Haet ndeu, gou caeuq daxboh daxmeh bae lajmbanj yawj buzgeq.

Baez bae daengz ranz buzgeq, gou couh yawjraen buzgeq youq ndaw suenbyaek gvak reih. Seizde, gou raen gok suenbyaek miz benq rum heuswdswd ndeu. Gou hozngeiz dwk cam buzgeq: “Buzgeq, gij rum neix vihmaz mbouj ciemz deuz ne?” Buzgeq riu naeuz: “Lan iq ha, neix dwg go byaekvahenj mwngz ceiq maij gwn, gou baenzlawz sij ndaej ciemz bae ne!”“Laxlawz gij neix dwg byaekvahenj ya!” Gou doeksaet dwk buet daengz henz byaekvahenj, yawj bae yawj dauq.

Gvaq yaep ndeu, buzgeq dawz song fag geuz daeuj, riu naeuz: “Gaej yawj lo, caeuq buzgeq bae daet byaekvahenj ba!” Yienghneix, gou gaem geuz hainduj daet lo.

Haidaeuz, gou mizyinx raixcaix, daet le haujlai dug byaekvahenj hawj buzgeq, buzgeq yawj gij byaekvahenj gou daet neix, naeuz: “Gij neix mbouj dwg byaekvahenj, dwg gorum hane!” Gou hozngeiz dwk yawj buzgeq naeuz: “A, mwngz mbouj dwg naeuz gijneix dwg byaekvahenj ma? Vihmaz lij cab miz gorum ne?” Buzgeq riu naeuz: “Neix couh dwg daet byaekvahenj giz hojnanz de lo, byaekvahenj ciengzseiz caeuq rum caez maj, ndigah mwngz daet byaek itdingh aeu faen cingcuj.” “Baenzlawz faen ne?” Gou hozngeiz dwk yawj buzgeq. Buzgeq daet dug byaekvahenj ndeu, cuengq youq baihnaj gou naeuz: “Mwngz yawj, mbaw byaekvahenj luenzlili, mbaw rum cix soemsetset.” Gou fwt roxyiuj lo, ciuq gij banhfap buzgeq haidaeuz daet byaekvahenj.

Yaep ndeu, gou youh daet ndaej haujlai dug byaekvahenj. Baez neix gou roxnyinh daet ndaej gig ndei lo, buzgeq naeuz: “Mwngz daet raez lai lo, byaekvahenj lumj go’ndoek nei miz baenz hoh baenz hoh, mwngz couh daet gyaeuj byai de sam hoh, mboujne dawz bae gwn couh geq lo.” Gou dingq le, nyaenx mbouj ndaej danqheiq: “Lax- lawz daet byaekvahenj miz baenzlai monzdauh ha!” Gou laebdaeb ciuq gij banhfap buzgeq bae daet byaekvahenj, gvaq haujlai nanz, gou caeuq buzgeq cungjsuenq daet ndaej lamz byaek- vahenj ndeu lo.

Dou ma daengz ndaw ranz, ban- ringz buzgeq cauj deb byaekvahenj rangfwtfwt ndeu. Gou gwn gij byaek- vahenj bonjfaenh gag daet, mboujdan gwn daengz gij byaekvahenj youh oiq youh feih, hix cimz daengz le gij gyaez buzgeq hawj gou.

(Van Yijhanz raiz / Lij Siulingz hoiz)