第十期

原文：儿元月二十日第狱，于今日恰足三月。自省爱国无罪俯仰无愧，故能饮苦酒以自甘，宁杀身而不悔。狱中诵《正气歌》，咏《满江红》，曾不觉窗外韶光飞逝，莺舞春木矣……今日跪接慈谕，训诫谆谆，一字一泪，不忍卒读。鸟能反哺、獭知根本、儿独何心，能不断肠？况大人爱儿远胜诸弟妹。而儿之所以始终背弃大人养育之恩，断绝妻子之爱，每顾而不悔者，实不愿背弃绝大多数人之永久利益以换取吾一家之幸福也。谁无妻儿？儿安忍出卖大众，牺牲他人，苟全一己之私爱？儿决心牺牲个人，以利社会国家，粉身碎骨，此志不渝！

——节选自《致我深爱的中国—烈士遗书的故事》，中国方正出版社，2019年

译文：

1

Lwg youq ndwencieng ngeihcib ngaiz gyaeng haeuj ndaw lauz, daengz ngoenzneix rim sam ndwen lo. Youq neix gou ngeix bae ngeix dauq, gou gyaez guek mbouj loeng, banh saeh guh vunz ndaw sim mbouj miz fangz, ndigah gagnyienh gwn cenj laeuj- haemz roengz dungx, couhcinj vutmingh hix mbouj ienqhoij. Naengh ndaw lauz neix, gou boih 《Fwensei Cingqheiq》, ciengq diuz go《Manjgyanghhungz》, mbouj nyinh lawz seizcin cungj daengz lo， roeghenj gaenq youq gwnz faex rogcueng mbin hwnj mbin roengz…… Ngoenzneix, gou gvih raebdaengz fung saenq boh, coenzcoenz gangj ndiep dangqmaz, cihcih unqswnh lumj aeu raemxda raiz baenz, caj dungx hawj gou doeg mbouj bae. Duzroeg vanzlij rox dauqbwnq bohmeh, duznag hix rox caeq bya, gou guh lwg mwngz, youh baenzlawz mbouj sim’in yaek muenh ne? Engq mbouj yungh gangj, mwngz ndiep gou lai gvaq geij boux nuengx haujlai. Hoeng gou vihmaz daengz ngoenzneix cungj lij boihfamh coenzgangj mwngz, mbouj nyi mwngz son, vut gij gyaez mehyah, moix baez siengj daengz hauhneix gou cungj mbouj ienqhoij, hauhneix guh couhdwg gou saedcaih mbouj nyienh fanjgoet gij leih’ik gyaeraez gyoengqvunz dingzlai, daeuj vuenh aeu ranz raeuz gvaq ndaej vuenyungz. Bouxlawz mbouj miz lwg yah ne? Gou youh baenzlawz nyaenxsim gai vunzlai, hawj bouxwnq vutmingh, daeuj bauj hawj ndang- gaeuq youq ndei gwn van ne? Gou laemxsim vutndang ndanggaeuq, vihliux leih’ik ndaw- biengz, vihliux guekgya daengzcog, couhcinj ga raek aek donq, gou hix guengzgwdgwd byaijcoh baenaj!

（云南富宁县：农忠恳/Nungz Cunghgwnj）

2

Gou ndwencieng ngeihcib ngaiz haeuj lauz, daengz ngoenzneix ngamq ndo sam ndwen. Gou nyinhnaeuz bonjfaenh gyaez guek mbouj loeng hix doiq ndaej hwnj mbwn，ndigah gwn laeujhaemz hix raen van，vih guek vutmingh hix mbouj ienq. Youq ndaw- lauz ciengq《Go Cingqheiq》, ciengq sei 《Daengx Dah Hoengz》, mbouj rox baihrog cueng ndwenngoenz doxlawh, yawj mbouj raen roeghenj mbin nywj faex loeg henj……Ngoenzneix ciep ndaej gij saenq boh, coenz yienq coenzcoenz haeujsim, gij cih cihcih caensim, gou sim’in lai lo, baez doeg baez doek raemxda. Roeg rox soengq gaiqgwn hawj meh、duznag ngeix goek、gou baenzlawz mbouj ngeix ranz, baenzlawz mbouj saej in? Caiqnaeuz boh maij gou lai gvaq gyoengq beixnuengx. Bohmeh ciengx gou, lwg doiq mbouj hwnj gij aencingz neix, doiq mbouj hwnj cingz mehyah, baezlawz siengj daengz cungj sim’in hoeng mbouj roxnyinh ienqhoij, dwg mbouj nyienh aenvih vuenyungz ranz raeuz bae doiq mbouj hwnj gij leih’ik vunzlai. Bouxlawz mbouj miz lwg mbouj miz yah? Gou baenzlawz nyaenx ndaej vihliux aencingz ndanggaeuq bae gai vunzlai, cemingh bouxwnq? Gou gietsim cemingh ndanggaeuq, baenzneix ndei guekgya ndei sevei, couhcinj ndok ndang dek, aen gietsim neix hix mbouj bienq!

（西林县：李香莲/Lij Yanghlenz）

3

Gou youq it nyied ngeihcib hauh deng gaebgyaeng haeuj lauz, daengz ngoenzneix ngamq gaeuq sam ndwen. Gou gag ngeix: Gyaez guek mbouj miz coih, ngiengx gyaeuj doiq ndaej hwnj gwnzmbwn, ngaem gyaeuj doiq ndaej hwnj diegnamh, sojyij hawj gou gwn laeujhaemz cungj cingznyienh, gaj gou dai cungj mbouj ienqcak. Youq ndaw lauz gou ngoenzngoenz doeg 《Cinggigoh》, ngon《Manjgyanghhungz》, mbouj gamjgyoz aen lauz baihrog seizgan gvaqbae vaiqvwt, ndaw sim gou lumj seizcin daengz ityiengh: Duz roeghenj youq ndaw ndoengfaex mbinfwfw ciengq go diuq foux……Ngoenzneix gvih ciep sawsaenq mwngz, naihsim son’gyauq， moix cih saw lumj caek raemxda ndeu, gou mbouj nyaenxsim doeg liux. Roegga hung liux lij rox ra ngwh bwnq duzmeh, duznag lij rox aeu bya caeq bauq goek, gou seiz yienghneix, boh mwngz gyaez gou lai gvaq gyaez gyoengq beixnuengx gou, gou baenzlawz mbouj simcieg saejgoenq. Gou vihmaz boihfamh vutvak gij aencingz boh ciengx gou majhung, duenh gyaez lwg yah, siengj daengz cungj dwg mbouj ienqcak, aenvih gou saedcaih mbouj ienq boihfamh vutvak gij leih’ik dienyah beksingq daeuj vuenh ranz raeuz vuenyungz. Bouxlawz mbouj miz lwg yah bohmeh? Gou baenzlawz ndaej vihliux baujcienz lwg yah nyaenxsim gai vunzlai, hawj vunz vutmingh? Gou gietsim vih guekcoj、vihliux gij leih’ik beksingq vutmingh cihgeij, ndok noh soiq yungz, aen ceiqheiq mbouj bienq!

（平果市：梁金海/Liengz Ginhhaij）