Vangh Yoz daj Bouqcaz Gungh- bauj okdaeuj seiz gaenq laeuj fiz lo, de mbouj rox dwg bouxlawz soengq de haeuj Bouqhek Yingzbinh bae ninz, youh bang de hai ngaenz.

Vangh Yoz mbat daih’it haeuj singz bae dajgoeng, hix dwg mbat daih’it lauxbanj cingj bae bouqlaeuj gwn laeuj. Mwh laeuj singj caez le, de cibfaen gyo’mbaiq lauxbanj gvansim de, engq gyo’mbaiq Luz gizcangj hawj ngaenz bae yw binghda daxmeh de.

Vangh Yoz youq C yienh N yangh okciuh, dieg haenx dwg mbanj- rungh mbanjbya, hoeng miz diuz dah iq gvaq naj mbanj. Cibngeih bi gonq, daxboh Vangh Yoz dwk bya gvaq saedceij. Siengj mbouj daengz miz ngoenz ndeu de bae dwk bya, caeugaen dai youq ndaw dah lo. Daxmeh Vangh Yoz gvaqlaeng youh baenz dalah, ndigah, Vangh Yoz mboujndaej doegsaw lo.

“Vunz gungz danggya caeux.” Vahsug gangj mbouj loek. Vangh Yoz daj iq couh cengj aen ranz hwnjdaeuj, de dajleix ndaw ranz sawfwtfwt, caeuq gyoengq vunzlai ndaw mbanj doxngamj caezyouq. Vunz ndaw mbanj cungj naeuz：“Mehmbwn caen doiq Vangh Yoz mbouj goengbingz saek di. ”

Vunz byaij coh giz sang, raemx lae coh giz daemq. Vangh Yoz ciemhciemh majhung, de hix siengj byaij ok rungh bae ra ngaenz, ndaw sim miz gij siengjfap haenx caiq hix naengh mbouj ndaej lo. Bi’gyai seiz- hah, Vangh Yoz couh gaen cejdangz de bae guhranz hawj vunz, cejfou youq N yangh guh canghcaepranz, bouxvunz Vangh Yoz gaenx, youh haengj cienmonz guh yenzgiu, mbouj daengz bi ndeu, Vangh Yoz couh hag ndaej dinfwngz daengz ndang.

Bi daihngeih, N yangh haifat guh ranz siujgih, Vangh Yoz gyaep ndaej hwnj bi ndei, de guh ancang doengh laeuz ndeu, swhgeij gag sezgi, gij dinfwngz de mbouj bingzciengz, ancang doengh laeuz neix ancang ndaej ndei raixcaix.

Ngoenz ndeu, aen ci ndeu faemx- fwg dingz youq lajlaeuz, Vangh Yoz daj gwnz laeuz yawj roengzbae, raen ndaw ci byaij ok song boux vunz, bouxdaemq bouxsang, Vangh Yoz siengj, itdingh dwg baih cawjranz cingj vunz daeuj niemhsou lo, de ngeiz mbouj dingz.

“Vei, lwgmbauq, mwngz roengz- daeuj yaep ndeu!” Bouxdaemq biz haenx coh Vangh Yoz hemq. Vangh Yoz daj gwnz laeuz buet daengz daej laeuz, mbouj rox gyoengqde heuh de guh gijmaz.

“Aen laeuz neix dwg mwngz ancang lwi? ”

“Dwg……Dwg.” Vangh Yoz gangj miz di saenz. “Mwngz caeuq gou bae, miz doengh laeuz ndeu hawj mwngz ancang, baenzlawz yiengh? ” Bouxsang biz naeuz.

Vangh Yoz daengxda yawjyawj, de lajeiq geb aen daehnaeng ndeu, fwngzgvaz hix gab saenj iencaij, naj de dwg naj seiq fueng, gig lumj cih saw “国” ndeu, fouq gingqda nap youq gwnz ndaeng sang de.

Bouxdaemq biz haenx raen Vangh Yoz ngawzngwdngwd ndwn mbouj sangj, de ganjmuengz doiq Vangh Yoz naeuz:“Lwgmbauq, boux neix dwg Luz gizcangj, de youq yienh linzyezgiz. ”

Vangh Yoz caeuq gyoengqde naengh ci bae lo. Ci hai gvaq aen van ndeu, couh daengz giz henz dah ndeu. Cijraen henz dah miz doengh laeuz song caengz ndeu, laeuzfuengz lij caengz cangcoih, baihswix caeuq baihgvaz yungh benj ding ndei guhbaenz haujlai aen bausieng.

Bouxdaemq biz singq Hij, dwg boux lauxbanj bau gunghcwngz, vunz cungj heuh de Hij lauxbanj, dingq- gangj de cienmonz bau gij gunghcwngz bouxdaeuz ndaw yienh, dwg boux maqhuz miz cienz ndeu.

Hij lauxbanj naeuz Vangh Yoz nyi, gizneix dwg aen “Hungzcinz Sanhcangh” Luz gizcangj.

Vangh Yoz raen Hij lauxbanj ok gyaqcienz sang, gietdingh ngoenzcog doenghgoeng.

Haigoeng mbouj geijlai nanz, couh miz vunz daezsingj Vangh Yoz, seizneix lauxbanj gveijgeiq lailai, mbouj dwg lauxbanj deuz couh dwg lauxbanj yiemq ngaenz mbouj hawj, raeb Vangh Yoz haeujsim lai di.

Vangh Yoz naemjnaemj hix dwg, yienghneix de couh dingz hong lo. Lauxbanj baez cam, Vangh Yoz naeuz daxmeh de baenz da’in, mbouj miz cienz bae yw.

Hij lauxbanj dawz soujgih ok- daeuj dwk denva hawj Luz gizcangj, yaepyet, aen ci iq Luz gizcangj menhmenh hai gvaqdaeuj lo.

“Vangh Yoz, raeuz bae yawj daxmeh mwngz ba.” Luz gizcangj doiq Vangh Yoz naeuz, ndaw fwngz de lij riuj daeh mak ndeu.

Youq ranz Vangh Yoz, Luz gizcangj doq nai daxmeh Vangh Yoz, doq daj ndaw daeh dawz 5000 maenz ngaenz ndenq hawj Vangh Yoz naeuz: “Caj ancang aen ranz ndei le, mwngz daiq daxmeh mwngz bae yw bingh lwgda, miz maz gunnanz mwngz caiq ra gou!” Vangh Yoz dingq daengz neix, sou cienz roengzdaeuj lo, de doiq Luz gizcangj naeuz: “Gij cienz neix couh suenq gou ciq mwngz gonq, ranz ancang liux le mwngz caiq gaeu okdaeuj.”

“Vangh Yoz, Luz gizcangj dwg boux vunzndei ndeu, mwngz couh ansim bae guhhong hawj de.” Daxmeh Vangh Yoz gig gikdoengh doiq Vangh Yoz naeuz.

“Meh, gij dauhleix neix gou rox!” Vangh Yoz naeuz. Yienghneix, Vangh Yoz youh caiq bae guhhong lo.

Mbouj geijlai nanz ancang couh sat hong lo, hoeng Vangh Yoz fanhfanh siengj mbouj daengz Luz gizcangj vih gijmaz hawj de youq gwnz ciengz louz geij aen congh hung lumj hab faenjbit nei.

Ciuq Hij lauxbanj iugouz, baih- ndaw geij aen congh haenx cienzbouh diep cienmeng, doeklaeng caiq yungh cien hung goemq gvaq congh iq bae.

Vangh Yoz cam Hij lauxbanj vih gijmaz louz baenzlai congh iq? Hij lauxbanj naeuz Luz gizcangj siengj ciengx geij duz aekex, ndigah louz gij congh neix lo.

“Ciengx aekex?” Vangh Yoz itcig siengj mbouj mingzbeg.

Gunghcwngz doeklaeng couh lw geij aen congh haenx caengz fung, Vangh Yoz siengj yungh haetngaiz dem couh sat hong, caeuq lauxbanj gietsoq ndaej ngaenz couh baema.

Hoeng couh youq mwh Vangh Yoz siengj ndaej meihsatsat, Hij lauxbanj ciep ndaej Luz gizcangj denva, heuh Vangh Yoz sikhaek haeuj singz bae ancang aen ranz ndeu, gig gip yungh, gij hong doeklaeng youz Hij lauxbanj fucwz bae guh.

Vangh Yoz guh saeh soqlaiz mbouj raeblaeng, guhhong mbouj sat liux, de coengzlaiz mbouj ciep aen hong moq. Hoeng de siengj daengz Luz gizcangj doiq de miz aen, de cijndaej haeuj singz bae guh lo.

Vangh Yoz haeuj singz bae ancang liux lo, Luz gizcangj gietsoq ngaenz hawj de mbouj noix, daxmeh Vangh Yoz caemh aenvih Luz gizcangj bangcoh cijndaej bae guh soujsuz.

8 nyied 8 hauh, dwg ngoenz ndei haicieng aen “Hungzcinz Sanhcangh” Luz gizcangj, Luz gizcangj iucingj Vangh Yoz caeuq daxmeh de bae. Hoeng Vangh Yoz mbouj rox soengq gijmaz ndei, gij doxgaiq hab soengq haenx Luz gizcangj cienzbouh miz, naemj soengq gij bengz youh mbouj miz cienz cawx. Vangh Yoz siengj bae siengj dauq hixnaengz cawx lamz makbingzgoj ndeu caeuq daxmeh de doengzdoih bae lo.

Luz gizcangj miz daeg lwgsai caet bi ndeu, youq ndaw bouxhek ndonj bae ndonj dauq, yawj hwnjbae lumjnaeuz manz raixcaix. De raen daxmeh Vangh Yoz dawz gij duh- namh gyu haenx cibfaen ndei gwn, de couh caeuq daxmeh guhcaemz lo, daiq meh Vangh Yoz bae henz dah youz.

Bet nyied ndatnde’nde, daeglwg Luz gizcangj caeuq daxmeh Vangh Yoz bae youz gaeuq lo, couh dauqma lo, gyoengq vunzlai hix haihij gwn haeuxcaeuz lo. Daeglwg Luz gizcangj bakndangj hozhawq, de ndonj haeuj ndaw rug bae, couh haeb aen makbingzgoj ndeu gwn, hoeng de ngamq haeb, couh raen aen mak ndawde naeuh lo, de caiq haeb aen daihngeih, doengzyiengh dwg naeuh, de hozndat lo, dawz sojmiz mak- bingzgoj luenh vit hwnj gwnz ciengz bae.

Faemxfwd, cij ndaejnyi “baz” sing ndeu, gaiq ciengzcien ndeu daj gwnz ciengz doek roengzdaeuj, daxmeh Vangh Yoz doeksaet, couh youq ciengzcien doek roengzdaeuj seiz, gij ngaenzceij mbaw bak mbaw bak daj ndaw congh haenx mbin okdaeuj. Gyoengq vunzlai dingqnyi sing dek, cungj nyoenx haeuj ndaw rug bae yawj dauqdaej fatseng gijmaz saeh. Vangh Yoz baez yawj, sikhaek bienqbaenz boux vunzhuk lo!

Gvaq ndwen ndeu, dingqnaeuz Luz gizcangj youq diuz dah henz “Hungzcin Sanhcangh” youzraemx, mbouj siujsim mboetraemx dai lo. Daxmeh Vangh Yoz rox le daej hoemj daej dai. Vangh Yoz muengh youq bakdou, cak hix mbouj cak.