Geij ngoenz gonq Swcigih Liengzsiz Caeuq Vuzswh Cuzbeigiz lwnh vunzlai rox, daengz 8 nyied 5 hauh, Gvangjsih gaenq guhsat soucawx haeuxgok 37.26 fanh dun, ndawde cwngcwzsing soucawx haeux- gok 22.76 fanh dun、doengzbeij demmaj 117.59%.

Daj bineix hong soucawx haeux hainduj doxdaeuj, Swcigih Liengzsiz Caeuq Vuzswh Cuzbeigiz anbaiz vunz bae soucawx ca mbouj lai 2000 boux, couz ngaenz soucawx daih’iek 24 ik maenz, hezdiuz aen yen（si、gih） ndaem haeuxnaz daezgonq caepcawq cang cang 150 lai fanh dun, anbaiz ci bae yinh haeux soucawx ndaej 225 aen, caen guh daengz “miz vunz sou haeux、miz ngaenz cawx haeux、miz cang cang haeux、miz ci yinh haeux”.

Swcigih Liengzsiz Caeuq Vuzswh Cuzbeigiz cungfaen yungh saenqsik- vaq gamguenj soujduenh, gyagiengz mboengq soucawx haeux gamguenj, gyalai bae soucawx yienhciengz genj- caz, yiemzhaenq hoenx famh fap famh gvi、yaeuh nungzminz haih nungzminz daengj hingzveiz; cingjceih youq mwh cwngcwzsing soucawx haeux “yaeuh aeu ngaenz boujdiep haeux caizcwng”“dingj sou” “hai fei byouq” daengj vwndiz, lai gamguenj soucawx haeux, baujhoh gij gienz habfap boux ndaem haeux. Doengzseiz, dingjmaenh cwng- cwzsing soucawx caeuq hawciengzvaq soucawx “song gaiq ga byaij loh”, baujmaenh haeux wnggai sou caenh sou、naednaed haeuj cang.

Ciuq cam rox, daengx gih gak gaep liengzsiz caeuq vuzswh cuzbei bumwnz daezgonq guh ndei caepcawq, caepcawq ndei cang、veizhu sezbei、guhsaeq fueng’anq、guh cwngcwz senhconz, caeuq boux gai haeux ciemdingh bangguenj hezyi. Hailaeb diuzroen iekdingh gonq soucawx, daezgonq aeu yienghbinj、genjniemh, guh ndei dienheiq saenqsik daezsingj fugsaeh, fuengbienh boux ndaem haeux yo haeux gai haeux. Dingj- maenh gyaqcienz hwnj buengj、biucinj hwnj ciengz、yienghbinj hwnj daiz、yizgi sezbei “dawz cingq hwnj gangj”, hawj boux ndaem haeux gyau “haeux cuengqsim”, gibseiz hawj doh ngaenz gai haeux caeuq ngaenz boujdiep, hawj boux ndaem haeux miz ngaenz roengz daeh, hawj gyoengqde roxnyinh aeundaej caeuq habhoz.

(Cinz Yijsenh Dwng Yazveih)