Hoenx mokmok mekmek,

Singbauq dek sim vunz,

Hoenzsiu oenq daengx mbwn,

Gyuek gwnzgwnz lajlaj.

Gyoengq guenbing dwggyaez,

Hamj gyaiq bae hoenxciengq,

Moeb daengz “sambetsienq”,

Meijgoz nyienh fug saw.

Yindu ciemq gvaq gyaiq,

Baij bing daeuj hengzmanz,

Raeuz bae dingj bae lanz,

Bauj gyaranz onjwt.

Hoh guekgya cawjgienz,

Caeuq Suhlenz fannaj,

Mbouj doxndei cixbah,

Lij hoenx gvaq geij baez.

Yeznanz manz youh giengh,

Henx ciemq dieg gueknden,

Bing raeuz dingj ndaej rengz,

Diegguek hen ndaej maenh.

Cungguek gyaez hozbingz,

Lwgminz gyaez ngoenzmoq,

Gwn van geiq haemzhoj,

Caez henhoh aen biengz.

3. Haenq Bued Luenh Baenq

CingqVwnzva dagwzming,

Hoj beksingq gwnzbiengz,

Vunzrwix naemj baenz sien,

Yaek fan dien boek deih.

Fanjgwzming cizdonz,

Laeglemx comz haeuj Dangj,

Caez cimh rumz roemx langh,

Guhcaeg ngvanh ciengj gienz.

Vunzrwix hemq cauhfanj,

Vunzlanh guh daiqdaeuz,

Swenjvakvak luenh naeuz,

“Aeu gwzming daengz giek”.

Vet ra boux “baihgvaz”（右派）,

Lengqlengq caz gvaqdoh,

Daengx guek goenjoo,

Ienvuengj rox geijlai.（32）