Mwh caijfangj ndaejhoengq, lwg- fwngh dingq daengz aen Daemz Baek- ging gvangqyub sawdik, ciengx ok gij bya haenx, singjsien sangjbak, gwn- feih dangqmaz. Doenghgij byavanx、byalienz、byaleix、byacaek、byagok、byahaux、byaraiz、byadiemjcwng daengj, dan aeu rok raemxheu ndeu, di gyu ndeu, couh rangdiemz habbak, mbouj miz saek di haeuhaux. Caemh- caiq, gij bya Daemz Baekging, ndok byotbyat, mbouj lumj gij bya dieg wnq ndok oen ndongjndat soemswt, mbouj haeujsim couh deng gaz hoz, hawj raeuz inget yaek dai. Coenz vah ndeu, rek bya ndatfwgfwg ndeu, cungj hawj vunzlai hai bak siengj gwn.

Dingq bouxlaux gangj ndaej miz sing miz yiengh, gou couh saenq: Gij bya Daemz Baekging dwg gij bya lajmbwn ceiq ndei gwn lo.

Ngoenzneix dwg ngoenzsinghgiz, gyang doengh ndit ndatyanyan. Seiz- neix, gou cingq youq ndaw caznywj mbaetheiq, nyinh doeg gaiq sigbei gaeuqgeq miz lizsij ndeu. Cingq miz yinxdaeuz seiz, baengzyoux dwk denva daeuj, naeuz cingj gou caeuq de bae giz dieg ndeu cimz bya’mbanaengj baez ndeu.

Bya’mbanaengj? Gijmaz dwg bya’mbanaengj? Bya lij ndaej mbanaengj? Gou cij rox ndawbiengz miz “nohmbanaengj”, seizlawz miz cungj byaek ndeu heuhguh “bya- mbanaengj”?

Baengzyoux hix mbouj gangj lai, cij naeuz coenz ndeu: “Daengz dieg mwngz couh rox lo!”

Ngoenzde aen mbanj dou yaek bae haenx heuhguh Dicouh, liz Loz- cwngz yienhsingz mbouj gyae geijlai, cij miz bet goengleix baedauq. Baez daengz haeujfug, daj Lozcwngz yienh- singz riengz Loz Yungz ngeihgaep goengloh naengh ci bae Yungzsuij, ndaej yawjraen goengloh baihswix doenghnaz gvangqlangh gyangde, seb miz haujlai aen daemz. Ndaw daemz baenz benq baenz benq va’ngaeux, youq ndaw ndit hai hoenghhwd, couh lumj baenz nyup baenz nyup fwjmok hoengzoiq roxnaeuz saekhau, youq ndaw ndit caeuq ndaw raemxmok menhmenh ngauznget, haemq yienhda, engqlij miz di maezvunz. Hoeng, youq baihlaj mbawngaeux doxdaeb doxgaep gou yawj mbouj raen haenx, lij miz byavanx、byalienz caeuq byaleix bizbwd hungcoek haenx.

Dicouh dwg aen mbanj mbouj hung mbouj iq ndeu, sam bak lai ranz vunz, gvi Cangzanh Cin guenj. Dangqnaj aen mbanj miz raemxsaw, baihlaeng miz byaheu, diegdeih bingzbwd gvangqlangh, roenhung roen’iq doxcab, gij gingjgyaeu laj- mbanj hawj vunz ndiepgyaez raixcaix. Gij raemx Dicouh daj byaheu baihlaeng mbanj daeuj. Doengh gij raemxmboq gwnz bya neix, raemx gig ndei, hamz miz veizlieng yenzsu haemq lai. Raemxmboq gwnz bya cungcuk cauh ok aen mbanj raemx nyinh yienghceij gyaeundei haenx, ganqciengx gyoengq beksingq benq dieg neix. Dingq bouxlaux gizneix naeuz, caeux youq bak bi gaxgonq, gyoengq beksingq Dicouh couh roxyiuj gij ndiepgoq aenmbwn, leihyungh raemxmboq gwnz bya daeuj ciengx bya, cungj fungsug neix lienzdaemh ciepswnj daengz ngoenzneix. Aen sigij gonq 80 nienzdaih gvaqlaeng, gyoengqvunz ndaw mbanj miz gienz gag guhcawj yungh diegdeih, aen canjnieb neix menhmenh hwngvuengh hwnjdaeuj, cauxbaenz aen gwzgiz bau guh faeg、dajciengx、gaicawx、gyagoeng liux. Cangj byalwg ndaw yienh couh hai youq henz Mbanj- dicouh, daezhawj byalwg maenhndei hawj gizdieg seiqhenz cieplienz mbouj duenh.

Aenvih goekraemx cukgaeuq, raemx nywj lai daih, Dicouh ca mbouj lai ranzranz cungj miz daemz aen hung roxnaeuz aen iq. “Benq dieg raemx ndei ndeu ciengx ndaej benq dieg bya ndei ndeu.” Vunz dieg neix naeuz, bya Dicouh vihmaz ndei, dwg aenvih raemxmboq gwnz bya haemq gyoet, raemxgyoet ciengx bya, bya maj ndaej menh, maj ndaej net. Doengh cungj bya neix, mboujguenj dwg raemx cawj, roxnaeuz mwn cawj nanz mbouj yungz, caemhcaiq rang- diemz habbak, mbouj miz saekdi “heiqnamh”. Vihneix, ciengx bya couh bienqbaenz vunz Dicouh goek- gaen gwndaenj caeuq monzloh fatcaiz youqgaenj.

Bya’mbanaengj Dicouh mingz- daeuz cienz bae gyae, guhfap gig genjdan, dan miz haj bouh hong. It dwg genj duzbya ciengx ndaej song bi doxhwnj, gaj ndei swiq seuq le, ronq baenz gaiq gvangq song lwgfwngz, aeu gyu、laeujhaeux、ciengqyouz、youz- duhnamh、liuhhom iep buenq diemj cung doxhwnj. Ngeih dwg genj yungh haeuxsuen (haeuxgaeuq) gya di duh- doem、duhnaz、sagieng、batgak、gveiq- beiz doengh gijneix, daeuj demlai gij heiqrang mbahaeux, aeu rekdiet cauj hom cauj byot, gaenlaeng aeu muhrin muh baenz mba. Gaenriengz, aeu gij mbahaeux muh ndei haenx caeuq gaiq nohbya doxgyaux yinz, hawj gaiq nohbya cungj ndaej nem mbahaeux rim yinz bae. Sam dwg cang haeuj ndaw bat——Ceiq lai cij ndaej cang song caengz, hawj gaiq nohbya miz di gehhoengq, baenzneix gaiqbya ndaej naengj cug ngaih. Seiq dwg dwk haeuj ndaw rek——Genj mbawbyaek ceiq ndei、mbawbyaekbyaz daengj demh daej, ceiq lai hix cijndaej cang song caengz, ce di gehhoengq ndeu. Bouh ceiq doeklaeng dwg naengj bya——Gwnz feizmbaw fwi naengj cib daengz cibhaj faen cung, nohbya ndaej nip goenq couh ndaej dawz hwnj gwnz daiz. Canghdajcawj miz gingniemh haenx cungj rox, feihdauh ndei haenx, aeu cungj cawjfap ceiq codaeuz haenx. Vihneix, bya’mbanaengj Dicouh, aeu fwnz caux feiz aen naengjfaex daeuj naengj ceiq ndei.

Cawzliux baihgwnz geij yiengh hong, vunz Dicouh miz gingniemh lij yaek lwnh mwngz nyi, miz yiengh boiqliuh ndeu baenzlawz cungj mbouj ndaej gya, couh dwg hing! Saeklaeuq gya hing roengzbae, baenz rek bya cungj haemzngamq, hoj ndwnj roengz dungx. Gij guhfap bya’mbanaengj Dicouh, boekfan raeuz nyinhrox, bingzciengz cawj bya dwk hing bae cawz sing.

Bya’mbanaengj Dicouh, aeu byalienz roxnaeuz byavanx daeuj guh ceiq ndei. Aeu byalienz guh bya- mbanaengj, noh singjsien unqnem, raeuzrwd habbak. Gij mbouj ndei de dwg bya iq oen lai, mbouj hab hawj lwgnyez gwn. Bya’mbanaengj aeu byavanx guh haenx, duzbya hung、ndokoen co, bouxlaux lwgnyez gwn ndaej cuengqsim. Gak miz giz ndei, hoj faen ndei rwix. Gij bya’mbanaengj vunz Dicouh ngoenznaengz cawj haenx, cungj rox ciuq yaek aeu daeuj daj ndawde genjaeu cungj ndeu.

Bya’mbanaengj, vunz Dicouh yawj daeuj mboujgvaq dwg cungj byaek ndaw ranz gig bingzciengz ndeu. Baezbaez cingj hek gwn ngaiz, gwnz daizngaiz gyoengqde cungj noix mbouj ndaej yiengh bya’mbanaengj Dicouh ndatfwdfwd haenx.

Vunz Dicouh maij gwn bya, rox gwn bya, engqlij gwn ok yiengh moq daeuj. Cawzliux mbanaengj baihgwnz gangj daengz, bya Dicouh lij ndaej mwn、ndaej roengzluz, mboujgvaq baenzlawz cawj baenzlawz gwn caeuq bya’mbanaengj mbouj doengz saek di, miz yiengh ndeu mbouj ndaej mbouj gangj cingcuj gonq, mboujguenj dwg mwn roxnaeuz roengzluz yungh raemx bietdingh dwg raemxmboq gwnz bya Dicouh, mboujnex couh mbouj baenz gwn! Vihmaz ne? Vunz Dicouh youh yaek lwnh mwngz nyi: Bya Dicouh couh yaek aeu raemx Dicouh daeuj cawj, mbouj miz leixyouz!

Seizneix, “bya Dicouh” dwg gij binjbaiz dangdieg mingzdaeuz yiengj goksad. Vunz dieg rog daeuj daengz Lozcwngz, daeuj daengz Dicouh, cungj aenvih ndaej gwn donq bya- mbanaengj imq ndeu cij roxnyinh sim’angq. Aeu gij vah vunz Dicouh daeuj gangj couh dwg: Bya’mbanaengj Dicouh, ndaej gwn guh donq!

Dicouh sam bak lai ranz vunz, miz Gun、Cuengh、Mulauj doengh aen minzcuz, ndawde Bouxgun ceiq lai. Gangj daengz singq, cix miz Se、Lij、Cauz、Couh、Veiz haj aen singq, singq Se ciemq dingzlai. Gyoengq- vunz ndawde, mizmbangj dwg youq dieg neix sengmaj, hix mizmbangj dwg daj baihrog daeuj. Yienznaeuz dwg lai aen minzcuz cabyouq, hoeng fungheiq ndei, ranznden doxndiep doxgyaez, caezyouq huzngaeh, lumj ranz vunz ndeu. Ranz lawz miz saeh, daihgya daeuj bang, baenzlawz cungj mbouj youq henz yawj ndwi. Neix dwg vunz Dicouh ciuqsouj laexsoq ciuhgeq, simndei sienhsoh, giem- nyiengh bauyungz cix guh ndaej baenzneix ndei.

Vunz Dicouh ciuqsouj gij laexsoq daihhek, ciuqsouj gij fungheiq ciuh- gonq, caemhcaiq seiqhenz mbanj suen naz gvangqlangh, gingj ndei maez- vunz, hawj moix boux hek daengz gizneix cungj roxnyinh lumj youq ranz cwxcaih.

Bae, caez daengz Dicouh gwn bya’mbanaengj!