It

Haeujfug, Namzningz gizgiz lumj feiz nei, ndat dwk byaij roen hanh sinz hanh conh.

Neix dwg aen minzban cunghyoz mizmingz ndeu, cingqcaih demhwnq sam doengh daihlaeuz, gak doengh miz loeg caengz, moix caengz miz haj aen gyausiz hung, bi’gvaq caep baenz, bineix dajcang. Ndaw gyausiz, seiqcib haj boux vunzsai ndwn youq baihnaj bangxciengz gvet hoi, miz mbangj gunghyinz ndwn youq gwnz gyaqdiet sang gvet denhvahbanj.

Gvet hoi, couhdwg bae hau, yienzbonj ciengz dwg cienhuj caep baenz, gvet caengz suijniz gyaux sasaeq cw ciengzmienh caiq gvet sam caengz hoihau couh ndeiyawj, guek raeuz ranzyouq haenx dingzlai bangxciengz caeuq gwnz denhvahbanj cungjdwg gvet hau, aenvih gvet hau le, ndaw ranz couh rongh.

“Guh caez sam doengh daih- laeuz neix, aen dieghong hix haihong lo”. Dajcang gunghswh lauxbanj Cinz Giveih doiq song boux daiq- daeuz Lij Danenz caeuq Vangz Gencingh naeuz.

Ngeih

Dingqnyi Cinz lauxbanj naeuz miz dieghong moq guh, Lij Danenz caeuq Vangz Gencingh simhai dangqmaz, songde daiq Cinz lauxbanj yawj gunghcwngz yaugoj, gizlawz guh ngamj mbouj ngamj, gizlawz hab baenzlawz guh. Mienh ciengz aeu soh, gehcueng、 gehdou aeu gvet seuq, gyonj daeuj gangj, gizgiz yawj swnhda.

Vangz Gencingh caeuq Lij Danenz dwg doengzyieng, song mbanj doxgek cib geij leix roen, cib bi gonq, song vunz de youq Namzningz aen dieghong ndeu gvet hoi roxnaj, song vunz maij youq giz ndeu guhhong, hix doengzcaez bae gvaicanhden gwn haeux, Lij Danenz caeuq vunzlai youq aen rug ndeu ninz, caeuq Vangz Gencingh ndiep- gyaez ndei le, buen daeuj caeuq Vangz Gencingh gyaeuj congz daep gyaeuj congz ninz, seizgan nanz le, doh caenmaed yied lumj laeujgeq, doxdongx mbouj heuh coh doiqfueng lo, boux heuh boux guh lauxbeix, miz haemh ndeu gyoengqde doxyaeng bae gwn siuyeh, buenq gaen laeuj roengz dungx. Lij Danenz hixnaengz doiq Vangz Gencingh naeuz:“Raeuz gap- doengz suenq lo.” Vangz Gencingh yaemhywx mboujdingh, Lij Danenz doq sai rim laeuj Vangz Gencingh gwn bae byongh cenj haenx, naeuz: “Beixnuengx mbouj lau lai, boux- caeuz lau boux ndeu, daeuj, gou gingq mwngz cenj ndeu!” Gangj sat, gwn cenj laeuj haenx caez bae.Vangz Gencingh gwn mbouj ndaej laeuj, vih le hawj naj de hix gwn caez cenj laeuj ndeu, doengzeiq lo.

（1）