Denjciz minzcuz vunz noix, dwg gangj gak minzcuz vunz noix daj ciuhgeq roengzdaeuj gij vwnzyen denjciz、beigaek sawdeu caeuq swhliu cienznaeuz daengj, gij neiyungz de bauhamz cwngci、ginghci、cezyoz、fazliz、lizsij、cunghgyau、ginhsw、vwnzyoz、yisuz、vah saw、dilij、dienfaenz ligsuenq、yw bingh daengj.

Ciuq gij geiqloeg fuengsik, denjciz minzcuz vunz noix cujyau faen baenz song daih loih：It dwg miz sawfaenz, ngeih dwg mboujmiz sawfaenz. Cungj denjciz miz sawfaenz baudaengz: Gij vwnzyen denjciz caeuq lizsij faenzsaw aeu saw minzcuz vunz noix caeuq sawgeq minzcuz vunz noix geiqloeg haenx; gij vwnzyen denjciz ciuhgeq aeu Sawgun geiqloeg gij saeh gvendaengz minzcuz vunz noix; gij beigaek sawdeu aeu sawcih minzcuz vunz noix caeuq Sawgun geiqloeg gij saeh minzcuz vunz noix. Cungj denjciz mboujmiz sawfaenz haenx cujyau dwg gangj minzcuz vunz noix daj ciuhgeq daeuj gak cungj swhliu miz lizsij caeuq vwnzva gyaciz cienznaeuz roengzdaeuj haenx, dingzlai dwg gangj goekgaen minzcuz、lizsij bienqvaq、fungsug sibgvenq、minzcuz daegdiemj, cujyau miz gojgaeqfangz、seiraez、cienznaeuz、gojgaeq、fwen、vahdamz、vahduenz daengj. Neix dou gangj gij denjciz minzcuz vunz noix, cij gangj gij sawgeq aeu sawcih ciuhgeq minzcuz vunz noix geiqloeg haenx.

Ciuq gij cungjloih mbouj doengz, denjciz minzcuz vunz noix faen baenz 4 daih loih: Bonjsaw、deugaek、mbawsaw、gangjciengq. Loih bonjsaw dwg gangj gij saw gak minzcuz vunz noix daj ciuhgeq roengzdaeuj ciuq fuengfap ciuhgeq cangding baenz cek haenx; loih deugaek dwg gangj gij sigbei、deudat、sawmoh、faexdeu、deu gim deu ngaenz daengj; loih mbawsaw dwg gangj naeuzrox、iekdingh、dwk- sawsaenq、fei、mbawcausij、caepciuq、gviiek daengj; loih gangjciengq dwg gangj doengh gij gojgaeqfangz、cienz- naeuz、gojgaeq、fwen miz lizsij vwnzva gyaciz gak minzcuz vunz noix, gij neix baengh cienznaeuz cienzswnj, neiyungz gvendaengz goekgaen minzcuz、senjdieg daengj.

Youq seizgan fuengmienh, denj- ciz minzcuz vunz noix ceiq caez suenq daengz 1911 nienz gaxgonq, hoeng aenvih gak minzcuz lizsij daegdiemj caeuq denjciz lix youq gwnzbiengz cingzgvang mbouj doengz, ciuq gak minzcuz vunz noix cingzgvang mbouj doengz, mbangj denjciz minzcuz vunz noix ceiq caez ndaej suenq daengz 1949 nienz.

Daj gwnzneix ndaej rox, caeuq denjciz Sawgun doxbeij, denjciz minzcuz vunz noix youq sawcih、geiqloeg fuengsik、seizgan gyaiqdingh daengj fuengmienh cungj miz cengca, neix naeuz raeuz rox gak minzcuz lizsij hwngfat mbouj doengz yamqdin, hix naeuzok Cungguek gak minzcuz vwnzva lai cungj lai yiengh.