Seiqvunz miz haujlai baez daih- it, baez daih’it saeg buh、baez daih’it cawj ngaiz、baez daih’it youz- raemx…… Ngoenzneix gou gangj- gangj gou baez daih’it vix hagseng camgya Gaiq Daihseiq Daengx Gih Siujhagseng Vahcuengh Caizyi Biuj- yienj Doxdax.

Ngoenzhaenx, gou cingq youq ranzbanhgoeng gaij cozyez, Cinz Ci lauxsae dawz faenh vwnzgen ndeu, ndenq hawj gou naeuz: “Veiz lauxsae, mwngz yawj faenh vwnzgen neix. Gaiq Daihseiq Daengx Gih Siujhagseng Vahcuengh Caizyi Biujyienj Doxdax, bineix lwnz daengz yozyau raeuz camgya, Vuz gyaudauj heuh gou caeuq mwngz guhdoih vix gyoengq hagseng bw. Baenzlawz yiengh?”

Cinz Ci lauxsae gangjvah seiz fwngz mizdi saenz, gou daj ndaw fwngz de ciep vwnzgen gvaqdaeuj, daj gyaeuj daengz byai yawj baez ndeu, gangj vah saedcaih, gou yienznaeuz daj Sawcuengh yozyau bizyez, hoeng gou haujlai nanz hix mbouj hag Sawcuengh lo, bingzciengz vihliux hwnjdangz cij bae yawj Sawcuengh, hwnj sat le hix mbouj leix.

Mbatneix daeuj ndaej daengj- nyaenq lai, gou hix ciepsouh mbouj ndaej. Hoeng, lingjdauj hawj raeuz guh, mwngz gamj mbouj dingq ha?

Gou itcig geiq saeh neix youq ndaw hoz, daengz byonghhwnz le, gou hix fan bae boek dauq, baenzlawz ninz hix ninz mbouj ndaek. Baenzlawz guh ne? Gou caiq hwnjdaeuj doeg vwnzgen baez ndeu.

Gou siengj, bineix cawjdaez dwg gijmaz? Gou naemj bae ngeix dauq, dwg ciengqyiengj loqsiengj Cung- guek. Deng, deng, deng, gou gag gangj gag riu hwnjdaeuj, couh yienghneix guh.

Dauqdaej dwg yienj siujbinj、eu fwen roxnaeuz gobwnjgi? Gou caeuq Cinz lauxsae doxyaeng baez ndeu: Danghnaeuz yienj siujbinj, hagseng guh mbouj ok biujcingz, danghnaeuz yienj gobwnjgi, hagseng boih mbouj ndaej baenzlai. Doeklaeng gietdingh eu fwendoj.

Vunz ciengz naeuz:“Gangj ngaih guh hoj ya!” Caemhcaiq lij dwg baez daih’it ne. Daj gizlawz hainduj ne? Eu fwen hix mbouj yungzheih ha! Raeuz bonjdieg miz maz daegsaek ne?

Gou dingqnyi vunz naeuz Vangz Ligingz lauxsae rox bien fwen, gij fwen de hix ciengq ndaej rwenzriri. Aen siusik neix doiq gou daeuj gangj couh lumj gomiuz seiz mbwnrengx ndaej rwed raq fwn ndeu.

Haemhde cuengqhag lo, gou bae daengz ranz Vangz Ligingz lauxsae, Vangz lauxsae gig gyaeundei, lwgda de ndongqrikrik, baez yawj couh rox dwg boux coengmingz lingzleih, de lij dwg boux canghfwen ndawbiengz he, de ak dahraix, ndaej haujlai ciengj gvaq bw!

Gou lwnh saehcingz hawj de rox. De haenh aen siengjfap gou gig ndei, hix han naeuz coengh gou.

Vangz Ligingz lauxsae gig muengz, ra seizgan daeuj hagdangz gou son gyoengq hagseng mbouj yungzheih. Vihliux gienh saeh neix, de hix ra seizgan daeuj daengz hagdangz son gyoengq lwgnyez eu fwen:

Rumzcou ci daeuj vagut hai,

Yauyenz hai daiz guh doxdax;

Geij boux doengzhag fwngz doxdaz,

Doengzcaez aj bak ciengq fwendoj.

Gwnzmbwn ndaundeiq gyoq riengz

gyoq,

Guekcoj daihdeih raemx bya ndei;

Gaeqgim daeuj buenx roegfungh beij,

Ngoenzneix hwnjdaiz ciengq fwen moq.

Lwgnyez mboujdan hag vwnzva,

Hix yaek ca dwz ci dij meij;

Conzdungj vwnzva cienzciep ndei,

Minzcuz gveihbauj doengzcaez vat.

（1）