Youq mbanj Bouxcuengh Bingzgoj riuz miz aen fungsug ndeu, danhfanz seng boux lwgnyez, cawjgya aeu coh vaihgya bauqheij.

Gij saeh bauqheij neix, youz lwggwiz oknaj, caemhcaiq daiq song boux canghfwen, bae daengz vaihgya, aeu fwen daiq vah.

Bae bauqheij aeu daiq miz dangznaed、bingj、nohmou、laeuj doenghgij doenghyiengh, vanzlij aeu daiq duz roxnaeuz song duz gaeq lix bae, moix duz gaeq aeu miz gaen dauq gwnz.

Daiq gaeq lix bae dwg miz eiqsei bw. Danghnaeuz seng boux lwgsai, couh daiq duz gaeqboux bae，danghnaeuz seng boux lwgmbwk, couh daiq duz gaeqhangh bae， danghnaeuz seng lwgva ne, couh daiq song duz gaeq lix bae, seng song daeg, daiq song duz gaeqboux, seng song dah daiq song duz gaeqhangh, seng daeg ndeu dah ndeu couh daiq duz gaeqboux ndeu caeuq duz gaeqhangh ndeu, caemhcaiq song duz aeu caemh aen roengq ndeu.

Gij vunz vaihgya yawj duz gaeq lix neix, couh rox gyoengqde miz daeg vaihseng roxnaeuz dah vaihseng lo.

Vaihgya raen lwggwiz daeuj bauqheij, hix cingj mehmbwk canghfwen daeuj dap fwen. Ciengzseiz dwg fwen yienghneix:

  Lwggwiz:

Ngoenzneix daeuj bauqheij,

Miz saeh ndei saeh daih,

Naeuz goengda yahdaiq,

Haidou donj lwggwiz.

  Vaihgya:

Haemhlwenz fangzhwnz ndei,

Raen valeiz hai moq,

Haet ciqciep ciengq go,

Rox miz saeh ndei daengz.

  Lwggwiz:

Bauq goengda yahdaiq,

Ranz raeuz lai gouh dawh,

Lwggwiz baenz boh ndei,

Miz vunz heuh da daiq.

  Vaihgya:

Dingqnyi heuh da daiq,

Sim hai lumj mauxdan,

Baenzneix raeuz miz lan,

Sim van lumj gwn dangz.

  Fwen song hot doxdongx liux, ciep roengzbae couh yungh fwen daiq vah bauq dwg seng lwgmbwk rox lwgsai, roxnaeuz lwgva lo. Fwen daengz neix, daengx aen bauqheij ginggvaq sat lo. Hoeng, canghfwen mbiengj lwggwiz lij haenh goengda yahdaiq haq dah lwg ndei ndeu hawj cawjgya, ngoenzneix cij ndaej dem ding ranz hoengh. Vaihgya ne, hix hoh cawjgya gyaranz miz fuk, lwglan daihdaih coengmingz. Daengx aen ginggvaq cungj angqyangz raixcaix.