9 nyied 21 hauh, gaiq daih 34 “feihdenhciengj”、gaiq daih 28 “singhgvanghciengj” buenciengj denjlij youq Yamwnz Si banh. Densigi 《Lwgmbwk Byarungh》 ndaej ciengj densigi maenhndei, bouh densigi neix dwg Swcigih Dangjveij Senhconzbu、Gvangjsih Gvangjbo Densidaiz、Gvangjsih Densi Conzmeiz Fazcanj Cizdonz Mizhanh Gunghswh、Cezgyangh Denhgvangh Diyingj Yingjsi Cicoz Mizhanh Gunghswh daengj danhvei lienzhab ok.

Haemhhaenx lwnh rox le 16 bouh densigi maenhndei ndaej “feihdenhciengj” gaiq neix, boux ndaej ciengj daujyenj maenhndei、 benhgi maenhndei、bouxyienj sai maenhndei、bouxyienj mbwk maenhndei 4 aen danhhangciengj, caeuq 14 bouh cozbinj ndaej ciengj “singhgvanghciengj” gaiq neix. Densigi 《Lwgmbwk Byarungh》 gij vunq de dwg boux ndaej “caet it yinhcangh”、 daengx guek gungcanjdangjyenz maenhndei、“seizdaih buengjyiengh”、 daengx guek vut gungz gunggeng buengjyiengh Vangz Vwnzsiu, lwnhgangj le gij saehsaed hawj vunz gamjdoengh Vangz Vwnzsiu yenzgiuswngh bizyez le, vutvak gij seizgei bae hawsingz hung guhhong, giengiet dauq daengz ranzmbanj Bwzswz, cawjdoengh bae lajmbanj guh hong banggungz. Danqhaenh gij gojgaeq dangjyenz bouxcoz dangdaih aeu Vangz Vwnzsiu guh daibyauj de aeu bi’ndwen seizcoz lwnhgangj gij simnduj mbaqrap vunz gungcanjdangj、raiz diuz go hauxseng seizdaih moq.

Bouh densigi neix youq 2022 nienz mboengq “caet it” youq Yanghsi dauq nduj、dauq bet duenhseiz 18∶30 daengz 22∶00 boqok, youq daengx guek duenhseiz neix densigi buengj souyawj daih’it mingz. Bouh densigi neix boqok le ndaej vunzlai haenhndei, senjhaeuj Cunghsenhbu、Guekgya Gvangjbo Densi Cungjgiz “danqhaenh seizdaih moq、buekguh roenloh moq” heiqmoeg canjbo densigi maenhndei, caemhcaiq gonqlaeng ndaej gaiq daih 18 Cungh Meij densicez·Cunghvaz vwnzva cienzboqligciengj、2023 nienz CMG gaiq nduj Cungguek densigi nienzdoh swngdenj·nienzdoh densigi maenhndei daengj ciengj.

(Sunh Bungzyenj)