(ciep geiz gonq)

Suijcuz Suijsuh

Cojcoeng Suijcuz cauh sawcih, vah Suijcuz heuhguh “Lezsuih”，hoiz baenz Sawgun dwg “水字”“水文”， vunzbiengz heuhguh “Suijsuh”. Suijsuh dwg seizlawz cauhbaenz seizneix caengz caz rox. Ciuq gij fuengfap cauh sawcih, Suijsuh faen baenz sam cungj: Cihlumjyiengh, dingzlai dwg aeu va、roeg、non doengh gij doxgaiq neix, caeuq gij doxgaiq duzdwngz beij lumj duzlungz daengj daeuj guh yiengh, ciuq gij yiengh de veh okdaeuj; ngeih dwg cih riengz Sawgun, couhdwg byonj sij、dauqdingq sij roxnaeuz gaij gij yiengh Sawgun sij baenz sawcih minzcuz de; sam dwg sawcih baiq baed, couh dwg gak cungj dozveh vunz biengz Yizcuz baiq baed. 2002 nienz 3 nyied, Suijsuh ndaej lied haeuj buek mingzloeg daih’it Cunghgoz dangjan vwnzyen yiz- canj. 2006 nienz 6 nyied, Suijsuh ndaej lied haeuj buek mingzloeg daih’it guekgya gaep feihvuzciz vwnzva yizcanj. Aenvih Suijcuz vunz haemq noix, gaxgonq youq Nanzdanh、Yizcouh miz saw riuzcienz gvaq, hoeng daengz seizneix Gvangjsih cungj caengz ra ndaej saek bonj sawgeq Suijsuh.

Sawdoj Mauznanzcuz

Sawdoj Mauznanzcuz dwg vunz de gaengawq vah Mauznanzcuz fatsing, aeu bienbuengz bouhsouj Sawgun daeuj habbaenz. Mbouj rox dwg seizlawz cauhbaenz, dingzlai dwg goengsae、goengdauh、canghfwen sawjyungh, dawz daeuj cau sawging、doq fwen、geiq saeh daengj. 2009 nienz 6 nyied Gozvuyen goengbouh 《Mingzloeg Sawgeq Dijbauj Guekgya》 buek daihngeih, ndawde nab sam bonj sawgeq aeu sawdoj Mauznanzcuz causij haenx haeujbae.