuz vunz noix rengz iq, hoeng hix yunghsim bang gyoengqde saedyienh maq- muengh.

Soengq va hawj vunz fwngz hix hom. Gyoengq youxginz dou cungj mbouj dwg vunzmiz, cij dwg gyoengqvunz simndei simsoh haenx, yawj mboujndaej lajmbwn bouxhoj bouxhaemz, dou mboujdan ak sij faenzcieng, bangcoh bouxwnq, hix mbouj ged rengz ged cienz.

Di ndit ndeu, hix ndaej ciuq rongh fueng dieg ndeu; aen simgyaez ndeu, hix ndaej raeuj sim gyoengq vunzbiengz. Maqmuengh vunzlai cungj daeuj soengq simgyaez, hawj gwnz- biengz engq ndei engq doxhuz.