It

Yahbuz miz gaiq simbingh ndeu hawj de baenz bi gwn mbouj van ninz mbouj baenz. Bingh neix dwg lwgbawx mbouj nyienh seng lwgngeih cauhbaenz. Daengx ranz cungj gienq lwgbawx aeu lwgngeih, hoeng, de mbouj dawz vahgienq haeuj rwz, ngangz mbouj bae dawz aen vanzciedseng ndaw ndang de ok. Yahbuz vihneix hozhwnj yaek dai!

Lwgbawx naeuz: “Gou gaenq vih ranz sou seng daeg lwg ndeu, gij hong swnjciep lozyieng gou gaenq guhsat. Aeu lai boux lwg ndeu, couh lai rap ngaenz ciengx lwg ndeu, ciuhvunz dinjdet, baenzlai sinhoj guhmaz, mbouj seng gvaq.”

Lwgbawx ngwn lai, yahbuz hainduj doiq de daeuzsegseg, doeklaeng bienqbaenz doxceng dox- ndaq, sam haj ngoenz ceng baez.

Ngoenzneix singgiz roek, daeglan doeg gauh- cungh ndaej dauq ranz gwn donq caeuz ndeu. Daeglwg gaj gaeq, lai guh geij aen byaek.

“Meh, gwn caeuz nw.” Daeglwg heuh.

“Gwn maz caeuz? Simdaeuz ndaet、hoz ndaet, gwn roengz gyawz bae?” Yahbuz naeuz.

“Haemhneix miz byaek ndei, gaej caeuq dungx swhgeij gvaq mbouj bae!” Lwgbawx naeuz.

“Byaek ndei! Seizneix nohlungz hix ndwnj mbouj roengz bw.” Yahbuz naeuz.

“Nohlungz mbouj miz nauq, miz ‘nohfungh’ (nohgaeq).” Lwgbawx naeuz.

“Gou ciengx gaeq bang dem bang, mbouj miz yungh!” Yahbuz naeuz.

“Byawz naeuz mbouj miz yungh ni? Yunghcawq daih ne, daengx ranz ndaej gwn caez.” Lwgbawx naeuz.

“Mwngz couh yienghneix gikheiq gou!” Yahbuz naeuz.

“Dwg mwngz caeuq swhgeij gvaq mbouj bae bw.” Lwgbawx naeuz.

“Yahgeq ha, daeuj lo, daeuj gwn caeuz lo.” Goengbaeuq heuh.

“Gwn gwn gwn, mwngz cij rox gwn!” Yahbuz laekgaek naeuz.

“Daxbuz baenzlawz?” Daeglan cam.

“Daxbuz mwngz heiq mbouj swnh, gaej leix de, gwn caeuz vaiq di, yaep dem goeng soengq mwngz bae hagdangz.” Goengbaeuq naeuz.

“Meh, mwngz daeuj gwn caeuz, gou caeuq mwngz naeuz gienh saeh ndeu.” Daeglwg naeuz.

Yahbuz najbyak nyaeuq baenz cih “川”, yamq- din naiqnuek haeuj congz lo.

“Meh, saedvah lwnh mwngz nyi, mbouj dwg de mbouj aeu lwgngeih, cijdwg de mbouj rox mizndang, neix gvaiq mbouj ndaej de. Gou cam gvaq canghyw lo, caeuzyah seiqcib bi doxhwnj aenvih ndangdaej vwndiz, nanz mizndang. Neix cijnaengz gvaiq cwngcwz lwgngeih cuengqhai ceiz lai.” Daeglwg naeuz.

Yahbuz ngamq gaem duixhaeux youh cuengq roengz lo, doq danqheiq doq haeuj rug bae.

“Byawz naeuz gou mboujrox mizndang?” Baz cam.

“Doengzhag gou naeuz. De dwg canghyw fu- goh.” Gvan naeuz.

“Canghyw hukngawz!”

“De bibi bingz ndaej ‘bouxcanghyw maenh- ndei’.”

“Aen uk de haeuj raemx, cij naeuz gou mboujrox mizndang. De rox mbouj rox gou daiq aen vanzciedseng?”

“Daiq mbouj daiq vanz, mwngz cungj mboujrox mizndang.”

“Mwngz hangz gou!”

“Gou saedvah saedgangj.”

“Ngoenzcog gou bae dawz vanz ok, cwngmingz hawj mwngz yawj.”

“Gaej mbouj bae! Mboujnex mwngz ngaiz doekceih.”

“Haemz mboujndaej seizneix couh bae!”

“Seizneix bae hix ndaej, bae veiswnghyen, gij liuzcwngz haenx beij yihyen yienhsingz genjdanh、fuengbienh.”

“Bae couh bae, byawz lau byawz!”

Daeggvan hai cimozdoz, gokbak de miz sairiu, sairiu miz di gvaejcij.

Ngeih

Buenq bi gvaqbae lo, aendungx lwgbawx mbouj miz maz bienqvaq. Yahbuz daj maqmuengh bienqbaenz saetmuengh, de seiz mbouj seiz couh miz coenz vahgvet ndeu.

Lwgbawx rox gij vah haenx dwg gangj de, couh yienghneix, “cancwngh” yah caeuq bawx ciengz dem ciengz fatseng.

……

“Heuh, heuh maz heuh? Cij heuh mbouj faeg. Laglaeh! Deuz!” Duz gaeqmeh cingq heuh “godog godog” haenx deng yahbuz dik din ndeu saetdiuq buetdeuz lo.

Lwgbawx rox vah neix dwg gangj de, hoeng de mbouj oksing, mboujnex youh baenz ciengz “cancwngh” moq ndeu.

“Gaej leix de, de muengh lanngeih muengh baenzbag lo.” Daeggvan laeglemx nai baz.

“Gou caen mboujrox mizndang ha?” Baz cam gvan.

“Mwngz mbouj dwg mbouj siengj aeu lwgngeih ma? Ngamj mwngz lo.” Gvan naeuz.

“Hoeng……”

Bi ndeu gvaqbae lo. Haemh ndeu.

“Baz, daeuj gwn caeuz nw.” Daeglwg heuh.

“Miz vunz naeuz gou cij rox gwn mbouj rox seng, daj seizneix hwnj, gou mbouj gwn lo.” Lwgbawx naeuz.

“Canghaeux ranz raeuz rimfoed, mbouj yungh byawz mbaetgwn.” Yahbuz naeuz.

Lwgbawx cung gvaqdaeuj, gyangfwngz gaem mbaw sa ndeu, de dawz sa fad haeuj naj yahbuz bae, naeuz:“Gou couh mbouj gwn, iek dai lanngeih mwngz!”

Bouxcoz fad naj bouxgeq, gvaqbouh lairaeuh. Yahbuz cingq yaek fatheiq, hoeng, coenz vah doeksat lwgbawx hawj de maegsaeg.

Daeglwg ciengj mbaw sa bae yawj, swenj:“Mbaw dan B cauh! Meh, meh, de mizndang lo, song ndwen lai nw!”

“Vaiq, gaj gaeq! Lwg, mwngz bae gaeb gaeq, meh bae ndat raemx.” Yahbuz naeuz.

“Gaej gaj gaeq, gou souh mbouj ndaej cungj dakdaih naekna neix.” Lwgbawx dadaengx yahbuz, “dama mwngz yawjsiuj gou, gou mbouj hawj mwngz ndeigvaq! Ngoenzcog gou bae dawz ok!”

“Mwngz gaej guh bouxgajvunz, mboujnex mehmbwn mbouj cuengqgvaq mwngz bw!” Yahbuz naeuz.

“Gaiqnoh ndaw ndang gou, gou maij baenzlawz guh couh baenzlawz guh.” Lwgbawx naeuz.

Hwnzneix yahbuz ninz mbouj baenz.

Haetromh, yahbuz hwnjmbonq senq dawz yaekseiz cidienh lwgbawx diem hwnj, lij baenzhaet naengh youq bakdou lumj duz baedsoujdou nei.

Hoeng, liuh mbouj daengz lwgbawx ciq cidienh ranznden bae haw. Bae ndaej aen lai cungdaeuz, yahbuz cij rox saeh neix.

Mehlwg muengzhoeb ganj daengz veiswnghyen, caen raen lwgbawx naengh gwnz sahfaz lajroq fucanjgoh dahraix.

Daeglwg gvaqbae nengh fwngz de naeuz: “Bae ranz!”

Lwgbawx baet fwngz daeggvan, dadaengx yahbuz naeuz: “Gou gaenq gwn ywrodlwg, canghyw heuh gou youq neix cazyawj buenq aen cungdaeuz.”

Yahbuz baez dingq, da ronghrib, mbwn fwt laep——Ngunh gvaqbae lo. Lwgbawx raen le riu- nyaen sing ndeu, naeuz: “Cang, mwngz couh gyaj- cang ba!”

Hoeng, ngamq geij faencung ndwi, yahbuz ndaeng、bak ok lwed, gvanbaz vueng liux, muengz hemq: “Canghyw, vaiq gouq vunz!”

Canghyw cingq ciengjgouq.

“Yahgeq mbouj miz maz saeh ba? Gou mbouj gwn ywrodlwg ni, gou dwg hwk de ndwi.”

“Hauhneix mwngz daeuj neix guhmaz?”

“Gou daeuj cam canghyw baenzlawz baujdaih, nienzgeij laux le aeu baujdaih cij ndaej.”

Yaepyet, canghyw okdaeuj naeuz yahbuz hezyaz fwthwnj, lwed guk ndaw uk, aeu sikhaek bae yihyen ndaw singz guh soujsuz.

Youq rog ranzsoujsuz, daeggvan maeuq youq goekciengz, song fwngz got gyaeuj, gwnz naj de dingz ndeu dwg vueng, dingz wnq dwg huj, de cingq nyaenxhaed gij simcingz cabcauj neix. “Soujsuz gvaqlaeng aiq louz miz binghcwng——Lumjbaenz bouxmaezdai、bouxlauxmwnh”, siengj daengz coenz vah canghyw daxbaenh naeuz haenx, de fwtfat fokmaenj baz naeuz: “Ndeindi’ndi, mwngz hwk daxmeh guhmaz ni?”

“Baenzlai ndwen daeuj, de cungj byaep gou, gangjgvet gou, hozhwnj le couh siengj hwkhwk de, byawz rox de baenzneix mbouj naih hwk ne!”

Ndwen ndeu gvaqbae, yahbuz okyen lo, caen baenz bouxdoenghgo dahraix. Vunzmbanj lwnh ningcumcum, naeuz lwgbawx hwk yahbuz baenz bouxmaezdai.

Coenz vah neix hawj lwgbawx yaek doemqlak. De rox swhgeij leixvi, couh aeu soujgih bae loeg singdaej lwgnding ceiq haenq caeuq singriu lwgnding ceiq angq daeuj doxlwnz cuengq hawj yahbuz dingq, muengh de caeux di singj. Hoeng, de cungj ninz faenh de.

Lwgbawx senglwg dauq ranz ngoenzhaenx, yahbuz ndigonq riunyumj ndwn youq bakdou, iet fwngz ciep lanngeih haeuj rungj.

Lwgbawx bak aj loengqloengq, cam: “Mwngz caen ninzndaek roxnaeuz gyaj ninzndaek?”

“Mwngz canggyaj ninzndaek geij ndwen hawj dou yawj, yawj mwngz guhbaenz mbouj?” Yahbuz naeuz.

Lwgbawx anj lo……