Bonjbauq siusik （gicej Cau Dwzfeih） 10 nyied 10 hauh daengz 12 hauh，Liujcouh Si Sanhgyangh Dungcuz Swciyen Fuluz Myauzcuz Yangh、Dungzloz Myauzcuz Yangh、Gauhgih Yauzcuz Yangh faenbied guh hozdung angqhoh laebbaenz 40 hopbi, gak cuz vunzlai dangdieg doxcomz giz ndeu, ciengq go diuq foux, doxcaez daeuj angqhoh gienh saeh hung neix. Swcigih Minzcunghveij baij vunz bae daengz dieg cukhoh.

10 nyied 10 hauh, Fuluz Myauzcuz Yangh hozdung yienhciengz vunz lai vunz daih, nauhyied raixcaix. 《Golaux Dungcuz·Myauzcuz Gingqlaeuj Coux Hek》 hainduj hwnj ciengz yienj, gyoengq canghheiq ndang daenj buhvaq minzcuz gyaeuget, yienj gij go foux gig miz minzcuz daegsaek de. Foux 《Ciengj Bauqva》《Cien Aen Saz Roengz Yungzgyangh》《Caij Din Venz》 daengj cezmuz gangjok le gak cuz bouxminz gyaepgouz caeuq maqmuengh ndaej gwn ndei youq ngaih. Go buenx foux 《Gou Gyaez Ranz Gou, Gou Gyaez Fuluz》 gangjok gij cingz gak cuz bouxminz ndiepgyaez Mbanjmyauz Fuluz. Yienhciengz yienjheiq ndeiyawj raixcaix, bouxyawj dopfwngz haenhndei. 10 nyied 11 hauh, youq Dungzloz Myauzcuz Yangh hozdung yienhciengz, yienjheiq caemh ndeiyawj dangqmaz. 《Gyong Myauzcuz Roq Singj Munggyangh》《Dungzloz Gyaeundei》《Sing Venz Mbanjmyauz Goksadsad》 daengj go foux minzcuz, langhbaij le gij yinxdaeuz vwnzva daegbied gagmiz caeuq gij yienghsiengq cingsaenz gvaekgvaek gak cuz bouxminz. 10 nyied 12 hauh, youq Gauhgih Yauzcuz Yangh hozdung yienhciengz, gyoengq bouxyienj yungh fwen Mbanjyauz、go foux minzcuz daengj cezmuz，langhbaij 40 bi doxdaeuj gij bienqvaq hungloet caeuq gij cingz gak cuz bouxminz dazfwngz buekguh yamqcoh seizdaih moq Gauhgih Yauzcuz Yangh, yienhciengz miz haujlai vunz daeuj yawj.

Mwh guh hozdung angqhoh, yienhciengz lij langhbaij gij cingzcik hwngfat minzcuz yangh、gai gaiqgwn ndei daengj hozdung dem.

40 bi doxdaeuj, daegbied dwg Cibbet Daih Dangj doxdaeuj, Fuluz Myauzcuz Yangh、Dungzloz Myauzcuz Yangh、Gauhgih Yauzcuz Yangh ndaej yiengjsouh gij cwngcwz minzcuz dangj, gak cuz ganbu ginzcung haenqrengz guh baenaj, caezcaemh doxgiet buekguh、caezcaemh mwnhoengh hwngfat, ginghci hwngfat riengjret, ndawbiengz saehnieb guh baenaj, bouxminz gwndaenj ngoenz ndei gvaq ngoenz, guhbaenz aen daihbuenz ndei: Ginghci hwngfat、aenbiengz huzndei、minzcuz doxgiet、gak cuz bouxminz youq ndei gwn ndei.