Coh guekrog hailangh,  

  Dangq mbwnrengx raeb fwn,

  Lengqlengq guh ndaej gwn,  

  Gizgiz hwngfwdfwd.

  Gak ranz gag ndaemnaz,

  Giyez ca gaij yiengh,

  Daengx guek bienq saeksiengq,  

  Yienghyiengh ndaej baenz ndei.  

  Ginghci daih hwngfat,  

  Bibi yat hwnj lae,  

  Lumj duzmax yaengx daez,  

  Yatbongh baesadsad.  

  Cunghyangh dawz seizgei,  

  Diuzcingj ndei gwnz laj,  

  Yamqyamq miz giva,  

  Byaij dangqnaj daengx biengz.  

  Langhda yawj baihrog,  

  Nem gak guek doxiu,  

  Caux “rangh ndeu loh ndeu”,  

  Doxgap riusiegsieg.  

  Caeuq gak guek doxhuz,  

  Caez hai ruz baenaj,  

  Fanjdoiq vet doxndaq,  

  Muengh caez gvaq ngoenz ndei.  

  5. Cungguek Ak Hwnjdaeuj  

  Vunz caux yizdaujsu,  

  Ndaej hainduj guh baenz,  

  Vunz guekrog hozhaenz,  

  Yaengx aen lwg fwngzmeh.  

  Gunghyez guh ndaej hwng,  

  Cimh laeng ciengj baenaj,  

  Geizgeiz mauh giva,  

  Ndaej ak gvaq daengx biengz.  

  Yanghgangj soufuk dauq,  

  Aumwnz ndaej haeujma,  

  Mbouj yiengh git yiengh gaz,  

  Sou dauqma swnhleih.  

  Ndaej laebdaeb fanzyungz,  

  Lumj song lungz caemh foux,  

  Ndaej gaij deihdoz gaeuq,  

  Veh haeuj Dacunghvaz.（34）