Hai aen dou danhyenz laj laeuz goengda gou, laeng mbaeklae laeuz, miz gyaq cidienhdoengh gaeuqgat ndeu. Gou byaij gvaqbae, vangh bae muengx rongzgyau baet deuz namhfaenx, lumh gyaeujci, couh lumj gaem fajfwngz lauxbaengzyoux nei, gou youh dauq naemj hwnj gij saeh gvaqbae haenx.

Seiz gou loq miz di geiqsingq, goengda gwih cidienhdoengh daiq gou bae seiqcawq youz. Bouxvunz iqet gou cungj dwg ndwn youq donh naj cidienhdoengh, doeklaeng goengda lau gou naetnaiq lai, daegdaengq dawz aen eij iq cuengq youq gwnz banjcuengqdin, gou ciengzseiz nyeux gyaeuj dauq yawj goengda, guh’unj naeuz:“Goengda, gou yaek bae boenz sa.” “Goengda, gou yaek bae gunghyenz.” Baezbaez goengda cungj dapwngq gou, gwih gyaq cidienhdoengh gaeuqgatgat haenx doz gou bae.

Bae hwnjhag le, goengda couh aeu cidienh- doengh de, soengq gou baehag ciep gou cuengqhag, ngoenznaengz baez ok bakdou hagdangz couh ngonz raen goengda caeuq gyaq cidienhdoengh senq daeuj caj gou. Seizde gou couh mbouj yungh naengh youq aen eij iq baihnaj lo, dauq naengh youq aen vih laeng ci, boemz laenghwet goengda netnet bae. Youq gwnz roen ma ranz, goengda doz gou, saekseiz hai daegbied menh, doq byaij doq youz, gij ciubaiz hoengzhoengz loegloeg song henz loh seiz mbouj seiz ciuyinx gou ngonzyawj, cungj roxnyinh swyouz cwxcaih haenx sangj raixcaix. Aen bouq iq guh gij ndeigwn haenx fwi gij heiqrang okdaeuj hawj gou myaiz rihbyoegbyoeg, naengh youq vih laeng ci, gou engqgya raen dungxiek ngaungau lo.

Seiz gou doeg sam seiq nienzgaep, ndaw ranz hai aen bouq gai ien gai laeuj ndeu, goengda miz seiz lij aeu daeuj ciep gou ma ranz. Mwhhaenx, gou gaenq mbouj caiq haeujsim doenghgij saeh henz loh. Cawzdoeng, rumznae cifoedfoed, naj cungj deng ci in get liux. Gou lwnh gij nyapnyuk bonjfaenh hawj goengda nyi, goengda soqlaiz cungj gig yiemzsuk, doq aeu aen ndang byomsang de bang gou dangj rumznae, doq hozraez nai gou, lwnh gou aeu ndeindei gyaezhoh bonjfaenh. Aiqdwg ndaw lwgda goengda, gou baedauq dwg boux lwgnyez caengz roxsoq ne. Goengda, cungj dwg aeu gyaq cidienh- doengh neix, aeu gij yiengh de, henhoh gou. Ndithaemh ciuq gwnz ndang goengda, gou raen hwet de miz di gungjgoz, roxnyinh ndaeng miz di soemj.

Gyaq cidienhdoengh neix couh lumj boux baengzyoux ceiq ndei gou, mboujguenj rumzhaenq fwnraq cungj mbouj dingzyiet gvaq, ngoenznaengz doz gou hwnjhag cuengqhag!

Ndwenngoenz gvaqlaeng, roen raez rumz swnh, miz vaiq miz menh, miz ndei miz rwix, gou yaek aeu gij fuengfap gou, bang goengda gvaq ndaej engq vuenyungz.

（bouxraiz: Ciengj Swjcinz bouxhoiz: Huz Bangjhangz / 作者：蒋紫辰 翻译：胡榜航）