7 nyied 9 daengz 11 hauh, Aen Hozdung “Couqmaenh Gij Eiqsik Caezcaemh Cunghvaz Minzcuz Meizdij Doxcomz Fangzcwngzgangj” Nem Doxlwnh Cwngcomz Anqlaeh Maenhndei Bauyez Dieg Siujsoq Minzcuz Cungguek 2023 Nienzdoh youq Gvangjsih Fangzcwngzgangj banh, miz 32 aen meizdij ca mbouj geijlai 100 vunz dieg siujsoq minzcuz hangzyez bause、yungzmeizdij cunghsinh daengj daeuj camgya. Hozdung dwg Cungguek Bauyez Hezvei Siujsoq Minzcuz Digih Bauyez Faenhoih cawjbanh, Gvangjsih Minzcuz Bause ciepbanh, Fangzcwngzgangj Si Minzcunghveij、Gvangjsih Yozmeij Sanghvu Mizhanh Gunghswh bangbanh. Geij ngoenz haenx, gyoengq gicej bae daengz Fangzcwngz Gih、Gangjgouj Gih、 Dungh- hingh Si daengj dieg caijfangj, bae yawj dieg baihnamz guekcoj Fangzcwngzgangj guhlawz couq- maenh gij eiqsik caezcaemh Cunghvaz Minzcuz, yungh bit caeuq ingjsiengq geiqloeg gij minzcuz funghcingz、daegsaek bien’gyaiq、vwnzva goekdaej aen singz neix.

Fangzcwngzgangj daj mbouj miz daengz miz、daj iq daengz hung、daj nyieg daengz ak, daj gaxgonq “aen baksok bwhhoenx bien’gyaiq” bienqbaenz seizneix “aen sok hung cang ndaej baenz ik dun”, lizsij megloh youq neix yawj ndaej cingcing cujcuj. 10 hauh banhaet, gyoengq gicej bae daengz Gangjgouj Gih “Dieggaeuq Bwzgangj” Lizsij Vwnzva Cunghsinh, yawj Fangzcwngzgangj daj gaxgonq daengz neix baenzlawz hwngfat, dauqyawj gij ginggvaq gak minzcuz caezcaemh doxgiet buekguh、caezcaemh mwnhoengh hwngfat.

Neimungzguj Huhlunzbeiwj Si Yungzmeizdij Cunghsinh dangjveij fusuhgi Suhduhbizligwz rox- nyinh, yawjngonz aen cunghsinh neix le, de naemj daengz Huhlunzbeiwj Si Manjcouhlij “diuz sienq gyaudoeng baexmaed gozci saekhoengz”, song dieg dieggaeuq lizsij saekhoengz, dieg namz dieg baek, gyae’gyang doxmuengh, gyoengqde daezsingj daihlaeng, baenz gij rengz cienzswnj lizsij、haenqguh baenaj.

Geij bi neix daeuj, Fangz- cwngzgangj Si haeujlaeg guh aen gunghcwngz hwngfat cienzswnj vwnzva ciuh- geq maenhndei Cunghvaz, laebdaeb guh “Sam Nyied Sam” “Ginghcuz Hahcez” “Yauzcuz Ahbaujcez” daengj hozdung angqhoh ngoenzciet, yungh minzcuz vwnzva doxdaz gak minzcuz “sam gyau”.

Ginghcuz dwg aen minzcuz vunzsoq haemq noix ndaw siujsoq minzcuz guek raeuz, cujyau comzyouq Dunghhingh Si Gyanghbingz Cin Vanveij、Sanhsinh、Vuhdouz sam aen haijdauj. Ginghcuz mboujdan miz vah、saw bonjfaenh, hix miz sibgvenq bonjfaenh, “Ginghcuz Hahcez”、Ginghcuz gimzyienzdog song aen hanghmoeg neix ndaej liedhaeuj guekgya gaep feihyiz daibyaujsing hanghmoeg mingzloeg.

11 hauh banhaet, caijfangjdonz byaij haeuj Ginghcuz Bozvuzgvanj, Sinhgyangh Gahsiz Digih Yungzmeizdij Cunghsinh dangjveij veijyenz、fucujyin Maijmaijdizmingz·Vuzbuliz geizheih cam gunghcoz yinzyenz:“Mwngz ndei, gou siengj cam ‘gou maij mwngz’ aeu gij vah Ginghcuz baenzlawz gangj?” Boux gunghcoz yinzyenz riu aeu vah Ginghcuz naeuz, mwhneix, gyoengq gicej youq henz hix cungj hag hwnjdaeuj, dangciengz gij heiqfaenh vuenheij raixcaix.

“Bwzgangj Gulij Lizsij” Vwnzva Cunghsinh （“Gvangjsih 3·22 gunghcwngz”）、Hahdingz Ginghcuz Vanveij daengj dieg, cungj dwg gij dieg youqgaenj yinx vunz bae ngeixnaemj caeuq cienzswnj gij cingsaenz, ndaej gikfat gij cingsaenz gyaez guek caeuq gagsaenq vwnzva gyoengq vunzlai gak minzcuz, couqmaenh gij eiqsik caezcaemh Cunghvaz Minzcuz, dwg gij caidij mizyauq cauhlaeb aen cingsaenz ranzmbanj caemhmiz Cunghvaz Minzcuz.

Mbanjsanhsinh youq baihdoengnamz Fangz- cwngzgangj Si Gangjgouj Gih Gisah Cin, sam baih dep haij, dwg aen mbanj dwkbya ndeu, gungh miz 13 aen siujcuj vunzmbanj, 624 ranz 2621 boux vunz, gij souhaeuj gyoengq vunzmbanj baengh youq henzhaij dajndaem、dwkbya ndaw haij、dajndaem dajciengx miz daegsaek guh cawj. Mbanjsanhsinh hix dwg aen mbanj minzcuz ndeu, miz Bouxcuengh、Ginghcuz、Yauzcuz、Mulaujcuz daengj siujsoq minzcuz.

Geij bi neix daeuj, Mbanjsanhsinh aeu “canj- nieb hwngvuengh、swnghdai habyouq、yanghfungh vwnzmingz、ceihleix mizyauq、ndwenngoenz fouq- miz” guh haedsim, roengzrengz doicaenh gensez yanghfungh vwnzmingz, veh baenz le fuk veh vuenyungz gvendaengz “canjnieb hwngvuengh、swnghdai gyaeundei、yanghfungh lauxsaed、ndaw- biengz an’onj、beksingq fouqmiz” ndeu.

Gizlinz Yenzbenh Yizbau Se Bauvu Cunghsinh cungjbenhban cujyin Yiz Li doq byaij doq yawj, gamjsouh gij gojgaeq moq gvendaengz gij canjnieb fazcanj、vwnzva caeuq lijyouz yungzhab Mbanj- sanhsinh. Gofaex henz roen Mbanjsanhsinh mwn- cupcup, ranz gaijguh ranzdozninz aen doek aen hwnq hwnjdaeuj, vunzmbanj geij boux guhdoih naengh youq laj gofaex cwxcaih yietliengz, gij heiqfaenh huzndei hwngfat yienghneix dawzyinx raixcaix.

Gyanghbingz Cin liz Dunghhingh sigih cibhaj goengleix, aen cin neix baengh bya、dep haij、youq bien’gyaiq, gig miz vwnzva daegsaek. Daj Mingzciuz doxdaeuj, aen cin neix aenvih diegyouq daegbied, vwnzva caeuq ginghci cungj ndaej bingzonj fazcanj, menhmenh youq doengh dieg neix bienqbaenz aen cin geq “seiq baih doxdoeng” caemhcaiq miz itdingh lizsij diegvih, dwg aen goujan youqgaenj gij swhbwnj gozci youq guek raeuz baihnamz doxcomz caeuq gij gaicawx cingouj cuzgouj gozci gvaq, miz caenh ndeu ndaej haenh heuhguh “Yanghgangj iq”.

Byaij youq diuz Gaigaeuq Gyanghbingz, gij ranz song henz raizraurau、va’byoembyoem. Gizlinz Cauzsenhvwnz Bause Cenzmeizdij Cunghsinh cujyin Cuih Swnghuj doq ingjsiengq hwnjdaeuj. De naeuz:“Gaigaeuq yienznaeuz yawj daeuj gaeuqgad, mbouj ronghsien geijlai, hoeng mbouj cauz lumj ndawsingz, saedceij cwxcaih、soengyungz, hawj gou roxnyinh soengsadsad.” Gij ndwenngoenz soengse raixcaix, Gaigaeuq Gyanghbingz youq mwhneix cingq dwg giz dieg souyouz ndeu.

Geij bi neix daeuj, Fangzcwngzgangj Si hopndaet hwnqguh “it gih song dieg it suen it doengdauh” caeuq hwnqguh aen singz gunghyez gyawj sok yendaiva Fangzcwngzgangj Si, neix dwg swcigih an hawj. Aen si neix ciuq “dieg henzguek gyawj haij doengzcaez guh、caez yamq bae vaiq、song mbiengj hoenxguh” bae hwngfat canjnieb, saedguh aen gunghcwngz “2+1”， guh hung guh ak baenz rangh canjnieb gyawj sok caeuq henzguek, doinyoengx ginghci sevei hwngfat youh ndei youh vaiq, hawj vunzlai gak cuz caez gvaq ndwenngoenz ndei, caezyungh cwngzgoj hwngfat, caezcoi minzcuz doxgiet.

“Cibgeij aen diemj raeuz caijfangj ndawde, Dunghhingh Gyauzbihgvanj hawj gou ceiq nanzlumz. Ndaw gvanj miz 140 lai gaiq vwnzvuz gyauzbih caeuq 20 lai yiengh doxgaiq iq. Neix geiqniemh caeuq gingqnaek le gij ndwenngoenz doenghbaez, raizok bouxvazgyauz bouxvazyinz dwg baenzlawz buekguh, engq sengdoengh yienh’ok gij cingsaenz gamj hairoen、souj saenqyungh naek cingzngeih、doxbang doxcoengh、gyaez guek maij ranz.” Mwh caijfangj, Gvangjsih Laizbinh Si Yungzmeizdij Cunghsinh boux cungjbenhciz Veiz Veilanz yienghneix gangj.

Dunghhingh Gyauzbihgvanj youq laeng Dungh- hingh Cin Gunghyenz Segih, gaxgonq aen de heuhguh Gvangjdungh Veigvanj, bi 2021 aeu ndaej aen mingzdaeuz Aen Dieggiek Son’gyauq Minzcuz Doxgiet Baenaj Fangzcwngzgangj Si. Dunghhingh Si caemh maij youq neix son’gyauq gyaezguek cujyi. Geij bi neix daeuj, haujlai bouxvazgyauz bouxvazyinz cungj daeuj neix ra ranzmbanj、caz goekrag, hekyouz cix daeuj dwk mbouj dingz mbouj duenh. Gij cingsaenz buekguh、cingzngeih gyaezguek maijranz vunzlai gyauzyangh, ciengxlwenx gikcoi daihlaeng buekguh baenaj.

Dunghhingh Gyauzbihgvanj hawj raeuz rox daengz, mboujlwnh seizdaih baenzlawz bienq, aen siengjfap ranzmbanj doxbang doxcoengh、doxhuz caemhyouq ciengxlwenx dwg gij cingsaenz dijbauj caeuq gij goekgaen rengz baenaj. Cungj cingzngeih gyaezguek maijranz neix caeuq vunzlai gyaepgouz ranzmbanj huzndei, dwg gij vwnzva Cunghvaz Minzcuz itcig cienzswnj haenx.

2017 nienz 4 nyied, Siz Ginbingz cungjsuhgi cazyawj Gvangjsih seiz yinxok, henhoh swnghdai vanzging couh aeu hoh ndei doenghgo youh dij youh noix haenx, itdingh aeu aeueiq gohyoz, dawz ndei mbaqrap, henhoh ndei ndoengfaex hoengz.

Dieg Baujhoh Ndoengfaex Hoengz Sizgoz youq Fangzcwngzgangj Si Fangzcwngz Gih Gyanghsanh Cin Sizgoz Cunh，dwg bouhfaenh youqgaenj gapbaenz Bwzlunz Hozgouj Guekgya Gaep Swyenz Baujhoh Gih, gaenq liedhaeuj mingzloeg diegcumx youqgaenj gozci, dwg ndoengfaex hoengz seiqgyaiq daihsam、najdieg baenzbenq hamq luhaij ceiq hung guek raeuz. Mwh bae caijfangj gaxgonq, haujlai gicej gangj, ndoengfaex hoengz dwg giz caijfangj baezneix gyoengqde gig maqmuengh.

Fangzcwngzgangj Si hoengheiq caetliengh ndei, laebdaeb lai bi dwg swcigih daih’it, neix dwg baengh baujhoh ndoengfaex hoengz ndaej ndei.

Geij bi neix daeuj, Fangzcwngzgangj Si genhciz ginghci hwngfat caeuq swnghdai baujhoh caemh guh, coihawj vunz caeuq swhyienz huzndei caemhyouq, aen si neix cauhlaeb ndaej aen swcigih gaep swnghdai yen(si、gih) ndeu、10 aen swnghdai yanghcin、53 aen swnghdai mbanj, byaij youq daengx gih baihnaj.

10 hauh gyanghaet, caijfangjdonz byaij haeuj Fangzcwngzgangj Gozci Yihyoz Hailangh Sawq- niemh Gih Gozci Yihyoz Cauhmoq Funwngz Cunghsinh, yawjyawj Fangzcwngzgangj Gozci Yihyoz Hailangh Sawqniemh Gih guh ndaej baenzlawz yiengh.

Swconh Ahba Couh Sinhvwnz Cenzmeiz Cunghsinh dangjveij veijyenz、fucujyin Hoz Yaujvaz naeuz, Fangzcwngzgangj Si gingjsaek gyaeundei、dienheiq habvunz, habyouq habnieb, dwg Cungguek yangjduh、mbanj naihsouh, laebhwnj Gozci Yihyoz Hailangh Sawqniemh Gih, doiq Fangzcwngzgangj Si guh aen dieg ndei comz ywbingh、ciengxndang、gvaq ngoenzgyaj caemhmiz、cauhlaeb aen minghyinh caezcaemh vunz lajmbwn ndangcangq miz cozyung youqgaenj.

Geij bi neix daeuj, Fangzcwngzgangj Si laebmaenh laebhwnj aen leixniemh raemx saw bya heu couhdwg bya gim bya ngaenz，dazyinx gak cuz vunzlai caezsim caemh guenj haijvanh lamz、caemh hen Bwzlunz Hozgouj Ndoengfaex Hoengz，Sihvanh Hungzsah Gvaengx Haenzhaij Swnghdaiva Gensez senjhaeuj aen gozci anqlaeh demyauq boiqhab swnghdai bet daih haenzhaij daengx seiq- gyaiq，swnggaep gaijcauh roenloeg swnghdai cienz haijgingj Sih- vanh，hawj saekloeg swnghdai bienqbaenz diuzsai saek- loeg gak cuz vunzlai doxgyau dox- yungz ndeu.